Klumech er a First Presidency, Ongerung el buil 2016
Merael mo Tuab e Selbechakl er a Chelsel a Ses el Eolt
Ng diak el sal meketeketang e a bechik, er a Harriet, me ngak a mlara skozio lomes a skoki sel be le metengel. Ng mle mekngit a eanged, me a ses el eolt a ulemtok er tial skoki er a lolekedang, e luchul eng mlo melmesim e mesisbekl er a be le metengel.
Tia er a ki momes er tial teletael er a ses el eolt me tia el skoki, e a uldesuek a mlo melbedebek er a taem el kulsuub a bekall er a skoki me a ikel osisechakl el ksiluub—e uriul eng mlo sebechek lolisechakl el mora rebebil er a remesuub a bekall er a skoki.
Ak mle blechoel melekoi er tir el kmo, “Ng diak molasm el mo omtebechel er a ses el eolt.”” “Bom chelellakl; e lak louedikel a rengum. Di mngai osengem el bedul a belengel sel rolel a skoki. Alsekum e ke touchakl er sel ngii a rolem, e morchedau el tuobed eng di bom kerekikl. Moumera er sel ngii a ultekellel tial skoki. Mo mekall el tuobed er a chelsel sel el eolt.
A remeduch lomekall a skoki a medengei el kmo ng diak el sebechir el metebechel a ikel rokui el duubech er bitar tir. Ng diak el sebechir el di mekodir a ses el eolt. Ng diak el sebechir el torbengii a chull malechub a snow. Ng diak el sebechir el tomer er a eolt malechub e lengedechii omerollel.
Eng di te dirrek el medengei el kmo ng diak lungil a bol medakt er a ses el eolt malechub a mesisiich el eolt— oumesingd alsekum eng choitechetur a rengrir. A rolel eng sebechel mo ungil kmerd a skoki a sel molemolem el ngara rolel e mekekokau lomekall loltirakl er sel ngii a rolel a skoki.
Tia er a kumes aika el skoki el mekekerkerd e bocha kumtab aikel ksiluub er a chelsel a rak el ngak a mle pilot, e a kora mlo omtab el kmo tia ng diak a kora suobel er a chelsel kirel a klengar kid.
Ng diak el blechoel sebeched el metebechel a ses el eolt er a klengar kid. Bebil er a taem eng diak el bol taut aikel tekoi el domdasou. Kede locha mo omelchesiu er kid el uaia demesebesebk er a ses el eolt lokiu a klsibelreng, rraureng, dakt, klengitelreng, malechub a berraod er a uldesued.
Chelsel aikaikid el taem, eng beot er kid a soiseb er a chelsel a rokui el chelbirukel el teletael el mo uchul e a ringel el de ngara chelsel a uaia bol moktek er a uldesued. Kede mechetikaik el kuk kmal mo omtab er a ringel el de ngara chelsel e obes er a Osobel me sel klaumera er kid er a klemerang.
Eng di tia diak el ngii a ungil rael dokiu ngii sel desiseb er a ringel er a klengar.
Meng di uaia meduch lomekall a skoki el chad el melemolem el ngar sel rolel a skoki meng sebechel mo ungil kmerd, me kid meng kired lotilii a moktek er a klaumera er kid— el mora Osobeled, me a ebangkelio er Ngii, me a moktek er a Demad er a Babeluades— me sel ngii a tkul rebab el moktek er kid— el lmuut el mora blid er a babeluades. Ng kirel mo blak a rengud lotilii a klaumera er kid er a Dios e melemolem er sel rael loltirakl er ngii. Ng kirel osenged, rengud me a uldesued el ngar sel rael el kid a medengei el kmo ng kired el ngarngii.
Sel dochotii a klaumera er kid e oumerang e ra Chedam er a Babeluades el loltirak er a Llechul eng mo uchul a deureng me a klebkall el mei er kid. E a dolemolem el ngar sel rael, e kede tuobed er a chelsel a ses el eolt— el diak el iior er a klisichel— e mo sebeched el mo remei er a blid el ngara babeluades.
Me a lungil a eanged me a lak, e kid loltirakl er a Jesus Kristo, ea kot e kede osiik er a rengedel a Dios me Ngii el melmalt, el medengei el kmo sel bo deuaisei, e a ikel rokui el dousbech a di mo ungil besul (mesa Mateus 6:33).
Ng meral klou a belkul suobel er a klengar!
Sel de sal mo meringel lomdasou a ongarm, me a ringel, me a rraureng, me a dakt, eng mengai el mo chetituokel a klengar er kid. Eng di sel dengai a moktek er kid sel lorokiolel a klengar kid el bedul a babeluades maikel deureng sel de ngara rolel— a oubeltikelreng el Dios, e dosiou er a rebebil— eng uchul eng mo sebeched el ngoriakl er a chelsel aikel meringel taem me a ses el eolt er a klengar er kid.
Re sechelik, ng diak el iior er a klisichel a ses el eolt er a klengar er kid er tial beluulechad, le ebangkelio er a Jesus Kristo a blechoel meskid a kot el ungil rael el dorael er ngii e kede merael mo tuab e selbechakl er a chelsel a rengedel a Demad er a Babeluades.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, February 2016. Palauan. 12862 881
Osischeklel Tia el Klumech
A President Uchtdorf a mellach er kid el mo “oumerang er a Dios e ngmai a moktek er kid el bedul ngii.” Molatk loker tirkal molisechakl er tir el kmo te mekera e melemolem el ngar sel “rael el bedul a babeluades me a deureng sel loltirakl er tial rael” er a chelsel aikel taem lesiseb er a ringel. Ng sebechem lolengit er tir el mo omdasou a teletael el uchul e a moktek er tir a bedul sel klaumera er tir er a Kristo er a chelsel a ringel e bo le ngara nglunguuch el kmo te mekera e mo oltirakl er a chimong malechub eng betok er a ikal uldasou.