ຂ່າວສານການຢ້ຽມສອນ, ເດືອນກຸມພາ 2016
ການແຕ່ງງານແມ່ນຖືກແຕ່ງຕັ້ງຈາກພຣະເຈົ້າ
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລຜ່ານການຢ້ຽມສອນໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.
ສັດທາ, ຄອບຄົວ, ສົງເຄາະ
ສາດສະດາ, ອັກຄະສາວົກ, ແລະ ຜູ້ນຳໄດ້ “ປະກາດຢ່າງໜັກແໜ້ນວ່າ ການແຕ່ງງານລະຫວ່າງຊາຍແລະຍິງເປັນການແຕ່ງຕັ້ງຈາກພຣະເຈົ້າ ແລະ ວ່າຄອບຄົວເປັນຈຸດໃຫຍ່ໃຈກາງຂອງແຜນຂອງພຣະຜູ້ສ້າງ.”1
ແອວເດີ ດີທອດຄຣິສໂຕເຟີສັນ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ: “ຄອບຄົວທີ່ສ້າງຂຶ້ນດ້ວຍການແຕ່ງງານຂອງຊາຍ ແລະ ຍິງ ຈັດໃຫ້ມີບັນຍາກາດທີ່ດີທີ່ສຸດ ເພື່ອແຜນຂອງພຣະເຈົ້າຈະຈະເລີນກ້າວໜ້າ. …
“… ເຮົາບໍ່ສາມາດ ຫລື ບໍ່ມີມະນຸດຄົນອື່ນໃດຈະສາມາດປ່ຽນແປງແບບຢ່າງແຫ່ງການແຕ່ງງານອັນສູງສົ່ງນີ້.”2
ບອນນີ ແອວ ອໍສະກາສັນ, ປະທານອົງການຍິງໜຸ່ມສາມັນ, ໄດ້ກ່າວວ່າ: “ທຸກຄົນ, ບໍ່ວ່າສະພາບການເລື່ອງການແຕ່ງງານຂອງເຂົາເຈົ້າຈະເປັນແນວໃດກໍຕາມ ຫລື ມີລູກຈັກຄົນ, ກໍສາມາດປົກປ້ອງແຜນຂອງພຣະຜູ້ເປັນເຈົ້າໄດ້ ຊຶ່ງໄດ້ບັນຍາຍໄວ້ຢູ່ໃນໃບປະກາດກ່ຽວກັບຄອບຄົວນັ້ນ. ຖ້າມັນເປັນແຜນຂອງພຣະຜູ້ເປັນເຈົ້າ, ມັນກໍຄວນເປັນແຜນຂອງເຮົາຄືກັນ!”3
ແອວເດີ ຄຣິສໂຕເຟີສັນ ໄດ້ກ່າວຕື່ມວ່າ: “ພວກທ່ານບາງຄົນບໍ່ໄດ້ຮັບພອນແຫ່ງການແຕ່ງງານ ເພາະເຫດຜົນທີ່ຮ່ວມດ້ວຍການຂາດໂອກາດທີ່ຄູ່ຄວນ, ສົນໃຈນຳເພດດຽວກັນ, ຄວາມບົກພ່ອງທາງສຸຂະພາບ ຫລື ທາງສະຕິປັນຍາ, ຫລື ການຢ້ານກົວຄວາມລົ້ມເຫລວ. … ຫລືທ່ານອາດໄດ້ແຕ່ງງານ, ແຕ່ຖືກຢ່າຮ້າງ. … ພວກທ່ານບາງຄົນຜູ້ທີ່ແຕ່ງງານແລ້ວກໍບໍ່ສາມາດມີລູກ. …
“ເຖິງຢ່າງໃດກໍຕາມ, … ທຸກຄົນສາມາດມີສ່ວນບໍລິຈາກຕໍ່ການເປີດເຜີຍແຜນອັນສູງສົ່ງໃນແຕ່ລະລຸ້ນຄົນ.”4
ຂໍ້ພຣະຄຳພີເພີ່ມເຕີມ
ປະຖົມມະການ 2:18–24; 1 ໂກຣິນໂທ 11:11; Doctrine and Covenants 49:15–17
ເລື່ອງຈິງໃນຊີວິດ
ບຣາເດີ ແລຣີ ເອັມ ກິບສັນ, ອາດີດທີ່ປຶກສາທີໜຶ່ງໃນຝ່າຍປະທານອົງການຊາຍໜຸ່ມສາມັນ, ຈື່ຕອນທີ່ ນາງເຊີລີ, ຜູ້ໄດ້ກາຍເປັນພັນລະຍາຂອງເພິ່ນ ໄດ້ກ່າວວ່າ:
“‘ນ້ອງຮັກອ້າຍ ເພາະນ້ອງຮູ້ວ່າ ອ້າຍຮັກພຣະຜູ້ເປັນເຈົ້າຫລາຍກວ່າອ້າຍຮັກນ້ອງ.’ …
“ຄຳຕອບນັ້ນໄດ້ປະທັບໃຈຂ້າພະເຈົ້າ. …
“… [ແລະ] ຂ້າພະເຈົ້າຢາກໃຫ້ນາງຮູ້ວ່າ ຂ້າພະເຈົ້າຮັກພຣະຜູ້ເປັນເຈົ້າຫລາຍກວ່າທຸກສິ່ງທຸກຢ່າງ.”5
ແອວເດີ ເດວິດ ເອ ແບ໊ດນາ ແຫ່ງກຸ່ມອັກຄະສາວົກສິບສອງ ໄດ້ສອນວ່າ: “ອົງພຣະເຢຊູຄຣິດເຈົ້າ ເປັນຈຸດໃຈກາງໃນພັນທະສັນຍາຂອງຄວາມສຳພັນແຫ່ງການແຕ່ງງານ. … [ໃຫ້ວາດພາບເຫັນ] ພຣະຜູ້ຊ່ອຍໃຫ້ລອດ ປະທັບຢູ່ຈອມຮູບສາມຫລ່ຽມ, ໂດຍມີຜູ້ຍິງຢືນຢູ່ສົ້ນໜຶ່ງເບື້ອງລຸ່ມ ແລະ ມີຜູ້ຊາຍຢືນຢູ່ອີກສົ້ນໜຶ່ງເບື້ອງລຸ່ມ. ບັດນີ້ໃຫ້ພິຈາລະນາວ່າ ຈະມີຫຍັງເກີດຂຶ້ນໃນຄວາມສຳພັນຂອງຊາຍແລະຍິງ ເມື່ອເຂົາເຈົ້າ ‘ມາຫາພຣະຄຣິດ’ ດ້ວຍຕົວເອງ ແລະ ພະຍາຍາມທີ່ຈະຖືກເຮັດໃຫ້ ‘ເປັນຄົນດີພ້ອມໃນພຣະອົງ’ (ໂມໂຣໄນ 10:32). ເປັນຍ້ອນ ແລະ ຜ່ານທາງພຣະຜູ້ໄຖ່, ທີ່ຊາຍ ແລະ ຍິງ ຈະເຂົ້າໃກ້ຊິດກັນຫລາຍຂຶ້ນ.”6
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, February 2016. Laotian. 12862 331
ໃຫ້ພິຈາລະນາສິ່ງນີ້
ເຮົາຈະສາມາດພະຍາຍາມຕັ້ງໃຈ “ມາຫາພຣະຄຣິດ” ດ້ວຍຕົວເອງໄດ້ແນວໃດ?