Mensahe sa Visiting Teaching, Abril 2016
Mga Anak nga Babayi sang Aton Wala’y Katapusan nga Amay
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon maglog-on sa reliefsociety.lds.org.
Pagtuo, Pamilya, Bulig
Ang balaan nga mga kasulatan nagatudlo sa aton nga “kita ang kaliwat sang Dios” (Mga Binuhatan 17:29). Ang Dios nagtumod kay Emma Smith, asawa sang Propetang si Joseph Smith, bilang “akon anak nga babayi” (D&C 25:1). Ang proklamasyon sa panimalay nagatudlo sa aton nga ang tagsa sa aton “isa ka pinalangga nga espiritu … nga anak nga babayi sang langitnon nga mga ginikanan.”1
“Sa ginharian antes sa duta, natun-an naton ang parte sa aton wala’y katapusan nga pagkatawo bilang mga babayi,” siling ni Carole M. Stephens, unang manuglaygay sa pangkabilugan nga panguluhan sang Relief Society.
“Ang aton mortal nga pagpanglakaton sa duta wala nagliwat sinang mga kamatuoran.”2
“Ang inyo Amay sa Langit nakahibalo sang inyo ngalan kag nakahibalo sang inyo sirkumstansya,” siling ni Elder Jeffrey R. Holland sang Korum sang Napulo’g Duha ka mga Apostoles. “Mabatian Niya ang inyo mga pangamuyo. Nakahibalo Sia sang inyo mga paglaum kag mga handum, lakip na ang inyo mga kahadlok kag mga kapaslawan.”3
“Kita kada isa kabahin sang kag kinahanglanon sa panimalay sang Dios,” siling ni Sister Stephens. “Ang dutan-on nga mga pamilya tanan nagkalainlain. Kag samtang ginahimo naton ang tanan sang aton masarangan agud maghimo sing mabaskog nga tradisyunal nga mga pamilya, ang pagkamiyembro sa pamilya sang Dios wala nagadepende sa bisan ano nga klase sang estado—estado sa kasal, estado sa pagkaginikanan, estado sa kuwarta, estado sa sosyedad, ukon bisan ang klase sang estado nga aton ginabutang sa social media.”4
Dugang nga Balaan nga mga Kasulatan
Jeremias 1:5; Mga Taga-Roma 8:16; Doctrine and Covenants 76:23–24
Gikan sa Aton Kasaysayan
Sa iya sugilanon parte sa Unang Panan-awon,5 ang Propetang si Joseph Smith nagapamatuod sang madamo nga mga kamatuoran—kalakip nga ang aton Amay nga Langitnon nakahibalo sang aton ngalan.
Ang lamharon nga si Joseph naghimud-os sa paghibalo kon diin nga simbahan mabuylog kag nakakita sang giya sa Santiago 1:5. Si Joseph nagpamat-od nga iya pamangkuton ang Dios.
Isa ka aga sang tigpamulak sang 1820, nagkadto sia sa mga kakahuyan agud magpangamuyo apang sa gilayon nalikupan sang madulom nga gahum. Sa sini iya ginsulat:
“Nakita ko ang isa ka haligi sang kasanag nga halin gid nayon sa ibabaw sang akon ulohan, nga ang kasilaw labaw pa sa adlaw, nga nag-amat-amat paidalom tubtob nga ini nagtupa sa akon.
“Wala madugay sang magtuhaw ini, natalupangdan ko ang akon kaugalingon nga naluwas gikan sa kaaway nga naggapos sa akon. Sang magtupa sa akon ang kasanag, nakakita ako sang duha ka mga Tinuga, nga ang kasilaw kag himaya indi masaysay, nga nagatindog sa hangin sa ibabaw ko nayon. Ang isa sa ila naghambal sa akon, nga ginatawag ako sa akon ngalan kag nagsiling, nga nagatudlo sa isa—Ini ang Akon Hinigugma nga Anak. Pamatii Sia!” (Joseph Smith—History 1:16–17).
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang Visiting Teaching Message, April 2016. Hiligaynon. 12864 861
Binagbinaga Ini
Paano ang pagkahibalo nga ikaw isa ka anak nga babayi sang Dios makaapekto sang imo mga desisyon?