Mensahe sang Unang Panguluhan, Abril 2016
Panagna kag Personal nga Bugna
Ni Pangulong Henry B. Eyring
Unang Manuglaygay sa Unang Panguluhan
Ang matuod nga Simbahan ni Jesucristo ginpanumbalik kag yari sa duta karon nga panahon. Ang Simbahan ni Jesucristo sang mga Santos sa Ulihing mga Adlaw humalin pa sadto ginapangunahan sang buhi nga mga propeta kag mga apostoles, nga nagabaton sing dalayon nga giya gikan sa langit.
Ang inang diosnon nga sulundan nangin matuod man sang una. Matun-an naton sa Biblia: “Sa pagkamatuod ang Ginuong Dios indi maghimo sing bisan ano nga butang, kon indi niya anay mapahayag ang iya tinago sa iya mga alagad nga mga manalagna” (Amos 3:7).
Ang Dios sa liwat naghambal sa aton panahon, paagi sa Propetang si Joseph Smith. Iya ginpahayag paagi sa Propetang si Joseph ang ebanghelyo ni Jesucristo sa iya sini kabug-usan. Iya ginpanumbalik ang Iya balaan nga priesthood upod ang mga yabi sini kag ang tanan nga mga kinamatarong, mga gahum, kag mga buluhaton sang sagrado nga gahum sang priesthood.
Sa aton panahon, ang buhi nga mga propeta kag mga apostoles awtorisado nga maghambal, magtudlo, kag maggiya nga may awtoridad gikan sa Dios nga Amay kag kay Ginuong Jesucristo. Ang Manluluwas nagsiling sa Propeta, “Kon ano ang ginhambal ko nga Ginuo, ginhambal ko, kag ginaobligar ko ang akon kaugalingon; kag bisan pa nga ang langit kag ang duta magataliwan, ang akon pulong indi magtaliwan, kundi nga ang tanan matuman, bisan sa akon kaugalingon nga tingug ukon paagi sa tingug sang akon mga alagad, pareho lamang ini” (D&C 1:38).
Sa pangkabilugan nga komperensya makaduha sa isa ka tuig, nabugayan kita sang oportunidad nga mabatian ang pulong sang Ginuo para sa aton gikan sa Iya mga alagad. Isa ina ka prebilihiyo nga indi mabayran. Apang ang bili sinang oportunidad nagadepende kon batunon naton ang mga pulong sa idalom sang impluwensya sang amo man nga Espiritu sa diin ini ginhatag sa sinang mga alagad (tan-awa sa D&C 50:19–22). Subong nga nagabaton sila sang giya gikan sa langit, kinahanglan kita amo man. Kag ina nagakinahanglan sa aton sang amo man nga espirtuhanon nga paghimud-os.
“Himoa ang Imo Ulobrahon”
Sang nagligad nga mga tinuig isa sang mga miyembro sang Korum sang Napulo’g Duha ka mga Apostoles nagpangabay sa akon nga basahon ang isa ka pamulong-pulong nga iya ginahanda para sa pangkabilugan nga komperensya. Isa ako sadto ka bag-uhan nga miyembro sang korum. Nalipay ako sa iya pagsalig nga ayhan makabulig ako sa iya sa pagpangita sang mga pulong nga luyag sang Ginuo nga iya ipamulong. Nagsiling sia sa akon nga nagayuhum, “O, ika-22 na ini nga draft.”
Nadumduman ko ang laygay sang isa ka mapinalanggaon kag mabuot nga si Pangulong Harold B. Lee (1899–1973) nga ginhatag sa akon sadto nga may dako nga pagdagmit: “Hal, kon gusto mo makabaton sang bugna, himoa ang imo ulobrahon.”
Nagbasa ako, nagbinagbinag kag nagpangamuyo para sa sinang ika-22 nga draft. Nagtuon ako sa tanan ko nga masarangan sa idalom sang impluwensya sang Balaan nga Espiritu. Sa tion nga ginhatag sinang miyembro sang korum ang iya pamulong, nahimo ko na ang akon ulubrahon. Indi ako sigurado kon nakabulig ako, pero nakahibalo ako nga napabag-o ako sang nabatian ko ang ginhatag nga pamulong. Ang mga mensahe nag-abot sa akon nga labaw pa sa mga pulong nga akon nabasa kag nga iya ginpamulong. Ang mga pulong may mas dako nga kahulugan sangsa sadtong akon nabasa sa draft. Kag ang mensahe daw para gid sa akon, bagay gid sa akon mga kinahanglanon.
Ang mga alagad sang Dios nagapuasa kag nagapangamuyo nga mabaton ang mensahe Niya para sa ila nga ihatag sa sinang nagakinahanglan sang bugna kag inspirasyon. Ang akon natun-an sa sinang eksperiyensia, kag madamo pa nga iban kasubong sina, amo nga agud mabaton ang dalagko nga mga benepisyo nga sarang maagom gikan sa pagpamati sa buhi nga mga propeta kag mga apostoles, kinahanglan naton mismo magbayad sang bili sang pagbaton sang bugna.
Palangga sang Ginuo ang tagsa ka tawo nga ayhan magpamati sa Iya mensahe, kag Iya nahibaloan ang mga tagipusuon kag mga sirkumstansya sang kada isa. Nakahibalo Sia kon ano nga pagpatadlong, ano nga pagpaisog, kag kon ano nga kamatuoran sang ebanghelyo ang pinakamaayo nga makabulig sa tagsa ka tawo nga magpili sang iya alagyan sa banas padulong sa kabuhi nga wala’y katapusan.
Kita nga nagapamati kag nagalantaw sa mga mensahe sa pangkabilugan nga komperensya kon kaisa nagahunahuna pagkatapos, “Ano ang madumduman ko sing pinakamaayo?” Ang ginalauman sang Ginuo para sa tagsa sa aton amo nga ang aton sabat mangin: “Indi ko gid malipatan ang mga tinion sang akon mabatyagan ang tingug sang Espiritu sa akon hunahuna kag tagipusuon nga nagasiling sa akon kon ano ang akon mahimo agud mapalipay ang akon Amay nga Langitnon kag ang Manluluwas.”
Sarang naton mabaton inang personal nga bugna kon magpamati kita sa mga propeta kag mga apostoles kag kon magtinguha kita sa pagtuo nga mabaton ini, subong nga si Pangulong Lee nagsiling nga sarang naton ini mabaton. Nakahibalo ako nga matuod ina gikan sa eksperiyensia kag sa saksi sang Espiritu.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang First Presidency Message, April 2016. Hiligaynon. 12864 861
Pagtudlo gikan sa Sining Mensahe
Binagbinaga ang pagbasa sing mabaskog sang istorya ni Pangulong Eyring parte sa pagtuon sang draft sang pangkomperensya nga pamulong sang miyembro sang iya korum. Ayhan mamangkot kamo, “Ano ang bili sa pagbaton sang bugna?” Pagkatapos sang inyo paghinambalanay, sarang ninyo agdahon inang inyo ginabisita sa pagbinagbinag kag pag-implementar sang isa ka plano sa pagbaton sang mga mensahe sa ginapaabot nga pangkabilugan nga komperensya “sa idalom sang impluwensya sang amo man nga Espiritu sa diin ang ini ginhatag sa mga alagad sang [Dios].”