Cov Mus Saib Xyuas Tom Tsev tsab Xov, Plaub Hlis Ntuj 2016
Leej Txiv Saum Ntuj Ceeb Tsheej cov Ntxhais
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub “Tsev Neeg: Ib zaj Lus Tshaj Tawm rau lub Ntiaj Teb” yuav ua li cas kom koj txoj kev ntseeg Vajtswv loj zuj zus thiab foom koob hmoov rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Cov vaj lug kub qhia peb tias “peb yog Vajtswv cov me nyuam” (Tes Hauj Lwm 17:29). Vajtswv hais tias Emma Smith, tus Yaj Saub Yauxej Xamiv tus poj niam, yog Nws tus ntxhais (Q&K 25:1). Zaj lus tshaj tawm txog tsev neeg qhia peb tias peb txhua tus yog “ib tug … ntxhais ntsuj plig ntawm ib khub niam txiv saum ntuj ceeb tsheej.”1
Carole M. Stephens, tus pab cuam thib ib hauv Koom Haum Niam Tsev pawg tuam thawj tswj hwm, hais tias “Nyob saum ntuj, peb tau kawm txog qhov uas peb yog poj niam mus ib txhis li.
Peb txoj kev ua neej hauv lub ntiaj teb no tsis tau hloov tej qhov tseeb ntawd.”2
Txwj Laug Jeffrey R. Holland ntawm Pawg Kaum Ob tug Thwj Tim hais tias, “Nej Leej Txiv Saum Ntuj Ceeb Tsheej paub nej tej npe thiab paub nej raug xwm txheej dab tsi. Nws hnov nej tej lus thov. Nws paub nej tej kev cia siab thiab nej tej kev ua npau suav, tsis hais nej tej kev ntshai thiab tej kev poob siab los yog.”3
Muam Stephens hais tias, “Peb txhua tus koom nrog Vajtswv tsev neeg thiab Vajtswv xav tau peb. Tej tsev neeg hauv lub ntiaj teb nyias txawv nyias. Thiab txawm peb ua zoo npaum li peb ua tau kom muaj tsev neeg zoo li ib txwm muaj, qhov uas peb yog Vajtswv tsev neeg tsis nyob ntawm seb peb yog neeg zoo li cas—tsis hais peb yuav leej twg, peb puas yog niam tsev, peb muaj nyiaj npaum li cas, peb puas muaj npe, los sis peb sau dab tsi rau Internet.”4
Vaj Lug Kub Ntxiv
Yelemis 1:5; Loos 8:16; Lus Qhuab Qhia thiab Kev Khi Lus 76:23–24
Los ntawm Peb zaj Keeb Kwm
Thaum nws sau ntawv txog Thawj Zaj Ua Yog Toog Pom,5 tus Yaj Saub Yauxej Xamiv qhia ntau yam qhov tseeb—xws li qhov uas Leej Txiv Saum Ntuj Ceeb Tsheej paub peb tej npe.
Yauxej tsis tau paub tias nws yuav tsum koom lub koom txoos twg thiab nws nrhiav tau tej lus coj kev nyob hauv phau Yakaunpaus tshooj 1: Yauxej txiav txim siab tias nws yuav nug Vajtswv.
Muaj ib hnub sawv ntxov thaum lub caij nplooj ntoo hlav xyoo 1820, nws mus rau hauv koog ntoo thov Vajtswv tiam sis muaj ib lub hwj chim tsaus ntuj uas tsim txom nws. Nws sau txog lub sij hawm no hais tias:
“Thaum muaj kev nyuaj siab no, kuv txawm pom ib qho kaj nyob kiag saum kuv taub hau, ci ntsa iab tshaj lub hnub, qhov kaj nqi zuj zus txog thaum nws nyob ntawm kuv.
“Qhov kaj ntawd nyuam qhuav tawm los xwb ces kuv txawm pom tias kuv raug dim ntawm tus yeeb ncuab uas tau ntes kuv ntawd. Thaum qhov kaj txog ntawm kuv, kuv tau pom ob tug Neeg, uas ci ntsa iab thiab muaj yeeb koob uas kuv tsis paub piav txog, nkawd nyob saum ib nta ntuj. Ib tug hais lus rau kuv, tuav kuv lub npe thiab taw tes rau tus ntawd, ces tau hais tias—Nov yog Kuv tus Tub uas Kuv Hlub. Cia li mloog Nws lus!” (Yauxej Xamiv-Keeb Kwm 1:16–17).
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, April 2016. Hmong. 12864 295
Xav Txog Qhov No
Qhov uas koj paub tias koj yog Vajtswv ib tug ntxhais ua li cas rau koj txoj kev txiav txim siab?