Mensahe iti Visiting Teaching, Abril 2016
Dagiti Babbai nga Annak ti Agnanayon nga Ama
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti “Ti Kaamaan: Maysa a Waragawag iti Lubong” papigsaenna ti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion mapan iti reliefsociety.lds.org.
Pammati, Pamilia, Tulong
Isuro dagiti nasantuan a kasuratan nga “annaknatayo ti Dios” (Dagiti Aramid 17:29). Imbilang ti Dios ni Emma Smith, asawa ni Propeta Joseph Smith, nga “anakko a babai” (DkK 25:1). Ti waragawag ti kaamaan isuronatayo a tunggal maysa kadatayo ket “maipatpateg nga espiritu … nga annak a babbai dagiti nailangitan a nagannak.”1
“Iti pagarian iti [biag sakbay daytoy a biag], naadaltayo maipapan iti agnanayon a pakabigbigan ti kinababaitayo,” kinuna ni Carole M. Stephens, umuna a mammagbaga iti Relief Society general presidency.
“Ti panagdaliasattayo iti biag sakbay daytoy a biag nga umay iti daga ket saan a nangbaliw kadagita a kinapudno.”2
“Ammo ti Amayo iti Langit ti naganyo ken ammona ti kasasaadyo,” kinuna ni Elder Jeffrey R. Holland ti Korum dagiti Sangapulo-ket-dua nga Apostol. “Denggenna dagiti kararagtayo Ammona dagiti namnama ken arapaaptayo, agraman dagiti panagbuteng ken pannakapaaytayo.”3
“Tunggal maysa ket maibilangtayo ken masapuldatayo iti pamilia ti Dios,” kinuna ni Sister Stephens. “Saan nga agkakaasping ti amin a pamilia iti daga. Ken kabayatan ti panangaramidtayo iti amin a kabaelantayo a mangparnuay kadagiti napigsa a tradisional a pamilia, ti panagbalin a pamilia ti Dios ket saan a nga agpannuray iti ania man a kita ti kasasaad--kasasaad iti panagasawa, kasasaad iti panagbalin a nagannak, kasasaad iti pakaseknan iti kuarta, kasasaad iti kagimongan, wenno uray pay ti kita ti kasasaad nga ipostetayo iti social media.”4
Dagiti Mainayon a Nasantuan a Kasuratan
Jeremias 1:5; Taga-Roma 8:16; Doktrina ken Katulagan 76:23–24
Manipud iti Pakasaritaantayo
Iti pakaammuanna maipapan iti Umuna a Parmata,5 paneknekan ni Propeta Joseph Smith—agraman ti Nailangitan nga Amatayo nga ammona ti nagantayo.
Inkarigatan ni ubing a Joseph nga ammuen no ania a simbaan ti pagkamenganna ken nasarakanna ti pannarabay iti Santiago 1:5. Inggibus ni Joseph nga agsaludsod isuna iti Dios.
Maysa nga agsapa ti panagsusulbod idi 1820, napan isuna iti kakaykaywan tapno agkararag ngem kellaat a rimmimbaw kenkuana ti maysa a nangisit a bileg. Maipapan ti daytoy insuratna:
“Nakitak ti kasla adigi a lawag iti mismo a ngatuen ti ulok, a naranraniag pay ngem init, nga in-inut a nagpababa a nagdisso kaniak.
“Nasarakak ti bagik iti saan a nabayag a naisalakan manipud iti kabusor a nanglapped kaniak. Nakitak ti dua a Kinatao idi agdisso ti lawag kaniak, nga artapan ti lawag ken tan-okda ti amin a panangiladawan, a nagtakder iti angin iti ngatuek. Maysa kadakuada ti nagsao kaniak, nga inawagannak iti naganko, ket kinunana, intudona ti kaduana—Daytoy ti Ay-ayatek nga Anakko. Dumngegka Kenkuana!” (Joseph Smith—Pakasaritaan 1:16–17).
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, April 2016. Ilokano. 12864 864
Ibilang Daytoy
Kasano a ti panangammom a sika ket anak a babai ti Dios ket mangaring kadagiti pangngeddengmo?