Mensahe ti Umuna a Panguluen, Abril 2016
Padto ken Bukod a Paltiing
Ni Presidente Henry B. Eyring
Umuna a Mammagbaga iti Umuna a Panguluen
Ti pudno a Simbaan ni Jesucristo ket naisublin ken adda iti daga iti agdama. Ti Simbaan ni Jesucristo dagiti Santo iti Ud-udina nga Aldaw ket kanayon nga idadauluan dagiti sibibiag a propeta ken apostol, nga umaw-awat iti agtultuloy a pannarabay manipud iti langit.
Pudno pay dayta a nadiosan a pagtuladan idi ugma. Maadaltayo iti Biblia: “Kinapudnona, awanto ti aramiden ni Apo Jehova a dinto maipalgak ti palimedna kadagiti adipenna dagiti mammadto” (Amos 3:7).
Nagsao manen ti Dios iti panawentayo, babaen ken ni Propeta Joseph Smith. Impalgakna babaen ken ni Propeta Joseph ti ebanghelio ni Jesucristo iti pakabuklanna. Insublina ti nasantuan a priesthoodna nga addaan kadagiti tulbek ken amin a kalintegan, bileg, ken dagiti pagpaayan ti sagrado a bileg ti priesthood.
Iti panawentayo, napusgan dagiti sibibiag a propeta ken apostol nga agsarita, mangisuro, ken mangiturong nga addaan iti awtoridad manipud iti Dios Ama ken ni Apo Jesucristo. Kinuna ti Mangisalakan iti Propeta, “Siak nga Apo, ania man a nasaok, nasaokon, ket saanko nga ilaksid ti bagik; ket uray no awanton ti langit ken ti daga, saanto a mapukaw ti balikasko, ngem matungpaldanto amin, babaen man ti timekko wenno babaen ti timek dagiti katulongak, isu la nga isu” (DkK 1:38).
Kadagiti sapasap a komperensia iti mamindua iti makatawen, naparaburantayo iti gundaway a dumngeg iti balikas ti Dios nga agpaay kadatayo manipud kadagiti katulonganna. Dayta ti maysa a pribilehio a saan a magatadan ti pategna. Ngem ti pateg dayta a gundaway ket agpannuray iti no awatentayo met laeng dagiti balikas iti babaen ti impluensia ti isu met laeng nga Espiritu a nakaitedan dagitoy dagiti katulongan (DkK 50:19–22). Kas iti yaawatda iti pannarabay manipud iti langit, isu a nasken a kastatayo koma met. Ket kasapulan pay ti isu met laeng a naespirituan a panagaramidtayo.
“Aramidenyo ti Naituding nga Aramidenyo”
Adun a tawen ti napalabas maysa kadagiti miembro ti Korum dagiti Sangapulo-ket-dua nga Apostol ti nagkiddaw kaniak a mangbasa iti maysa a bitla ti kumperensia nga insaganana para iti sapasap a kumperensia. Maysaak idi a junior a miembro ti korum. Napadayawanak iti panagtalekna a makatulongak kenkuana a mangsapul kadagiti balikas a kayat ti Apo nga isaona. Kinunana kaniak nga umis-isem, “A, daytoy ti maika-22 a draft ti bitlak.”
Malagipko ti balakad ti managayat ken nasingpet a Presidente Harold B. Lee (1899–1973) a damo nga intedna kaniak nga addaan iti dakkel a panangyunay-unay: “Hal, no kayatmo ti umawat iti paltiing, aramidem ti naituding nga aramidem.”
Binasak, inutobko a nasayaat, ken inkararagak dayta a maika-22 a draft. Inadalko iti amin a kabaelak babaen ti impluensia ti Espiritu Santo. Iti kanito nga inted ti miembro ti korum ti bitlana, nalpaskon ti naituding nga aramidek. Diak sigurado no nakatulongak, ngem ammok a nagbalbaliwak idi mangngegak ti bitla a naited. Immay kaniak dagiti mensahe a nangnangruna pay a balikas ngem iti nabasakon ken nagsarita isuna. Addaan dagiti balikas iti dakdakkel a kaipapanan ngem dagiti binasakon iti draft. Ken kasla nairanta a para kaniak ti mensahe, a maitutop kadagiti kasapulak.
Nagayuno ken nagkararag dagiti katulongan ti Dios tapno awatenda ti mensahena nga itedda kadagiti agkasapulan iti paltiing ken pammaregta. Ti naadalko iti dayta a padas, a nagustuan dagiti adu a dadduma pay, ket magun-od dagiti naindaklan a pagsayaatan a sidadaan manipud iti idedengngeg kadagiti sibibiag a propeta ken apostol, nasken a bayadantayo mismo ti pateg ti panangawat iti paltiing.
Patpatgen ti Apo ti tunggal tao a mabalin a dumngeg iti mensahena, ken ammona ti puspuso ken kasasaad ti tunggal maysa. Ammona no ania a panagatur, ania a panangallukoy, ken no ania a kinapudno ti ebanghelio ti kasayaatan a makatulong iti tunggal tao a mangpili ti dalanna nga agturong iti dana iti agnanayon a biag.
Datayo a dumngeg ken mangbuya kadagiti mensahe ti sapasap a kumperensia ket agpanunot no dadduma kalpasanna, “Ania ti kasayaatan a malagipko?” Namnamaen ti Apo iti tunggal maysa kadatayo a daytoyto ti sungbattayo: “Diakto kaano man malipatan dagiti kanito idi mariknak ti timek ti Espiritu iti panunotko ken iti pusok a mangibagbaga kaniak no ania ti maaramidko tapno mapagustuak ti Nailangitan nga Amak ken ti Mangisalakanko.”
Maawattayo dayta a bukod a paltiing no dumngegtayo kadagiti propeta ken apostol ken no agtrabahotayo a sipapammati tapno umawat iti daytoy, kas iti kinuna ni Presidente Lee a kabaelantayo. Ammok a pudno dayta manipud iti padas ken babaen ti saksi ti Espiritu.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, April 2016. Ilokano. 12864 864
Panangisuro manipud iti daytoy a mensahe
Ibilang ti panangbasa iti napigsa iti sarita ni Presidente Eyring maipapan ti panangadalna iti draft ti bitla iti komperensia ti miembro ti korumna. Mabalin a saludsodenyo, “Ania ti pateg ti panangawat iti paltiing?” Kalpasan ti paglilinnawaganyo, mabalin nga awisenyo dagiti sarungkaranyo a mangutob ken mangaramid iti plano nga umawat kadagiti umadani a mesahe iti sapasap a komperensia “babaen ti impluensia ti isu met la nga Espiritu a nakaitedan dagitoy kadagiti katulongan ti [Dios}.”