ຂ່າວສານຈາກຝ່າຍປະທານສູງສຸດ, ເດືອນເມສາ 2016
ການທຳນາຍ ແລະ ການເປີດເຜີຍສ່ວນຕົວ
ໂດຍ ປະທານເຮັນຣີ ບີ ໄອຣິງ
ທີ່ປຶກສາທີໜຶ່ງໃນຝ່າຍປະທານສູງສຸດ
ສາດສະໜາຈັກທີ່ແທ້ຈິງຂອງພຣະເຢຊູຄຣິດ ໄດ້ຖືກຟື້ນຟູຄືນມາໃໝ່ ແລະ ຕັ້ງຢູ່ເທິງແຜ່ນດິນໂລກໃນທຸກວັນນີ້. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຖືກນຳພາໂດຍສາດສະດາ ແລະ ອັກຄະສາວົກມາຕະຫລອດ, ຜູ້ໄດ້ຮັບການຊີ້ນຳຈາກສະຫວັນຢູ່ສະເໝີ.
ແບບແຜນແຫ່ງສະຫວັນນັ້ນ ກໍໄດ້ເປັນຄວາມຈິງໃນສະໄໝບູຮານຄືກັນ. ເຮົາອ່ານຢູ່ໃນພຣະຄຣິດຕະທຳຄຳພີວ່າ: “ແນ່ນອນ ອົງພຣະຜູ້ເປັນເຈົ້າ ບໍ່ໄດ້ເຮັດສິ່ງໃດ ໂດຍບໍ່ບອກແຈ້ງໃຫ້ຮູ້ລ່ວງໜ້າ ເຖິງແຜນການຂອງພຣະອົງແກ່ຜູ້ທຳນາຍ ຄືຜູ້ຮັບໃຊ້ຂອງພຣະອົງ” (ອາໂມດ 3:7).
ພຣະເຈົ້າໄດ້ກ່າວໃນວັນເວລາຂອງເຮົາອີກ, ຜ່ານທາງສາດສະດາໂຈເຊັບ ສະມິດ. ພຣະອົງໄດ້ເປີດເຜີຍພຣະກິດຕິຄຸນຂອງພຣະເຢຊູຄຣິດ ໃນຄວາມສົມບູນຂອງມັນ ຜ່ານທາງສາດສະດາໂຈເຊັບ. ພຣະອົງໄດ້ຟື້ນຟູຖານະປະໂລຫິດທີ່ສັກສິດຂອງພຣະອົງ ພ້ອມດ້ວຍຂໍກະແຈ ແລະ ສິດ, ອຳນາດ, ແລະ ໜ້າທີ່ທັງໝົດຂອງອຳນາດທີ່ສັກສິດ ຂອງຖານະປະໂລຫິດ.
ໃນວັນເວລາຂອງເຮົາ, ສາດສະດາ ແລະ ອັກຄະວົສາກທີ່ມີຊີວິດຢູ່ ໄດ້ຮັບສິດອຳນາດ ທີ່ຈະກ່າວ, ສອນ, ແລະ ຊີ້ນຳ ດ້ວຍສິດອຳນາດຈາກພຣະເຈົ້າ ອົງເປັນພຣະບິດາ ແລະ ອົງພຣະເຢຊູຄຣິດເຈົ້າ. ພຣະຜູ້ຊ່ອຍໃຫ້ລອດໄດ້ກ່າວຕໍ່ສາດສະດາວ່າ ສິ່ງທີ່ພຣະຜູ້ເປັນເຈົ້າໄດ້ກ່າວ, ພຣະອົງໄດ້ກ່າວ, ແລະ ພຣະອົງບໍ່ແກ້ຕົວ, ແລະ ເຖິງແມ່ນຟ້າສະຫວັນ ແລະ ແຜ່ນດິນໂລກຈະສູນສິ້ນໄປ, ຄຳຂອງພຣະອົງຈະບໍ່ສູນສິ້ນໄປ, ແຕ່ທຸກສິ່ງຈະເກີດເປັນຈິງ, ບໍ່ວ່າຈະເປັນໂດຍສຸລະສຽງຂອງພຣະອົງເອງ ຫລື ໂດຍສຽງຂອງຜູ້ຮັບໃຊ້ຂອງພຣະອົງ, ມັນກໍເໝືອນກັນ (ເບິ່ງ D&C 1:38).
ໃນກອງປະຊຸມໃຫຍ່ສາມັນປີລະສອງເທື່ອ, ເຮົາໄດ້ຮັບພອນທີ່ມີໂອກາດ ໄດ້ຮັບຟັງພຣະຄຳຂອງພຣະຜູ້ເປັນເຈົ້າ ທີ່ມອບໃຫ້ເຮົາ ຈາກຜູ້ຮັບໃຊ້ຂອງພຣະອົງ. ນັ້ນຄືສິດທິພິເສດເກີນກວ່າຈະວັດຄ່າໄດ້. ແຕ່ຄຸນຄ່າຂອງໂອກາດນັ້ນ ແມ່ນຂຶ້ນກັບວ່າເຮົາໄດ້ຮັບພຣະຄຳພາຍໃຕ້ອິດທິພົນຂອງພຣະວິນຍານອົງດຽວກັນນັ້ນຫລືບໍ່ ຊຶ່ງໄດ້ຖືກມອບໃຫ້ຜູ້ຮັບໃຊ້ເຫລົ່ານັ້ນ (ເບິ່ງ D&C 50:19–22). ເຊັ່ນດຽວກັບທີ່ພວກເພິ່ນໄດ້ຮັບການຊີ້ນຳຈາກສະຫວັນ, ເຮົາກໍຄວນໄດ້ຮັບການຊີ້ນຳຄືກັນ. ສິ່ງນັ້ນຮຽກຮ້ອງເຮົາໃຫ້ມີຄວາມພະຍາຍາມທາງວິນຍານອັນດຽວກັນນັ້ນດ້ວຍ.
“ເຮັດການບ້ານຂອງເຈົ້າ”
ເມື່ອຫລາຍປີກ່ອນ ສະມາຊິກຄົນໜຶ່ງແຫ່ງກຸ່ມອັກຄະສາວົກສິບສອງ ໄດ້ຂໍໃຫ້ຂ້າພະເຈົ້າອ່ານຂ່າວສານຂອງກອງປະຊຸມໃຫຍ່ ທີ່ເພິ່ນກຳລັງຕຽມສຳລັບກອງປະຊຸມໃຫຍ່ສາມັນ. ຂ້າພະເຈົ້າໄດ້ເປັນສະມາຊິກລຸ້ນນ້ອງຂອງກຸ່ມ. ຂ້າພະເຈົ້າໄດ້ຮັບກຽດຫລາຍ ດ້ວຍຄວາມໝັ້ນໃຈຂອງເພິ່ນ ທີ່ຈະໃຫ້ຂ້າພະເຈົ້າຊ່ອຍຊອກຫາພຣະຄຳຂອງພຣະຜູ້ເປັນເຈົ້າ ເພື່ອໃຫ້ເພິ່ນກ່າວ. ເພິ່ນໄດ້ກ່າວກັບຂ້າພະເຈົ້າດ້ວຍຮອຍຍິ້ມວ່າ, “ໂອ້, ອັນນີ້ ເປັນຕົ້ນຮ່າງສະບັບທີ 22 ແລ້ວ.”
ຂ້າພະເຈົ້າຍັງຈື່ຄຳແນະນຳຂອງປະທານແຮໂຣນ ບີ ລີ (1899–1973) ທີ່ມີຄວາມຮັກ ແລະ ມີເມດຕາ ຊຶ່ງໄດ້ມອບໃຫ້ຂ້າພະເຈົ້າກ່ອນໜ້ານັ້ນ ດ້ວຍຄວາມໜັກແໜ້ນວ່າ: “ຮາວ, ຖ້າຫາກເຈົ້າຢາກໄດ້ຮັບການເປີດເຜີຍ, ເຈົ້າຕ້ອງເຮັດການບ້ານຂອງເຈົ້າ.”
ຂ້າພະເຈົ້າໄດ້ອ່ານ, ໄດ້ໄຕ່ຕອງ, ແລະ ໄດ້ອະທິຖານ ກ່ຽວກັບຕົ້ນຮ່າງສະບັບທີ 22 ເທື່ອແລ້ວນັ້ນ. ຂ້າພະເຈົ້າໄດ້ສຶກສາເທົ່າທີ່ຂ້າພະເຈົ້າສາມາດເຮັດໄດ້ ພາຍໃຕ້ອິດທິພົນຂອງພຣະວິນຍານບໍລິສຸດ. ເມື່ອເຖິງເວລາສະມາຊິກຂອງກຸ່ມຄົນນັ້ນ ໄດ້ກ່າວປາໄສ, ຂ້າພະເຈົ້າກໍໄດ້ເຮັດການບ້ານຂອງຂ້າພະເຈົ້າແລ້ວ. ຂ້າພະເຈົ້າບໍ່ແນ່ໃຈວ່າ ຂ້າພະເຈົ້າໄດ້ຊ່ອຍຫຍັງຫລືບໍ່, ແຕ່ຂ້າພະເຈົ້າຮູ້ວ່າ ຂ້າພະເຈົ້າໄດ້ປ່ຽນໄປ ເມື່ອຂ້າພະເຈົ້າໄດ້ຍິນຄຳປາໄສນັ້ນ. ຂ່າວສານໄດ້ມາເຖິງຂ້າພະເຈົ້າເກີນກວ່າຖ້ອຍຄຳທີ່ຂ້າພະເຈົ້າໄດ້ອ່ານ ແລະ ສິ່ງທີ່ເພິ່ນໄດ້ກ່າວ. ຖ້ອຍຄຳເຫລົ່ານັ້ນມີຄວາມໝາຍຫລາຍກວ່າຖ້ອຍຄຳທີ່ຂ້າພະເຈົ້າໄດ້ອ່ານ ໃນຕົ້ນຮ່າງ. ແລະ ເບິ່ງຄືວ່າ ຂ່າວສານນັ້ນ ແມ່ນສຳລັບຂ້າພະເຈົ້າ, ເໝາະກັບຄວາມຕ້ອງການຂອງຂ້າພະເຈົ້າພໍດີ.
ຜູ້ຮັບໃຊ້ຂອງພຣະເຈົ້າ ຖືສິນອົດເຂົ້າ ແລະ ອະທິຖານ ເພື່ອຈະໄດ້ຮັບຂ່າວສານ ທີ່ພຣະອົງມີສຳລັບພວກເພິ່ນ ເພື່ອມອບໃຫ້ແກ່ຜູ້ທີ່ຕ້ອງການການເປີດເຜີຍ ແລະ ການດົນໃຈ. ສິ່ງທີ່ຂ້າພະເຈົ້າໄດ້ຮຽນຮູ້ຈາກປະສົບການນັ້ນ, ແລະ ຈາກຫລາຍໆປະສົບການທີ່ເໝືອນກັນນັ້ນ, ຄື ກ່ອນທີ່ຈະໄດ້ຮັບຜົນປະໂຫຍດຢ່າງຫລວງຫລາຍ ທີ່ມີໃຫ້ ຈາກຖ້ອຍຄຳຂອງສາດສະດາ ແລະ ອັກຄະສາວົກທີ່ມີຊີວິດຢູ່, ເຮົາເອງຕ້ອງຈ່າຍຄ່າເພື່ອຈະໄດ້ຮັບການເປີດເຜີຍນັ້ນ.
ພຣະຜູ້ເປັນເຈົ້າຮັກທຸກຄົນ ຜູ້ທີ່ຈະຟັງຂ່າວສານຂອງພຣະອົງ, ແລະ ພຣະອົງຮູ້ໃຈ ແລະ ຮູ້ຈັກສະພາບການຂອງແຕ່ລະຄົນ. ພຣະອົງຮູ້ຈັກແກ້ໄຂ, ຮູ້ຈັກໃຫ້ກຳລັງໃຈ, ແລະ ຮູ້ຈັກຄວາມຈິງຂອງພຣະກິດຕິຄຸນ ອັນທີ່ເໝາະສົມທີ່ສຸດ ທີ່ຈະຊ່ອຍບຸກຄົນໃຫ້ເລືອກວິທີຂອງຕົນ ໃນເສັ້ນທາງທີ່ນຳໄປສູ່ຊີວິດນິລັນດອນ.
ເຮົາຜູ້ຟັງ ແລະ ເບິ່ງຂ່າວສານຂອງກອງປະຊຸມໃຫຍ່ສາມັນ ບາງເທື່ອຈະຄິດທີຫລັງວ່າ, “ເຮົາຈື່ຫຍັງໄດ້ຫລາຍທີ່ສຸດ?” ຄວາມຫວັງຂອງພຣະຜູ້ເປັນເຈົ້າສຳລັບເຮົາແຕ່ລະຄົນແມ່ນຄຳຕອບຂອງເຮົາຈະເປັນວ່າ: “ຂ້າພະເຈົ້າບໍ່ເຄີຍລືມຕອນທີ່ຂ້າພະເຈົ້າຮູ້ສຶກໄດ້ຍິນສຸລະສຽງຂອງພຣະວິນຍານຢູ່ໃນຄວາມຄິດ ແລະ ໃນໃຈ ບອກຂ້າພະເຈົ້າ ເຖິງສິ່ງທີ່ຂ້າພະເຈົ້າສາມາດເຮັດ ເພື່ອໃຫ້ພຣະບິດາເທິງສະຫວັນ ແລະ ພຣະຜູ້ຊ່ອຍໃຫ້ລອດພໍພຣະໄທ.”
ເຮົາສາມາດໄດ້ຮັບການເປີດເຜີຍສ່ວນຕົວນັ້ນໄດ້ ເມື່ອເຮົາໄດ້ຍິນສາດສະດາ ແລະ ອັກຄະສາວົກ ແລະ ເມື່ອເຮົາທຳງານດ້ວຍສັດທາ ທີ່ຈະຮັບເອົາການເປີດເຜີຍນັ້ນ, ດັ່ງທີ່ປະທານລີໄດ້ກ່າວວ່າ ເຮົາສາມາດ. ຂ້າພະເຈົ້າຮູ້ວ່າ ມັນເປັນຄວາມຈິງ ຈາກປະສົບການ ແລະ ໂດຍປະຈັກພະຍານຂອງພຣະວິນຍານ.
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ First Presidency Message, April 2016. Laotian. 12864 331
ການສອນຈາກຂ່າວສານນີ້
ໃຫ້ອ່ານເລື່ອງລາວຂອງປະທານໄອຣິງ ກ່ຽວກັບການສຶກສາບົດປາໄສ ສຳລັບກອງປະຊຸມໃຫຍ່ຂອງສະມາຊິກຄົນໜຶ່ງ ໃນກຸ່ມຂອງເພິ່ນ. ທ່ານອາດຖາມວ່າ, “ແມ່ນຫຍັງຄືຄ່າຂອງການຮັບການເປີດເຜີຍ?” ຫລັງຈາກການສົນທະນາຂອງທ່ານ, ທ່ານສາມາດເຊື້ອເຊີນຄົນທີ່ທ່ານໄປຢ້ຽມຢາມ ໃຫ້ໄຕ່ຕອງ ແລະ ເລີ່ມຕົ້ນວາງແຜນທີ່ຈະຮັບເອົາຂ່າວສານຈາກກອງປະຊຸມໃຫຍ່ສາມັນ “ພາຍໃຕ້ອິດທິພົນຂອງພຣະວິນຍານດຽວກັນນັ້ນ ຊຶ່ງໄດ້ຖືກມອບໃຫ້ຜູ້ຮັບໃຊ້ [ຂອງພຣະເຈົ້າ].”