ຂ່າວສານການຢ້ຽມສອນ, ເດືອນເມສາ 2016

ທິດາຂອງພຣະບິດາຜູ້ສະຖິດນິລັນດອນຂອງເຮົາ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລຜ່ານການຢ້ຽມສອນໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.

ສັດທາ, ຄອບຄົວ, ສົງເຄາະ

ພຣະຄຳພີສອນເຮົາວ່າ “ເຮົາເປັນລູກໆຂອງພຣະເຈົ້າ” (ກິດຈະການ 17:29). ພຣະເຈົ້າໄດ້ກ່າວເຖິງ ເອມມາ ສະມິດ, ພັນລະຍາຂອງສາດສະດາ ໂຈເຊັບ ສະມິດ, ວ່າເປັນ ທິດາຂອງພຣະອົງ (ເບິ່ງD&C 25:1). ໃບປະກາດກ່ຽວກັບຄອບຄົວ ສອນເຮົາວ່າ ເຮົາແຕ່ລະຄົນ “ເປັນທິດາທາງວິນຍານ ທີ່ຮັກຫອມ … ຂອງພຣະບິດາມານດາແຫ່ງສະຫວັນ.”¹

ໃນໂລກ [ກ່ອນມະຕະ], ເຮົາໄດ້ຮຽນຮູ້ເຖິງເອກະລັກ ນິລັນດອນຂອງການເປັນຜູ້ຍິງ,” ແຄໂຣ ເອັມ ສະຕີບເວັນສ໌, ທີ່ປຶກສາທີໜຶ່ງໃນຝ່າຍປະທານສະມາຄົມສະຕີສົງເຄາະສາມັນ ໄດ້ກ່າວ.

“ການເດີນທາງຂອງເຮົາມາສູ່ໂລກມະຕະ ບໍ່ໄດ້ປ່ຽນແປງຄວາມຈິງດັ່ງກ່າວ.”²

“ພຣະບິດາຜູ້ສະຖິດຢູ່ໃນສະຫວັນຂອງທ່ານ ຮູ້ຈັກຊື່ຂອງທ່ານ ແລະ ຮູ້ຈັກສະພາບການຂອງທ່ານ,” ແອວເດີ ແຈັບຟະຣີ ອາ ຮໍແລນ ແຫ່ງກຸ່ມອັກຄະສາວົກສິບສອງ ໄດ້ກ່າວ. “ພຣະອົງໄດ້ຍິນຄຳອະທິຖານຂອງທ່ານ. ພຣະອົງຮູ້ຈັກຄວາມຫວັງ ແລະ ຄວາມຝັນຂອງທ່ານ, ຮ່ວມທັງ ຄວາມຢ້ານກົວ ແລະ ຄວາມຜິດຫວັງຂອງທ່ານ.”³

“ເຮົາແຕ່ລະຄົນເປັນສະມາຊິກ ແລະ ມີຄວາມສຳຄັນໃນຄອບຄົວຂອງພຣະເຈົ້າ” ຊິດສະເຕີ ສະຕີບເວັນສ໌ ໄດ້ກ່າວ. “ຄອບຄົວຢູ່ໃນໂລກ ແມ່ນແຕກຕ່າງກັນ. ໃນຂະນະທີ່ເຮົາພະຍາຍາມເຮັດໃຫ້ດີທີ່ສຸດ ທີ່ເຮົາຈະສາມາດເຮັດໄດ້ ເພື່ອສ້າງປະເພນີຂອງຄອບຄົວທີ່ເຂັ້ມແຂງ, ການເປັນສະມາຊິກໃນຄອບຄົວຂອງພຣະເຈົ້າ ບໍ່ໄດ້ຂຶ້ນຢູ່ກັບສະຖານະພາບໃດໆ—ສະຖານະການແຕ່ງງານ, ສະຖານະການເປັນພໍ່ແມ່, ສະຖານະເລື່ອງການເງິນ, ສະຖານະເລື່ອງສັງຄົມ, ຫລື ແມ່ນແຕ່ສະຖານະທີ່ເຮົາບອກຢູ່ໃນສື່ສານມວນຊົນ.”⁴

ຂໍ້ພຣະຄຳພີເພີ່ມເຕີມ

ເຢເຣມີຢາ 1:5; ໂຣມ 8:16; Doctrine and Covenants 76:23–24

ຈາກປະຫວັດສາດຂອງເຮົາ

ໃນເລື່ອງລາວຂອງເພິ່ນ ກ່ຽວກັບພາບທີ່ມາໃຫ້ເຫັນຄັ້ງທຳອິດ,⁵ ສາດສະດາໂຈເຊັບ ສະມິດ ໄດ້ເປັນພະຍານເຖິງຄວາມຈິງຫລາຍຢ່າງ—ຮ່ວມທັງ ການທີ່ພຣະບິດາເທິງສະຫວັນ ຮູ້ຈັກຊື່ຂອງເຮົາ.

ຊາຍໜຸ່ມໂຈເຊັບໄດ້ດີ້ນລົນ ເພື່ອຢາກຮູ້ວ່າ ເພິ່ນຄວນເຂົ້າຮ່ວມສາດສະໜາຈັກແຫ່ງໃດ ແລະ ກໍໄດ້ຮັບການຊີ້ນຳ ໃນ ຢາໂກໂບ 1:5. ໂຈເຊັບໄດ້ຕັດສິນໃຈວ່າ ເພິ່ນຈະທູນຖາມພຣະເຈົ້າ.

ໃນເຊົ້າຂອງລະດູໃບໄມ້ປົ່ງ ໃນປີ 1820, ເພິ່ນໄດ້ເຂົ້າໄປໃນປ່າ ເພື່ອອະທິຖານ ແຕ່ໃນທັນໃດນັ້ນ ເພິ່ນໄດ້ຖືກຄອບງຳໂດຍອຳນາດມືດ. ເພິ່ນໄດ້ຂຽນກ່ຽວກັບເລື່ອງນີ້ວ່າ:

“ຂ້າພະເຈົ້າໄດ້ເຫັນແສງສະຫວ່າງເປັນເລົາລົງມາ, ແຈ້ງກວ່າຄວາມສະຫວ່າງຂອງດວງຕາເວັນ, ຊຶ່ງຄ່ອຍໆເລື່ອນລົງມາຈົນເຖິງຕົວຂອງຂ້າພະເຈົ້າ.

“ໃນທັນທີທີ່ແສງສະຫວ່າງນີ້ປາກົດຂຶ້ນ, ຂ້າພະເຈົ້າຮູ້ສຶກຕົວວ່າ ໄດ້ລຸດພົ້ນຈາກສັດຕູທີ່ຍຶດຂ້າພະເຈົ້າໄວ້. ເມື່ອແສງນັ້ນລົງມາເຖິງຂ້າພະເຈົ້າ, ຂ້າພະເຈົ້າໄດ້ເຫັນສອງພຣະອົງປະທັບຢືນຢູ່ໃນອາກາດ, ຊື່ຫົວຂອງຂ້າພະເຈົ້າ. ອົງໜຶ່ງໄດ້ຮັບສັ່ງກັບຂ້າພະເຈົ້າ, ໂດຍເອີ້ນຊື່ຂອງຂ້າພະເຈົ້າ ແລະ ຊີ້ພຣະຫັດໄປຫາອີກອົງໜຶ່ງ ແລະ ກ່າວວ່າ—ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!” (Joseph Smith—History 1:16–17).

© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, April 2016. Laotian. 12864 331

ໃຫ້ພິຈາລະນາສິ່ງນີ້

ການທີ່ຮູ້ຈັກວ່າ ທ່ານເປັນທິດາຂອງພຣະເຈົ້າ ມີຜົນຕໍ່ການຕັດສິນໃຈຂອງທ່ານແນວໃດ?