Yut

Stap Tru long Fet blong Olgeta

Presiden Monson i talem stori blong wan paeonia famli, mo afta, i talemaot toktok blong Presiden Joj Albet Smit: “?Bambae yufala i stap laef long wan tru fasin folem fet blong ol bubu blong yufala? … Traehad blong stap klin inaf from evri sakrifaes we [olgeta] i bin mekem from yu.” I nomata se yu gat ol bubu we oli ol paeonia o yu yu faswan long jeneresen blong yu blong kam memba long Jos, ?yu stap lukluk long ol eksampol blong fet blong gaedem mo givim yu paoa? Hemia wan gudfala fasin blong yu save statem:

1. Mekem wan lis blong ol pipol we yu laekem. I save ol memba blong famli blong yu (bifo o naoia), ol fren. ol Jos lida, o ol pipol insaed long skripja.

2 Raetem daon ol fasin we oli gat we yu laekem. ?Mama blong yu i gat fasin blong save wet longtaem? Ating fren blong yu i kaen long ol narafala man. Ating yu lavem fasin blong Kapten Moronae blong gat strong paoa long tingting.

3. Jusum wan fasin long lis blong yu mo askem yuwan: ?Olsem wanem nao mi save gat fasin ia? ?Wanem nao mi nid blong mekem blong bildimap fasin ia long laef blong mi?”

4. Raetem daon ol plan blong yu blong bildimap fasin ia mo putum long wan ples we bae yu save luk oltaem, blong stap mekem yu tingbaot gol blong yu. Prea from help blong Papa long Heven mo jekem oltaem spos yu stap muv i go fored. Taem yu filim se yu bin bildimap gud fasin ia finis, yu save jusum wan niufala fasin bakegen blong wok blong hem

Tingbaot se taem yumi stap bildimap ol bigfala fasin ia insaed long yumiwan, yumi stap givim ona long fet blong ol bubu blong yumi, be tu, ol sakrifaes we oli bin mekem, be yumi tu i save stap olsem wan gudfala eksampol long olgeta raon long yumi.