Fas Presidensi Mesej, Julae 2016
Stap tru long Fet blong Ol Papa we Oli Go Fastaem
I Kam long Presiden Tomas S. Monson
Jon Linfod i gat 43 yia taem hem mo waef blong hem, Maria, mo trifala boe blong tufala i mekem tingting blong lego hom blong olgeta long Grevli, Ingland, mo travel longfala rod blong joenem ol Sent long vali blong Bigfala Sol Lek. Oli bin livim biaen nambafo boe blong tufala, we i bin stap long misin; tufala i salemaot evri samting we tufala i gat, mo faenem wan rod i go long Livapul long sip Thornton.
Long rod blong olgeta long solwota i go kasem Niu Yok, mo afta, rod blong olgeta long graon kasem Aeowa, i no bin gat plante samting i hapen. Be, ol trabol oli stat, sot taem nomo afta we ol Linfod mo ol narafala Lata-dei Sent we oli bin sel tugeta long Thornton oli lego Aeowa Siti long 15 Julae 1856, olsem pat blong hankat kampani blong Jems G. Willie
Nogud weta mo ol rabis rod i spolem plante insaed long kampani, mo i spolem Jon tu. I kam we hem i bin sik tumas mo i nomo gat paoa mekem se oli mas pulum hem insaed long wan hankat. Taem kampani i kasem Waeoming, helt blong hem i kam nogud moa. Wan reskiu tim blong Sol Lek Siti i bin kasem olgeta long 21 Oktoba, sam aoa nomo afta we wokbaot blong Jon long wol ia i bin en. Hem i bin ded eli long moning ia, kolosap long Switwota Riva.
?Jon i bin sori se hem i mas givimaot kamfot mo ol gud taem blong kasem ol hadtaem ia blong karem famli blong hem i go long Saeon?
“No, Maria,” hem i bin talem long waef blong hem bifo hem i ded. “Mi glad se yumi kam. Bambae mi mi no save kasem Sol Lek, be yu wetem ol boe bae i kasem, mo mi no harem nogud from ol samting we yumi bin go tru long hem blong mekem se ol boe blong yumitu oli save groap mo lukaotem ol famli blong olgeta long Saeon.”1
Maria wetem ol boe blong hem i kasem en blong rod blong olgeta. Taem Maria i ded kolosap 30 yia afta, hem wetem Jon i bin livim biaen wan histri blong ol fasin blong fet, blong givim seves, blong givim evri samting, mo blong mekem sakrifaes.
Blong stap wan Lata-dei Sent hem i blong stap wan paeonia, from se mining blong paeonia hem i “wan we i go fastem blong rere o openem rod blong ol narafala oli folem.”2 Mo blong kam wan paeonia hem i blong save gud wanem ia sakrifaes. I nomata se naoia oli nomo askem ol memba blong livim ol hom blong olgeta mo tekem rod i go long Saeon, plante taem bae oli mas livim biaen ol olfala fasin, ol kastom we oli bin stap wetem olgeta blong longtaem, mo ol fren we oli laekem tumas. Samfala oli mekem ol desisen we i had tumas blong livim biaen ol memba blong famli we oli agensem olgeta blong kam memba blong Jos. Ol Lata-dei Sent oli muv i go fored, be, wetem prea se bae olgeta ia, we oli lavem tumas, bae oli save kam blong andastan mo akseptem.
Rod blong wan paeonia i no isi, be yumi stap folem ol futstep blong stret Paeonia—iven Sevya—we i bin go fastaem, soemaot rod long yumi blong folem
“Kam, folem mi,”3 Hem i talem.
Hem i talem se: “Mi nao rod ya, mo mi mi stamba blong trutok, mo mi stamba blong laef.”4
“Kam long mi,”5 Hem i singaot.
Rod ia i no isi. Samfala i faenem se i had tumas blong stanap agensem ol nogud toktok blong ol krangke man we oli stap jikim fasin blong jastiti, stap ones, mo stap obei long ol komanmen blong God Wol i daonem bigwan tingting blong stap folem ol prinsipol ia. Taem Noa i bin karem instraksen blong bildim wan ak, ol krangke man oli bin lukluk i go antap long skae be i nogat klaod mo oli bin stap laf mo jik—kasem we ren i bin kam.
Long bigfala graon blong Amerika plante handred yia i bin pas, ol pipol oli bin stap gat tu tingting. oli bin stap raorao, mo oli no bin stap obei, kasem we faea i kakae Sarahemla, graon i kavremap Moronaea, mo wota i solem daon Moronae. I nomo gat tok nogud, jik, laflaf mo sin. Bigfala kwaet mo tudak i bin tekem ples. God i nomo gat fasin blong wet longtaem, hem i taem we Hem i mas fiulfilim toktok blong Hem.
Maria Linfod i neva lusum fet blong hem nomata ol hadtaem long Inglan, ol hadtaem long rod blong hem i go long “ples we God … i bin rere long hem,”6 mo ol plante tes we hem i bin go tru long hem from famli blong hem mo Jos.
Long 1937 oli bin mekem seremoni blong dediketem gref i go blong tingbaot Maria, Elda Joj Albet Smit i bin askem long ol laen blong hem: “?Bambae yufala i stap laef long wan tru fasin folem fet blong ol bubu blong yufala? …Traehad blong stap klin inaf from ol sakrifaes we [olgeta] i bin mekem blong yufala.”7
Taem yumi stap lukaot blong bildimap Saeon insaed long hat blong yumi, long hom blong yumi, komiuniti blong yumi, mo long ol kantri blong yumi, bambae yumi tingbaot strong tingting mo gudfala fet blong olgeta we oli bin givimaot evri samting we oli gat blong mekem se yumi save stap harem gud long ol blesing blong gospel we i kambak, wetem hop long hem mo promes tru long Atonmen blong Jisas Kraes.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16. Oli letem translesen: 6/16. Translesen blong First Presidency Message, July 2016. Bislama. 12867 852
Yusum Mesej Ia blongTij
Tingting blong askem olgeta we yu tijim blong tingbaot sam man long laef blong olgeta we oli bin openem rod fastaem mo oli bin stap olsem ol paeonia blong olgeta. Afta askem long olgeta ol taem we olgeta i mas stap olsem ol paeonia blong rere rod blong ol narafala. Invaetem olgeta blong tingting hevi long ol taem we olgeta i mas mekem wan sakrifaes mo from wanem sakrifaes ia i gat mining. Afta yu save jalenjem olgeta blong rikodem daon testemoni blong olgeta abaot “stret Paeonia.” we hem i Sevya.