Poraus seni ewe Aewin Presetensi, July 2016
Ennet ngeni ewe Nukuan Samach Kewe Me Akkom
Seni Preseten Thomas S. Monson
John Linford a 43 ierin nupwen I me punuwan, Maria, me unumon me nein nour kewe at ra finata ar repwe fiti ekkewe Souneng non ewe nemonun ewe Great Salt Lake. Ra nikitano nour ewe afomonun at, ewe a fori an angangen misineri, ra amomono pisekir, me fiti ewe an non Liverpool me fiti ewe sipw Thornton.
Ewe sai won mataw ngeni New York City, me mwirin won fonu ngeni Iowa, a pwano pwe ese wor amwararan. Osukosuk a poputa, iwe nge, ekis fansoun mwirin ewe faminien Linfords me ekkoch souneng ekkewe ra sai won ewe Thornton ra no seni Iowa City non July 15, 1856, ussun chiechien ewe kompenien kukkun wa mi wor ruofoch taian me wor ruofoch kamochun si kan pusei ika weiti ngenikich an James G. Willie mi fetanengaw.
Ewe awosukosuken fan nang me aweiresin sai a angei niwinin won chommong non ewe mwichen aramas, pachenong John. I a semwen me apwangapwang iwe ra nukei won efoch wa ruofoch taian me ruofoch kamochun. Ren ewe fansoun ewe mwich a tori Wyoming, nonnomun non an ewe samwaw a ngaweno. Ew mwichen anisi osukosuken aramas seni Salt Lake City ra wareto non October 21, fitu chok awa mwirin an John fansoun manaw a muchuno. A fen mano non ena sosoran kan ngeni aropen ewe Chonupupu Sweetwater.
John mi nemenemeno an a ekkesiwini kinamwe me kinamweinon ekkewe osukosuk, nonnomochun manaw me weiresin an uweano an famini ngeni Zion?
“Apw, Maria,” a apasa ngeni punuwan we mwen chok an epwe mano. “Uwa men pwapwa ach feitto. Usap manaw ai upwe tori Salt Lake, nge en me kewe at oupwe, me use nemenemeno ren mettoch meinisin a fisi ngenikich ika nouch kewe at repwe marita me forata ar famini non Zion.”1
Maria me noun kewe at ra awesano ar ewe sai. Nupwen Maria a mano arapakan 30 ier mwirin, i me John ra nikitatiw ew nifangen nuku, angang, pochokunen memefin tong, me angangen fangeno.
Ren om kopwe emon Souneng non Fansoun Soponon kopwe emon chon akkom, ren wewen ewe chon akkom pwe “emon a akkomwono an epwe amonata ika suki ewe an pwe ekkoch repwe fetan non.”2 Me om kopwe emon chon akkom kopwe weweiti angangen fangeno. Ika mwo ese chiwen wor e ureni chon ewe Mwichefen ar repwe nikitano imwer kewe ar repwe fori ewe sai ngeni Zion, napengeni repwe nikitatiw nonnomur me nom, orunier non fansoun nangatam, me chiechier ra tongei. Ekkoch ra fori ewe ametekin ekiek ar repwe nikitatiw chochon ar famini ekkewe rese tipew ngeni ar choni ewe Mwichefen. Souneng non Fansoun Soponon ra feino mwer, iwe nge, ra iotek pwe ekkewe mi achengicheng repwe weweiti me etiwa.
Ewe anen emon chon akkom ese mecheres, nge sia tapweno non rasen ipwen ewe amuchunon Chon Akkom—pwan mwo ewe Chon Amanau—ewe a akkomono, a pwari ngenikich ewe an ach sipwe fiti.
“[Feito,] tapweto mwiri,”3 I a tingor.
“Ngang ewe aan, ewe ennet o ewe manau,”4 I a affata.
“Feito rei,”5 I a kokko.
Ewe ann mi tongeni an epwe weires. Ekkoch ra mefi pwe a weires ar repwe uta ngeni turunufas me kapas mi ngaw seni aramas rese tipachem minne ra takiri nimenimoch, foffor ennet, me anneasochisi an Kot kewe annuk. Fonufan ese anamota an epwe awora an anongonong won annuk. Nupwen a wor ewe kapasen aurour ngeni Noah pwe epwe fana efoch waimw, ekkewe aramas ra nenneta ngeni fan nang ese kuchuchu me ra takiri—tori a pungutiw ewe ran.
Won ewe fonuwen Merika chommong fansoun a no, aramas ra tipemwaramwar, anini fengen, me anneasonap tori ewe akkei a oromano Zarahemla, pun a ponuono Moronihah, me ewe konik a amwouono Moronai. Takiri, turunufasei, kapasingawei, me tipis rese chiwen wor. Ra fen ekkesiwin ngeni song mongunungun, manunun kiroch. Ewe nikitu an Kot a wesino, An fansoun a ponueta.
Maria Linford ese tongeni epwe poutseni an nuku inamo ika ra eriaffou me non England, ewe weiresin an ewe sai ngeni ewe “neni Kot a am—onata,”6 me ekkewe osukosuk a fis ngeni a achocho ngeni fan iten an ewe famini me ewe Mwichefen.
Ren ew mwich a fis fan iten achechemen Maria non 1937 arun ekkewe peias, Elter George Albert Smith (1870–1951) a eisini mwirimwirin kewe: “Oupwe manaweni ennet ngeni ewe nuku an ami kewe neuo? … Oupwe achocho ngeni ami oupwe anamota meinisin ar kewe angangen fangeno [ra] fori fan itemi.”7
Nupwen sia kutta ach sipwe aueta Zion non netipach, non imwach, non neniach kewe, me non fonuwach, amo sipwe chechemeni ewe pochokunen pworacho me nangatamen nuku an ekkewe ra fangano meinisin pwe sipwe pwapwa non ekkewe feiochun ewe niwinsefaniton ewe kapas allim, fiti ewe epinukunuk me pwon non ewe Achasefan an Jises Kraist.
© 2016 seni Intellectual Reserve, Inc. Meinisin pung mi kawor. A for non Merika Kapungunon non fosun Merika: 6/16. Kapungunon awewen: 6/16. Awewen First Presidency Message, July 2016. Chuukese. 12867 901
Afanafan seni Ei Poraus
Ekieki om kopwe eisini ekana ka osukuna ar repwe ekieki ekkewe aramas non manawer ekkewe ra fen akkom mwer me ra pwan ekkoch chon akkom fan iter. Mwirin eisinir inet ra fen chon akkom me amonata ewe an fan iten ekkoch. Tingorer repwe ekieki ekkewe fansoun ra fori angangen fangeno me pwata a auchea. Ka tongeni kopwe fori ar repwe rekotuni ar kapasen pwarata ren “ewe amuchunon Chon Akkom,” ewe Chon Amanau.