iTukutuku ni Mataveiliutaki Taumada, Julai 2016

Tudei ena Vakabauti Ira na Tubuda

Mai vei Peresitedi Thomas S. Monson

iVakatakilakila

Peresitedi Thomas S. Monson

A sa 43 voli o John Linford ena gauna a navuca kina o koya kei na watina, o Maria, kei na tolu na luvedrau tagane me ratou sa biuta na nodratou itikotiko e Gravely, Igiladi, ka lakova yani e udolu vakacaca na maile me ratou laki okati vata kei ira na Yalododonu ena buca na Great Salt Lake. E rau a biuta tu mai na ikava ni luvedrau tagane, ka se kaulotu voli, volitaka na veika eratou taukena, ka tosoya na ilakolako e Liverpool ena waqa na Thornton.

Na itosotoso e wai ki New York City, kei na salavanua ki Iowa, a sega ni ka ni veiwali. A tubu na leqa, ia, oti toka vakalailai na nodra biuti Iowa City na vuvale na Linford kei ira na Yalododonu Edaidai ka soko mai na Thornton ena 15 ni Julai, 1856, vaka tiki ni kabani qiqibili leqa voli nei James G. Willie.

Na draki veilecayaki kei na itosotoso mosimosi a vakilai saraga ki na vuqa ena kabani, oka kina o John. A mani yaco me tauvimate ka malumalumu o koya ka mai biligi voli ena dua na qiqibili. Ena gauna a yaco kina na kabani ki Wyoming, sa malumalumu vakalevu sara na nona bula. A yaco mai e dua na ilawalawa ni veivueti mai Salt Lake City ena 21 ni Okotova, ni oti toka ga e vica na auwa na cava ni ilakolako nei John. A mate o koya ena mataka lailai oya volekata na gusuniwai ni Ucuniwai na Sweetwater.

A vuturi li o John ena nona volitaka na veika veivakacegui ka galala ki na sotavi dredre, leqaleqa, kei na veilecayaki ni bula ena nona kauta na nona matavuvale ki Saioni?

“Sega, Maria,” a tukuna vei watina ni bera ni mai leqa. “Au sa marau ni datou lako mai. Au na sega ni bula meu yacovi Salt Lake, ia o na rawa o iko kei iratou na cauravou, kau sa sega ni veivutunitaka na ka kece datou sa lako curuma kevaka me ratou na tubucake na cauravou ka bucina na nodratou matavuvale e Saioni.”¹

A vakacavara na nodratou ilakolako o Maria kei iratou na luvena tagane. Ni mai leqa o Maria voleka ni 30 na yabaki emuri, a biuta tu mai o koya kei John e dua na ivotavota ni vakabauta, ni veiqaravi, ni gugumatua, kei na solibula.

Mo dua na Yalododonu Edaidai oya mo dua na ivuvu, ni sa ibalebale ni ivuvu e “dua ka lako eliu me vakarautaka se tadolava na sala mera muria tale e so.”² Ka mo dua na ivuvu sa ikoya mo na vakamatautaki iko ena solibula. Dina ga ni ra sa sega ni kerei na lewe ni Lotu mera biuta na nodra itikotiko ena ilakolako ki Saioni, sa dodonu mera na biuta tu mai na itovo makawa, veika vakavanua ena gauna eliu, kei na veitokani mareqeti. E so era vakayaco vakatulewa mosimosi mera biuta tu mai na lewe ni matavuvale ka saqata na nodra lewena na lotu. Era toso ki liu na Yalododonu Edaidai, ia, ni masulaki voli mera na kila vakamatata ka vakadonuya o ira na noda ka talei.

Na salatu ni dua na ivuvu e sega ni rawarawa, ia eda muria voli na ikalawa ni iVuvu levu duadua—na iVakabula—ka sa lako eliu, ena vakaraitaki ni sala meda muria.

“Lako mai, mo muri au,”³ a veisureti o Koya.

“Oi au na sala, kei na vu ni dina, kei na vu ni bula,”⁴ a cauraka o Koya.

“Dou lako mai vei au,”⁵ a kaci o Koya.

Sa rawa ni veivakatovolei voli na sala. E so e dredre vei ira mera douvaka na veivakacacani kei na vosa tawadodonu e so ni tamata lialia ka vakatanitaka na tiko savasava, na yalodina, kei na talairawarawa ki na ivakaro ni Kalou. Sa torosobu sara ni vakamuria na ivakavuvuli na vuravura. Ni a vakaroti o Noa me tara e dua na waqa levu, era a raica na tamata lialia na lomalagi ka sega na kena o ka qai veivakalialiai ka veivakacacani voli—me yacova ni tau na uca.

Ena vanua levu o Amerika ena vica vata na senituri sa oti, na tamata a vakatitiqa, veivorati, ka talaidredre me yacova ni vakamai o Saraemala, a ubi Moronaia na qele, ka luvuci ena wai o Moronai. A sa sega tale na veivakacacani, veivakaduiduitaki, veiwali, kei na ivalavala ca. Era a vakasosomitaki ena vagagalu tawamacala, kei na butobuto vavaku. E sa oti na vosota ni Kalou, ka sa vakataucokotaki na Nona ituvatuva.

A sega ni vakayalia na nona vakabauta o Maria Linford mai na veivakacacani e Igiladi, na bula dredre ni nona ilakolako ki “na vanua sa vakarautaka … na Kalou,”⁶ kei na veivakatovolei veitaravi a vosota tu me baleta na nona matavuvale kei na Lotu.

Ena dua na soqoni ni veivakananumi ena ibulubulu nei Maria ena 1937, a tarogi iratou na nona kawa o Elder George Albert Smith (1870–1951): “Rawa li ni ko ni bula dinata na nodrau vakabauta na tubumuni? … Sasagataka mo ni bula kilikili ki na solibula taucoko [rau] sa cakava me baleti kemuni.”⁷

Ni da saga meda tarai Saioni ena lomada, ena noda itikotiko, ena noda vanua sokomuni, kei na noda matanitu, meda sa nanuma na nodra yaloqaqa navuci kei na vakabauta tudei o ira ka soli ira vakaoti me rawa ni da marautaka na veivakalougatataki ni kosipeli vakalesui mai, vata na kena inuinui kei na yalayala mai na Veisorovaki i Jisu Karisito.

© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/16. Vakadonui me vakadewa: 6/16. Vakadewa ni First Presidency Message, July 2016. Fijian. 12867 858

iVakavuvuli mai na iTukutuku Oqo

Navuca mo tarogi ira o vakatavulica mera vakasamataki ira na tamata ena nodra bula ka sa lako eliu ka ivuvu voli kivei ira. Qai tarogi ira se gauna cava era na ivuvu kina ka vakarautaka na sala kivei ira tale e so. Sureti ira mera vakasamataka vakatitobu na gauna e so era a solibula kina kei na vuna a yaga kina. Sa rawa ni o qai bolei ira mera vola na nodra ivakadinadina ni “iVuvu levu duadua,” na iVakabula.