Mensahe ti Umuna a Panguluen, Hulio 2016
Napudno iti Pammati Kadagiti Ap-appo
Ni Presidente Thomas S. Monson
Agtawen ni John Linford iti 43 idi isu ken ti asawana, a ni Maria, ken tallo kadagiti annakna a lallaki ket nagnunumuanda a panawan ti pagtaenganda iti Gravely, England, tapno agdaliasat iti rinibu a milia tapno makitipon kadagiti Sasanto iti Great Salt Lake valley. Inbatida ti maikapat nga anakda a lalaki, nga idi ket agserserbi iti mision, inlakoda dagiti sanikuada, ket napanda iti Liverpool babaen iti panagluganda iti barko a Thornton.
Naannayas ti panagdaliasatda babaen iti baybay a napan iti New York City, ken babaen iti daga a napan iti Iowa. Ngem, nangrugi dagiti riribuk, kalpasan a dagiti Linfords ken dadduma pay a Sasanto a naglayag iti Thornton pimmanaw iti Iowa City idi Hulio 15, 1856, kas paset iti dakes-ti gasatna a James G. Willie handcart company.
Adu ti nairisang iti kompania gapu iti dakes a tiempo ken makapautoy a panagdaliasat, nakairamanan ni John. In-inut a nagbalin a masaksakit ket nagkapsut tapno ginuyodda babaen iti handcart. Bayat ti pannakagteng ti kompania iti Wyoming, agpalalon unayen ti kasasaadna. Sumagmamanon nga oras kalpasan a nagpatinggan ti mortal a biag ni John, idi dimteng ti maysa a rescue team manipud iti Salt Lake City idi Oktubre 21. Natay isuna iti nasapa a bigat iti asideg ti takdang ti Sweetwater River.
Nagleddaang kadi ni John iti panangisukatna ti kinanam-ay kadagiti pannakibalubal, pannakapaidam, ken kinarigat iti inna panangitugot ti pamiliana iti Zion?
“Saan, Maria.” inbagana iti asawana sakbay a natay. “Naragsakak ta immaytayo. Diak man sibibiag a dumanon iti Salt Lake, ngem sika ken dagiti ubbing ket amman, saanko a pagbabawian amin a nagpasarantayo no dagiti ubbing ket dumadakkelda ken patanurenda ti pamiliada iti Zion.”1
Naileppas ni Maria ken dagiti annakna ti panagdaliasatda. Idi pimmanaw ni Maria kalpasan ti 30 a tawen, isuna ken ni John ket nakaibati iti baton-lagip iti pammati, iti pangserbi, iti debosion, ken iti sakripisio.
Ti agbalin a Latter-day Saint ket agbalin a nagkauna a kameng, ta ti pakaitarusan ti nagkauna a kameng ket tay “maysa a napan mangisagana wenno manglukat ti dalan tapno suruten dagiti dadduma.”2 Ken ti agbalin a nagkauna a kameng ket agbalin a kakallabay ti sakripisio. Numan dagiti kameng ti simbaan ket sanen a maayaban tapno panawanda dagiti pagtaenganda tapno agdaliasat iti Zion, mataginayon nga iddianda dagiti daan a bisio, inuugma a kababalin, ken ing-ingungoten a gagayyem. Sumagmamano ket addaan iti naladingit a desision a mangpanaw kadagiti kameng ti pamiliada a mangsupring iti pannakikamengda iti simbaan. Agdur-as dagiti Santo iti Ud-udina nga aldaw, tapno,ikarkararagda a maawatan ken aklonen ida dagiti ipatpategda.
Saan a nalaka ti dana ti nagkauna a kameng, ngem surotentayo dagiti tugot ti Nagkauna a Kameng- uray pay ti Mangisalakan- Isu a napan idin, tapno ipakitana kadatayo ti dalan a surotentayo.
“ Umaykayo surotendak,”3 Inyawisna.
Kinunana, “Siak ti dalan, ti kinapudno, ken ti biag.”4
“ Umaykayo kaniak,”5 Inyawagna.
Ti dalan ket mangitunda. Adda dagiti marigatan a makadaer iti pannakauy-uyaw ken makainsulto a sao dagiti maag a tattao a mangkatkatawa iti kinadalus ti dayaw, kinapudno, ken panagtungpal kadagiti bilin ti Dios. Ngem kanayon nga imbilangen ti lubong a saan a napateg ti panagtungpal iti pagbatayan. Idi nabilin ni Noe a mangbangon iti bapor, timmangad dagiti maag nga agindeg iti awan ulepna a tangatang ket kalpasanna nagkakatawada ken pinagsasaritaanda maipapan kadagiti napudno—agingga a dimteng ti tudo.
Iti kontinente ti Amerika nabayag a ginasgasuten a tawen, nagduadua dagiti tattao, nagsusupanget, ken dida nagtulnog inggana a kinnan ti apoy ti Zarahemla, naitanem iti daga ti Moronihah, ken linayus ti danum ti Moroni. Awanen ti agum-umsi, agpabain, mangsutil,ken panagbasol. Nasukatanda iti makalmes a silensio, napuskol a kinasipnget. Naglabesen ti kinaanus ti Dios, natungpalen ti Pagurasanna.
Di napukaw ti pammati ni Maria Linford iti laksid ti pammabalaw idiay Inglatera, dagiti rigat iti panagdaliasatna iti “ti lugar a ti Dios … insaganana,”6 ken ti nalaos a pannubok nga inibturanna para iti pamiliana ken simbaan.
Idi 1937, maysa a graveside ceremony ti naidedikar iti lagip ni Maria, dinamag ni Elder George Albert Smith (1870-1951) ti kaputotanna: “Agbibiagkayo kadi a napudno iti pammati dagiti kapuonanyo? … Ikalikagumyo ti maikari kadagiti amin a sakripisio nga inaramidda kadakayo.”7
Iti panagbiruktayo tapno maipasdek ti Zion kadagiti pusotayo, kadagiti pagtaengantayo, kadagiti komunidadtayo, ken kadagiti pagiliantayo, laglagipentayo koma ti tured ken pammati dagidi nangted ti aminda tapno masagraptayo dagiti bendision ti naisubli nga ebanghelio, nga addaan iti namnama ken kari babaen iti Pannubbot ni Hesukristo.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, July 2016. Ilokano. 12867 864
Panangisuro manipud iti Daytoy a Mensahe
Ibilangyo ti agdamag kadagiti insuroyo a mangpanunot kadagiti tattao kadagiti biagda nga immun-unan ken nagbalin a nagkauna a kameng para kadakuada. Kalpasanna damagem no kaano a nagkaunada a kamkameng ken nangisagana ti dalan para kadagiti dadduma. Awisem ida a mangutob kadagiti panawen nga inda nagsakripisio ken no apay a napateg. Mabalinmo a kariten ida a mangirecord ti pammaneknekda iti “ti ultimo a Nagkauna a Kameng,” ti Mangisalakan.