Mulwol ko Bin Somm’on e Presidency, July 2016
Ngad yul’yul’ gaed ko Mich rok e Pi Galabthir Rodaed
Rok President Thomas S. Monson
John Linfrod e ba 43 e duw rok napan ni ir nge ppin rok, i Maria, nge dalip faak row nib pagal e ri dugliyed ni ngar chuw gaed u tabinaew roraed u Gravely, England, ni ngar milekag gaed ni bukun biyu’ e mayl ni nge un nga fithik e pi Gidii’en Got u lane binaew u Great Salt Lake. Bin aningeg e bitir rorow e ke magay, nibe pigpig, mar pi’ed e chugum roraed ni chuway’, mar feked e kanawo’ u Liverpool u lane barkow nikan noeg e Thornton ngay.
Fare melekag u maday nge mada’ nga New York City, nge yaen u dakean e buut nga Iowa, e rib momaw’ Magawon e tabab, machane, buch’uw nga m’on napan nike chuw Linford nge tabinaew rok nge kuboech e pi Gidii’en Got ko Tin Tomur e Rran u Iowa City ko July 15, 1856, ni kar raned u lane barkow nikan noeg e Thornton ni bang ko ulung rok James G. Willie.
Yifang nibe kireb nge milekag roraed e rib momaw’ e ke kireb nag boech e ma’af ko oren i yaed, nib mu’un John ngay. Ke ubchiya’ nib gel ni ngarin ta’ nga lane handcart ngan gerngiy. Napan ni taw fare ulung nga Wyoming, ma kari gel e ubchiya’ ngak. Picha’an ni kar baed u Salt Lake City ni ngar ayuw gaed e ri taw gaed ko October 21, tomren reb e awa me mus e milekag rok John u dakean e fayleng. Ke yim’ nib kakadbul u toben mirchalen e Sweetwater River.
Ke kalngan’ John nike pag urngin ban’en ni fen ko pi magawon, gafgow, nge tin momaw’ ban’en nike yib ngak e tabinaew rok ni nge feek raed nga Zion?
“Danga’, o Maria,” e yoeg ngak e ppin rok um’on ni nge yim’. “Gub falfalen’ ni kad baed. Dabgu thap nga Salt Lake, machane gur nge pi pagael rodow e ra thap, ma dani kalngan’ug ko gubin e pin’en ni kad dared u fithik fa’anra rayog ni nge pilal’ faak dow mar chugliyed e tabinaew rodaed u Zion.”1
Maria nge pi pagael ni faak e ri mu’ niged fare milekag roraed. I chugur guyey e duw nga m’on napan ni yim’ Maria, ma ir nge John e ri digeyew ba yaat ni morng’aagen e mich, pigpig, athamgil, nge miligach.
Ngan mang Gidii’en Got e ngan mang e pioneer, ya n’en nibe yup’ fan e pioneer e “bee’ nima yaen u m’on ni nge fal’eg rogon fa bing kanawo’en boech e gidii’ ni ngar uned.”2 Ma ra ngan mang e pioneer ma ngan un ko miligach. Demtrug ni pi chonggin e Galasia dakirni yoeg ngoraed ni ngar chuw gaed u tabinaew roraed ni ngar milekag gaed nga Zion, baga’ ni ngari digeyed e pangin rad ni kafram, yilen, nge pi tafagar roraed. Boech e ma dugliy ni nge chuw gaed ko tabinaew roraed ni dabun raed ni nge un ko Galasia. Gidii’en Got ko Tin Tomur e Rran e be yaen nga m’on, machane, yibe meybil ni pi bitir e ra nang fan me adag.
Kanawo’en e pioneer e dani moem, machane gadaed be laek ko wo’en e Pioneer—mu’un fare Tathapeg nga’—nike yaen um’on, nibe dag e kanawo’ ngodaed ni ngad laked.
“Moey, ngam un ngog,”3 Ke pong.
“I gag e kanawo’, me gag e tin riyul’, me gag e yafos,”4 ke yoeg.
Mired ngog,”5 ke pong.
Kanawo’ e rayog nib sikeng. Boch e ma patag nib momaw’ ni ngan monog u fithik e moning nge nonnon ko gidii nib meechiyang e kiybe moning nag falan e dowef, yul’yul’, nge mafol ko pi motochiyel rok Got. Fare fayleng ea gubin ngiyal nima dariy fan nage liyor ko tin nib gaa’ fan. Nap’an nikan yog ngak Noah ni nge toy fare arke, urgin fapi gidii nib meechiyang ea ri sapgad ko lang ni dariy e ba magulang riy miyad moning —ngayan I taw ko ngiyal nike taw e n’uw.
Bukun e duw ni kafram u dakean e naam u Mariken, ma gidii’ e be marwaer wan’ raed, be balyang wan’ raed, ma yibe togopluw nge taw ko ngiyal’ nike aw e nifiy nga Zarahemla, nikan tharey yu Moronihah, nge raen nike tharey yu Moroni. Makring, malalang, kireb, nge denen e dakriy. Ke chuw ke paer e domomow, nge lumar nib gel. Ke chuw e gapas rok Got, make buch e ngiyal’ nike dugliy
Maria Linford e ri dani m’a e mich rok ni demtrug rogon e gafgow u England, nge gafgow ko milekag rok ko “gin’en ni Got …e ke fal’eg rogon,”6 nge pi sikeng nike athamgil u fithik ni fan ko tabinaew rok nge Galasia.
Napan e 1937 ko magawon ni fan ngak Maria, ma ke fith Elder George Albert Smith (1870–1951) e ke fith mornga’agen: “Gara paer ngam yul’yul’ gaed ko mich rok e pi gidii’ rom ni kakrom? … Mu athamgil ni ngam yul’yul’ ko gubin e pi miligach ni [kar] fal’eg ni fan ngom.”7
Napan ni gadaed ra toey e zion u lan gumircha’en daed, u lane tabinaew rodaed, u lane binaew rodaed, nge lane naam rodaed, ma aygud tayfaned e athamgil nge mich rok e picha’an nikar pi’ed gubin ban’en roraed ni ngeyog ni ngad falfalen’ gaed ko pi tawa’ath ko fare gospel nikan fulweg, nge athap nge m’ag u dakean fare Bayul rok Yesus Kristus.
© 2016 by Intellectual Reserve, Inc. Gubin mabay matwon. Kan yoloey u Meriken. Kan micheg nag ko thin nu Ngalis: 6/16. Micheg i pilyeg: 6/16. Pilyeg thin ko First Presidency Message, July 2016. Yapese. 10867 905
Rogon ni ngan Fil ko Biney e Mulwol
Mu leam nag ni ngam fith ngak e picha’an ni gabe sensey nag ni ngar leam nniged e gidii’ u lane yafas roraed ni ke yim’ ma ke mang e pioneer ni fan ngoraed. Ma aram maga fith raed napan ni ngar manged e pi pioneer mar fal’eged e kanawo’ ni fan ngak boech e gidii’. Pining raed ni ngar leam niged e ngiyal’ ni kar miligach niged ban’en nge mongfan nib mangil. Ma arame rayog ni ngam moeg ngoraed ni ngar yoloeyed mornga’agen e mich roraed ni mornga’agen “fare Pioneer nib falel’,” ni fare Tathapeg.