Mensahe sa Visiting Teaching, Hulyo 2016
Ang Aton Ikasarang sa Pagkaginikanan
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Pamilya: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
“Importante kaayo nga ang mga espiritu nga anak sang Dios matawo sa kalibutan kag makaangkon sang kahigayunan nga mag-uswag pakadto sa kabuhi nga wala’y katapusan,” panudlo ni Elder Dallin H. Oaks sang Korum sang Napulo’g Duha ka mga Apostoles. “Tungod sang pinakamataas nga katuyuan sang dakong plano sang kaluwasan, nagapati ako nga ang pinakadaku nga manggad sa duta kag sa langit amo ang aton kabataan kag aton kaliwatan.”1
Si Elder Neil L. Andersen sang Korum sang Napulo’g Duha ka mga Apostoles nagsiling:
“Nagapati kita sa mga pamilya, kag nagapati kita sa kabataan. …
“‘… Ang Dios nagsiling kay [Adan kag Eva], Magmabungahon, kag magbuad, kag magtugub sang duta’ [Genesis 1:28]. …
“Ining kasuguan wala malipatan ukon ginbale-wala sa Ang Simbahan ni Jesucristo sang mga Santos sa Ulihing mga Adlaw.”2
Bisan pa nga indi tanan sa aton mangin mga ginikanan sa sini nga kabuhi, mahimo kita magsapupo sang kabataan bisan ano man ang ila edad. Nagakalipay kita sa mga bugay sang pagka-bahin sa pamilya sang Amay nga Langitnon, kag nagaeksperiyensya kita sang mga kalipay kag mga hangkat sang pagka-bahin sa isa ka dutan-on nga pamilya. Kag para sa kadam-an, ang pagkaginikanan nagahulat sa ila sa ginapaabot nga wala’y katapusan.
Dugang nga Balaan nga mga Kasulatan
Mga Istorya Gikan sa Matuod-tuod nga Kabuhi
“Madamo nga mga tingog sa kalibutan sa karon ang nagabale-wala sang kaimportante sang pag-angkon sang mga kabataan ukon nagalaygay sa pag-atrasar ukon paglimita sang kabataan sa isa ka pamilya,” siling ni Elder Andersen. “Ang akon mga bata nga babayi sang sini lang nagpabasa sa akon sang isa ka blog nga ginsulat sang isa ka Kristiyano nga iloy (nga indi sa aton simbahan) nga may lima ka kabataan. Nagkomentar sia: ‘[Sa aton pagdaku] sa sini nga kultura, mabudlay kaayo mag-angkon sang isa ka panan-aw sa pagkailoy base sa biblia. … Ang ranggo sang kabataan tuman ka nubo ikumparar sa pag-eskwela sa kolehiyo. Sigurado nga mas manubo pa sangsa pagpanglugayawan. Mas manubo pa sangsa kahapos nga maggwa kon gab-i sa paglingaw-lingaw. Manubo pa sangsa pagpatahum sang imo lawas sa gym. Manubo pa sangsa bisan ano nga trabaho nga imo naangkon ukon ginalauman nga maangkon.’ Dugang niya dayon: ‘Ang pagkailoy indi kalingawan, isa ini ka bokasyon. Wala ka nagakolekta sang kabataan tungod nakita mo nga mas manami sila sangsa mga stamps. Indi ini isa ka butang nga imo himuon kon may tiempo ka. Amo ini ang rason nga ginhatagan ka sang Dios sang tiempo.’”3
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, July 2016. Hiligaynon. 12867 861
Binagbinaga Ini
Sa ano nga mga pamaagi nga ang aton dutan-on nga pamilya pareho sang aton langitnon nga pamilya?