Serafo

Aea Fengen Pwapwa Fochofoch

Ew me nein ekkewe auchean mettoch ussun ewe kapas allim, ewe ennet ussun ewe kokkotun manau ese much. A wor ach eingeingen tufich ach sipwe nom ren ach famini fochofoch. Ena ennet a anisikich an epwe wor ach anean nupwen sia mefi osukosuk ren ei fonufan. Preseten Eyring a afanafana, “Samach mi tong won Nang a sinei netipach. An popun pwe epwe ngenikich pwapwa (nengeni 2 Nifai 2:25). Iwe nge I a ngeni kich ewe niffang ren Noun we an epwe fori an epwe tufich ewe pwapwan chufengenin famini ewe mi soposopono feinfeino chok. … Ew niffang meinisin noun Kot ekkewe ra feitto won ei fonufan repwe mochen angei.”

Ena feioch a awenewen ngeni kich kewe sia manau iei me ngeni ekkewe ra soposopono—nge ren chok ach aninis. Ach kewe neuo ra nom non ewe nenien ngun iei, ra utikich ach sipwe amonata iter ren ewe annukun tempel an epwe fis fan iter. Nge fan ekkoch epwe tongeni an epwe weires an epwe fis ewe angang fan iter. Meni sipwe kon osukosuk, ika sipwe nom towaw seni ew tempel ach sipwe nonno non.

Feiochun, mei pwan wor ekkoch anen ach sipwe tongeni anisi ach kewe neuo, ussun fori angangen uruon famini, ochufengeni ekkewe porous non ew chok an aramas repwe katon, ika tumunui kewe semirit fan iten samach me inach nupwen ra no ngeni ewe tempel. Ren ach aninis, sia anisi ewe Samon me wato ewe aneanen famini ese much ngeni ekkewe ra nom pwan ewe epek ren ewe eppet.