Poraus seni ewe Aewin Presetensi, August 2016
Ewe Anean ren Tong Ese Much An Famini
Seni Preseten Henry B. Eyring
Aewin Chon Aninis non ewe Aewin Presetensi
Ren meinisin ekkewe niffang Samach mi tong won Nang a awora ngeni Noun kewe, ewe akkauchean ewe manau ese much (nengeni D&C 14:7). Ena niffang ach sipwe nom fan mesen Kot ewe Sam me Noun we Achengicheng feinfeino non famini. Non chok ewe mi tekia me nein ekkewe muun Kot, ewe muun celestial, ewe chufengenin tong an nonnomun famini epwe soposopono.
Kich meinisin sia aneanei ewe pwapwa ne nom non famini mi murinno. Ren ekkoch me neich, ew memmef sise mwo sisinei—ew memmef sia sinei mi tufich nge sise mwo sineochu. Meni sia fen kukuna me non manauen ekkoch. Ren ekkoch me neich, tongen famini a kon fatafatoch me auchea nupwen mano a eimufesenikich seni emon semirit, emon inenap, emon semenap, emon pwich, emon fefinach, ika emon me nein samach ika inach chinap.
Sia fen mefi ewe anean pwe ew ran sipwe tongeni mefi sefani ewe pwichikaren tong an chon ach famini sia fokkun tongei me iei sia ani riaffoun ach sipwe pwan mefi sefani.
Samach mi tong won Nang a sinei netipach. An popun pwe epwe ngenikich pwapwa (nengeni 2 Nifai 2:25). Iwe nge I a wato ewe niffang ren Noun we an epwe fori an epwe tufich ren ewe pwapwan chufengenin famini ewe mi soposopono feinfeino chok. Pokiten ewe Chon Amanau a muti ewe ririn mano, kich sipwe manausefan. Pokiten I a mano fan iten ach kewe tipis, sia tongeni, ren ach nuku me aier sefan, ach sipwe winiti nimenimoch ren ewe muun celestial, ikewe famini ra chufengen non tong feinfeino chok.
Ewe Chon Amanau a tinano ewe Soufos Elijah ngeni Joseph Smith an epwe eniwinsefani ekkewe kien ewe pristut (nengeni D&C 110). Ren ekkei ki a feito ewe manamanen riri fengen, awora an Kot auchenapen niffang ngeni Noun kewe—manau esemuch non famini ra chufengen feinfeino chok.
Ina ew niffang meinisin noun Kot mi feito non ewe fonufan repwe mochen angei. Ew na unungatin noun kewe semirit non pekin ngun rese etiwa An ewe niffang non ewe nenien ngun. Sipenuk seni feiochun nukuchar iwe mwirin a u ngeni, ra finata ar resap tongeni sinei ewe pwapwan an Samach Kot won Nang ewe niffangen famini fochofoch.
Ren kich kewe sia pasini ewe auchean tes me non ewe nenien ngun me sia tufich ach sipwe angei ewe niffangen inis, ewe wachimuken finata ren manau ese much mi chok chiwen ach ren ach sipwe fori. Ika sia feioch ach sipwe kutta ewe kapas allim, sia tongeni finata ach sipwe fori me aponueta ekkewe pwon ngeni Kot me atufichikich ngeni manau ese much. Nupwen sia nikitu non ena nukunuk, ewe Ngun mi Fel epwe affata ach anean me nukunuk pwe sia nom won ewe an ngeni manau esemuch, ach sipwe nom non famini feinfeino non ewe muun celestial.
Ren ekkoch, pwe pwapwa fochofoch epwe nikinikin ew apwangapwang ika fen ew anean mi moneno. Sam me in, semirit, pwich, me fefinach meni repwe finata met ra mochen ewe esap otufichir ngeni manau ese much. Meni kopwe fen pwan ekieki ika epwene wor om tufich ren ewe Achasefanin Jises Kraist.
Emon soufosun Kot a awora ngeniei ew kapasen aninis minne a ngeniei kinamwe. Uwa ani ourekin ika ekkewe mochen an ekkoch epwe fori an epwe weires ren ach kewe famini ar repwe chufengen feinfeino. A apasa, “Ka oureki ussun ewe osukosuk mi mwan. Ka fen manau nimenimoch ren ewe muun celestial, me ewe ototen famini epwe fen murinno nap seni om kopwe tongeni ekieki.”
Ngeni meinisin ekana ouwa fen sinei ika minne ar pupunu me nour semirit—ika suseni—ra awora ew ngunuwen ar anean, uwa ngeni kemi ai pwarata: Samach won Nang a sinei me tongei en pwe en Noun semirit non pekin ngun. Nupwen en mi nom ren me Noun ewe Achengicheng me mwen ei manau, Ra anomu non netipom ewe anean ka ani ren manau ese much. Ren ewe manamaen angangen ewe Achasefan an Jises Kraist me ren ewe emwen an ewe Ngun mi Fel, ka tongeni mefi iei me kopwe mefi non ewe fonufan epwap feito ewe famini a tongei Semom me Noun we Achengicheng a mochen kopwe angei.
Uwa pwarata pwe nupwen kopwe nom non nimenimoch ren ewe muun Celestial, ewe pwon mi nom non osuni pwe “kokkotun famini epwe kon murinno nap seni om kopwe sinei” epwe om.
© 2016 seni Intellectual Reserve, Inc. Meinisin pung mi kawor. A for non Amerika. Kapungunon non fosun Merika: 6/16. Kapungunon awewen: 6/16. Chiakun First Presidency Message, August 2016. Chuukese. 12868 901
Afanafan seni ei Poraus
Ekieki nepoputan ren om aporousa ekkewe ka osukuner ren ew fansoun nupwen ka kinisou ren ewe aneanen famini fochofoch. Tingor ngenir repwe ekieki ussun ei fansoun nupwen ra fen mefi kinisoun famini fochofoch. Eisinir ika ir ra mochen repwe aporousa. Ka tongeni tingorer repwe ekieki ekkoch anen ar repwe murinono me nimenimoch ren ewe muun celestial pwe ewe pwonen non osini ren “ototen famini … epwe kon murinno nap seni om kopwe tongeni sinei” a tongeni ar.