Mwet Fuhsr

Akacsruhi ke Engan Ma Pahtpaht

Sie ma yohk emet ke wosasuc uh pa etwacack ke plwacn in molwelah uh. Oasr lasr pacl wowo wolacna uh in tuhkweni yurin sucu lasr ma pahtpaht. Etwacack se ingacn kahsrwe kuht in eis finsrak oacna sie pacl kuht puhla kuhtangyucklac ke facluh. Prestuhn Eyring el luti, “Pahpah tuhmasr Inkuhsrao El etuh insiyacsr. Srihpac Lal uh pa in use engan nuh sesr (liye 2 Nephi 2:25). Na oruh El use mwe sang ke Wen Nahtuhl in kuh in ahkfahsryelah engan ke tuhkweni luhn sucu ma kalweniyuck ma pahtpaht. … Pa sie mwe sang ma kwewa tuhlihk nuhtin God suc tuhkuh nuh fin facluh uh kuh in eis.”

Mwe insewowo se ingacn utuckuh nuh sesr suc moul ingena ac nuh selos suc misac tari—tuhsruhk ke kahsruh lasr. Mwet somlah lasr uh oasr ke facluh luhn nguhn ingena, tuhpan kuht in ahkolah inelos nuh ke akwuck luhn tempuhl uh in oreklac kaclos. Tuhsruhk kuhtuh pacl uh kuh in upac in oruh orekma nuh selos uh. Sahp kuht ac kahfofo na upac, kuh kuht ac muhta loeslac nuh ke tempuhl in fahsri na.

Wo ohiyac, oasr inkacnek sahyac ma kuht kuh in kahsruh mwet somlah lasr uh, kain nuh ke orekma ke sramsram mahtuh luhn sucu, karihngihn, kuh liyacacng tuhlihk nuhtin pahpah ninac tuhmasr ke elos som nuh tempuhl uh. Ke kahsruh, kuht kuhlwacnsuhpuh Leum ac use finsrak se luhn sucu ma pahtpaht nuh selos suc oasr ke lihsrlihsr se sahyac ah.