Pweng sin Prestuhnsi Se Met, Ohkohs 2016
Sie Finsrak ke Luhngse Sucu Ma pahtpaht
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Ke mwe sang nuh kwewa Pahpah luhngse tuhmasr Inkuhsrao El sang nuh sin tuhlihk Nahtuhl, ma wolacna emet sac pa moul ma pahtpaht (liye D&C 14:7). Mwe sang se inge pa in moul yurin God Pahpah ac Wen Sacohklacna Nahtuhl ma pahtpaht ke sucu. Muhkwena ke acn fuhlwact emet ke tohkohsrahi luhn God, celestial, fah wuhlwelah ke moul in sucu fah kalweniyuck.
Kuht nuh kwewa finsrak nuh ke engan se ma in moul wi sucu luhngselacna lasr. Nuh sin kuhtuh sesr, pa puhla se ma kuht tiac puhlakihn—sie puhla ma kuht etuh muh fihsrwacsr tuh soenna arulacna kahlwem. Sahp kuht liye ke moul luhn mwet sahyac uh. Nuh sin kuhtuh sesr, luhngse luhn sucu oacna in yohk na pwacye ac sacohk ke pacl se misac uh srikuhtlac liki sie tuhlihk, sie ninac, sie pahpah, sie tamuhlwel, sie tahmtahel, kuh sie pahpah mahtuh ac ninac mahtuh sacohklacna.
Kuht nuh kwewa puhla finsrak lah sie pacl kuht kuh in sifil puhla luhngse wolacna ke mempucr luhn sucu se kuht luhngse na pwacye uh ac ingena ngalkihn in sifil sruokyac.
Pahpah luhngse tuhmasr Inkuhsrao El etuh insiyacsr. Srihpac Lal pa in use nuh sesr engan (liye 2 Nephi 2:25). Ac oruh El use mwe sang ke Wen Nahtuhl in oruh in fihsrwacsr engan se ke tuhkweni luhn sucu suc ac fahfahlac ne tok ma pahtpaht. Ke srihpen Mwet Lahngo El kuhnahoslah mwe kapihr luhn misac, kuht fah sifil moulyak. Ke srihpen El iwaclah ke ma koluk lasr, kuht kuh, ke luhlahlfongi lasr ac auliyak, ahknwacsnwacsyeyucklac in utyak nuh ke tohkohsrahi celestial, acn ma sucu uh tuhkweni ke luhngse nuh tok ma pahtpaht.
Mwet Lahngo El suhpwacllah Mwet Pahluh Elijah nuh yohrohl Joseph Smith in fohlohkohnwack ki luhn pristut (liye D&C 110). Ki ingacn tuhkuh ke kuh in sil uh, sang mwe sang wolacna emet luhn God nuh sin tuhlihk Nahtuhl—moul ma pahtpaht ke tuhkweni luhn sucu uh ma ne tok ma pahtpaht.
Pa sie mwe sang ma kwewana tuhlihk nuhtin God suc tuhkuh nuh facluh uh kuh in eis. Ahktolu ke tuhlihk nguhn Nahtuhl lahfwekihn mwe sang Lal nuh ke facl luhn nguhn. Srihklaciyacn luhlahlfongi ac na ikacslah in kahsrweyuck, elos sulaclah in tiac etuh ke engan ke mwe sang ke sucu ma pahtpaht luhn Pahpah Inkuhsrao.
Nuh sin kuhtuh sesr suc pahswelah mwe srihke upac ke moul se met ke facl luhn nguhn ah ac ahkolah in eis mwe sang ke moul in mahno, sie sulaclah wolacna ke moul ma pahtpaht uh srwackna ma lasr in oraclah. Fin kuht insewowo in konwacack wosasuc fohlohkihnyuckyak uh, kuht kuh in sulaclah in oruh ac liyacacng wuhlweacng yurin God ma ahkoekuhtlac nuh ke moul ma pahtpaht. Ke kuh kuhtanglah in luhlahlfongi, Nguhn Muhtahl fah ahkkahlwemye finsrak lasr ac puhla wo se ma kuht fahsr ke inkacnek luhn moul ma pahtpaht, in muhta yurin sucu ma pahtpaht ke tohkohsrahi luhn celestial.
Nuh sin kuhtuh, engan sahflah sacn fah oacna sie ma te kahlwem kuh finne in sie finsrak srihksrihkweni. Pahpah ninac, tuhlihk, tamuhlwel, ac tahmtahel uh sahp orwaclah sulaclah suc ma ac kuh in tiac ahkoeloslac nuh ke moul pahtpaht. Sahp kom ac kuh in nuhnkuh fin kom ahkfalyelah nuh ke Iwaclah luhn Jisus Kraist.
Sie mwet pahluh luhn God sie pacl ah use nuh sihk sie kahsruh ma use nuh sihk mihslac. Nga elyah ke sulaclah luhn mwet sahyac uh ma ac fah oruh in upac nuh sin sucu lasr in tuhkweni ma pahtpaht. El fahk, “Kom elyahkihn mwe elyah wacngihn srihpac. Kom ahkolah in nwacsnwacs nuh ke tohkohsrahi luhn celestial, ac tahklac luhn sucu fah yohk wolacna la ke kom ac kuh in nuhnkuh kac.”
Nuh suwos kwewa suc puhlakihn ohiyac la sifacna kuh suc pahyuck la ac tuhlihk nahtuh—kuh wacngihn la uh—sang sie akucl tiac kahlwem nuh ke finsrak lalos, nga usot mwe lohoh luhk: Pahpah Lucng El etuh ac luhngse kowos oacna tuhlihk nguhn Nahtuhl. Ke kom muhta Yohrohl ac Wen Sacohk Nahtuhl met liki moul se inge, Elos fihliyac ke insiyom finsrak se tuh kom fah eis moul ma pahtpaht. Ke kuh in Iwaclah luhn Jisus Kraist orekma ac wi kolyuck luhn Nguhn Muhtahl uh, kowos kuh in puhla ingena ac fah puhla ke facluh se fahsruh uh tuhkuh luhngse luhn sucu Pahpah tomowos ac Wen Sacohk Nahtuhl kena pwacye nuh suwos in eis.
Nga fahkwack lah ke kowos moul nwacsnwacs ke tohkohsrahi luhn celestial, mwe palye uh olwelah lah “tahklac luhn sucu uh fah sie ma wolacna kom ac kuh in nuhnkuh kac” fah ma lowos.
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn First Presidency Message, August 2016. Kosraean. 12868 868
Luti ke Pweng se inge
Muhtwacwacack nuhnkuh ke fahkwelihk nuh selos kom luti an in kihtin pacl ke pacl se kom sruikihn ke finsrak luhn moul ma pahtpaht. Solwaclos in nuhnkuh ke kihtin pacl ke pacl se kom puhla tarilacna luhn sucu ma pahtpaht uh. Siyuck selos fin elos luhngse akacsruhi. Kom kuh in solwaclos in nuhnkuh ke innek in ahkwoyelah ac moul nwacsnwacs yohk likina met ke tohkohsrahi luhn celestial tuh mwe palye ke wuhlwelah ke “tuhkweni luhn sucu … yohk likina ma wolacna kom kuh in nuhnkuh kac” kuh pac in ma lalos.