Feiā ’āpī

Fa’a’ite i te ’oa’oa mure ’ore

Te hō’ē o te mau ’ohipa maita’i roa ’a’e nō ni’a i te ’evanelia o te ’itera’a ïa i te fa’anahora’a nō te fa’aorara’a. ’Ua fāri’i tātou i te rāve’a fa’ahiahia ’ia fa’aea e tō tātou ’utuāfare e a muri noa atu. E tauturu taua ’itera’a ra ia tātou ’ia vai te tia’ira’a i te mau taime ato’a a ’ite ai tātou e ’ua tāninahia tātou e te ao nei. ’Ua ha’api’i mai te peresideni Eyring, « ’ua ’ite tō tātou Metua here i te Ao ra i tō tātou ’ā’au. Tāna ’ōpuara’a o te hōro’a ïa ia tātou i te ’oa’oa (hi’o 2 Nephi 2:25). ’E nō reira, ’ua hōro’a mai ’Oia i te ō nō Tāna Tamaiti nō te fa’atupu i te ’oa’oa o te mau natira’a ’utuāfare o te tamau noa e a muri noa atu. O te hō’ē hōro’a ïa o tā te tamari’i tāta’itahi a te Atua tei haere mai i te ao nei e nehenehe e tītau ».

E tupu teie ha’amaita’ira’a nō te feiā i roto ia tātou e ora nei i teie taime e nō te feiā tei pohe, mea na roto noa rā i tā tātou tauturu. Tei roto tō tātou mau hui tupuna i te ao vārua i teie nei, te tia’i mai ra ’ia fa’aineine tātou i tō rātou i’oa nō te mau ’oro’a i te hiero e rave nō rātou. I te tahi taime rā e mea fifi nō te rave i te ’ohipa nō rātou. E mea ’ohipa roa tātou, ’e ’aore rā e mea ātea roa te hō’ē hiero iō tātou nō te haere pinepine.

’Aua’a’e rā, te vaira te tahi mau rāve’a e nehenehe tātou e tauturu i tō tātou hui tupuna, mai te ravera’a i te ’ohipa ’ā’amu ’utuāfare, te rave i te ’ohipa ’īritira’a i’oa ’e ’aore rā te ha’apa’ora’a i te mau tamari’i nō tō ’outou metua ’a haere ai raua i te hiero. Na roto i te tauturura’a, te tāvini nei tātou i te Fatu ’e te ’afa’i nei tātou i te tia’ira’a nō te mau ’utuāfare mure ’ore nō te feiā i te tahi atu pae o te pāruru.