Parau poro’i a te Peresidenira’a Mātāmua, Atete 2016
Te ti’aturira’a nō te here o te ’utuāfare mure ’ore
Nā te peresideni Henry B.Eyring
Tauturu mātāmua i roto i te Peresidenira’a Mātāmua
I roto i te mau ō ato’a a tō tātou Metua here i te Ao ra i hōro’a nō Tāna mau tamari’i, tei hau a’e o te ora mure ’ore ïa (hi’o PH&PF 14:7) Taua ō ra o te orara’a ïa a muri noa atu i pīha’i iho i te Atua te Metua ’e i Tāna Tamaiti Here ’ei mau ’utuāfare. Tei roto noa i te bāsileia teitei roa a’e o te mau bāsileia o te Atua, ’oia ho’i te tiretiera, e vai tāmau noa ai te mau natira’a here o te orara’a ’utuāfare.
Te ti’aturi nei tātou pā’āto’a i te ’oa’oa ’ia ora i roto i te mau ’utuāfare here. Nō te tahi pae o tātou, o te hō’ē ïa mana’o ’aita tātou i ’ohipa na—te hō’ē mana’o o tā tātou i ’ite e nehenehe e ’aita rā i tupu atu ra. E nehenehe tātou e ’ite i te reira i roto i te orara’a o vetahi ’ē. Nō vetahi o tātou, te here ’utuāfare e au ra e mea mau ’e te faufa’a ’ia fa’ata’a ’ē te pohe ia tātou i te hō’ē tamari’i, te hō’ē metua vahine, te hō’ē metua tane, te hō’e taea’e, te hō’ē tuahine, ’e ’aore rā te hō’e metua tupuna here ’e tei herehia.
’Ua ti’aturi tātou pā’āto’a ē i te hō’ē mahana e nehenehe tātou e ’ite fa’ahou i te here māhanahana o taua melo o te ’utuāfare ra o tā tātou i here rahi ’e i teie nei ’aita e ’āpā fa’ahou.
’Ua ’ite tō tātou Metua here i te Ao ra i tō tātou ’ā’au. Tāna ’ōpuara’a o te hōro’a ïa ia tātou i te ’oa’oa (hi’o 2 Nephi 2:25). ’E nō reira, ’ua hōro’a mai ’Oia i te ō nō Tāna Tamaiti nō te fa’atupu i te ’oa’oa o te mau natira’a ’utuāfare o te tamau noa e a muri noa atu. Nō te mea ’ua ’ōfati te Fa’aora i te mau tāpe’a o te pohe, e ti’a fa’ahou mai ïa tātou. Nō te mea ho’i e, ’ua pohe ’Oia nō tā tātou mau hara, e nehenehe tātou, na roto i tō tātou fa’aro’o e te tātarahapa, ’ia riro e mea ti’amā nō te bāsileia tiretiera, i reira te mau ’utuāfare e nati-’āmui-hia ai i roto i te here mure ’ore
’Ua tono mai te Fa’aora i te peropheta Elia ia Iosepha Semita nō te fa’aho’i mai i te mau tāviri o te autahu’ara’a (hi’o PH&PF 110). Na roto i teie mau taviri ’ua tae mai te mana nō te ta’atira’a, o te hōro’a mai i te ō hau roa ’a’e nō Tāna mau tamari’i—te ora mure ’ore i roto i te mau ’utuāfare tei nati-’āmui-hia ’e a muri noa atu.
O te hō’ē hōro’a ïa o tā te tamari’i tāta’itahi a te Atua tei haere mai i te ao nei e nehenehe e tītau. ’Ua pāto’i te hō’ē i ni’a i te toru o Tāna mau tamari’i i Tāna hōro’a i roto i te ao vārua. Nō te fa’aro’o tāpetepete ’e ’ua tupu te ’ōrurehau, ’ua mā’iti rātou ’eiaha roa atu ’ia ’ite i te ’oa’oa nō te hōro’a a te Metua i te Ao ra nō te mau ’utuāfare mure ’ore.
Nō te feiā i roto ia tātou, o tei manuia i te hi’opo’ara’a faufa’a rahi roa i roto i te ao vārua hou teie orara’a, ’e tei fa’ata’ahia nō te fāri’i i te ō nō te tino tāhuti, te mā’itira’a rahi nō te ora mure ’ore o tā tātou ïa e tītau fa’ahou e rave. Mai te peu ’ua ha’amaitaihia tātou nō te ’ite mai i te ’evanelia tei fa’aho’ihia mai, e nehenehe tātou e mā’iti e rave ’e e ha’apa’o i te mau fafaura’a e te Atua o te fa’ata’a ia tātou nō te ora mure ’ore. A tamau noa ai tātou i roto i taua ha’apa’o-maita’i-ra’a ra, e fa’a’ite pāpū mai te Vārua Maita’i i tō tātou tia’ira’a ’e te ti’aturira’a e tei ni’a tātou i te ’e’a nō te ora mure ’ore, nō te ora ’ei mau ’utuāfare mure ’ore i roto i te bāsileia tiretiera.
Nō vetahi, taua ’oa’oa mure ’ore ra e au mai te hō’ē tia’ira’a parai ’e ’aore rā ’aita e faufa’a. Te mau metua, te mau tamari’i, te mau taea’e ’e te mau tuahine tei rave i te mau mā’itira’a o tei ti’avaru ia rātou i te ora mure ’ore. E nehenehe ’outou e ani e ’ua fa’ata’a-fa’ahou-hia ānei ’outou e te Tara’ehara a Iesu Mesia.
’Ua pūpū mai te hō’ē peropheta o te Atua iā’u i te hō’ē a’o tei hōro’a iā’u te hau. ’Ua pe’ape’a vau nō te mau mā’itira’a a vetahi o te ’ore e ti’a i tō mātou ’utuāfare ’ia vai e a muri noa atu. Nā ’ō mai ra ’oia, « te pe’ape’a nei ’oe nō te hō’ē fifi tano ’ore. ’A ora ma te ti’amā nō te bāsileia tiretiera, ’e mea fa’ahiahia atu ā ïa te mau fa’anahora’a ’utuāfare hau atu i tā ’oe i mana’o ».
Nō te feiā ato’a tei tu’u i te hō’ē ata i ni’a i tō rātou ti’aturira’a, nō te ’itera’a o te ta’ata iho ’e ’aore rā nō te fa’aipoipora’a ’e te mau tamari’i—’e ’aore rā te mo’era’a o te reira, te hōro’a atu nei au i tō’u ’itera’a pāpū : ’Ua ’ite te Metua i te Ao ra ’e ’ua here ’oia ia ’outou ei mau tamari’i vārua Nāna. A ora ai ’outou i pīha’i iho Iāna e Tāna Tamaiti Here hou teie orara’a, ’ua tu’u raua i roto i tō ’outou ’ā’au te tia’ira’a e roa’a ia ’outou te ora mure ’ore. Na roto i te ’ohipa a te mana o te Tara’ehara a Iesu Mesia ’e na roto i te arata’i a te Vārua Maita’i, e nehenehe ’outou e ’ite i teie nei ’e e ’ite ’outou i roto i te ao a muri nei i te here o te ’utuafare o tā tō ’outou Metua ’e Tāna Tamaiti Here e hina’aro rahi ’ia fāri’i ’outou.
Te fa’a’ite pāpū nei au ē ’a ora ai ’outou ma te ti’amā nō te bāsileia tiretiera, te tohura’a i fafauhia ē, « mea fa’ahiahia atu ā te mau fa’anahora’a ’utuāfare i tā ’outou i mana’o » nō ’outou ïa.
© 2016 na Intellectual Reserve, Inc. Fatura’a pāruruhia. Nene’ihia i te fenua Marite. Parau fa’ati’a nō te reo peretāne : 6/15. Parau fa’ati’a nō te ’īritira’a : 6/15. ’Īritira’a nō First Presidency Message, August 2016. Tahitian. 12868 895
Ha’api’ira’a nō roto mai i teie parau poro’i
A feruri e ha’amata ma te parau i te feiā tā ’outou e ha’api’i ra i te hō’ē taime a māuruuru rahi ai ’outou nō te tia’ira’a nō te mau ’utuāfare mure ’ore. ’A ani ia rātou ’ia feruri i te mau taime ’a fāri’i ai rātou i te māuruuru rahi nō te mau ’utuāfare mure ’ore. ’A ani ia rātou e hina’aro ānei rātou e fa’a’ite mai. ’A ani ia rātou i muri iho ’ia feruri i te mau rāve’a nō te ha’amaita’i ’e ’ia ora ti’amā hau a’e nō te bāsileia tiretiera ’ia ti’a i te fafaura’a a te peropheta nō te « mau fa’anahora’a ’utuāfare… e mea fa’ahiahia atu ā i tā ’outou i mana’o » e riro nō rātou.