Rongorongo man te Moan Beretitentii, Aokati 2016
Te Kantaninga ni Karekean te Tangira n te Utu ae akea Tokina
Iroun Beretitenti Henry B. Eyring
Moan Kauntira n te Moan Beretitentii
Man ana bwaintangira ni kabane Tamara are i Karawa ae tangira ae e a tia ni karekea nakoia Natina, te kabanea ni korakora bon te maiu ae akea tokina (taraa D&C 14:7). Te bwaintangira anne bon te maeka ma te Atua ao Ana Rikitemanna inanon utu aika akea tokiia. Ti man ana kabanea n rietata abanuean te Atua, (are te) tiretio, are e na kona n reitinako iai te kabaebae n te maiu n utu.
Ngaira ni kabane ti kantaningaia bwa ti na karekea te kimwareirei ni maeka ma utu aika tangira. Ibukiia tabeman mai ibuakora, bon te namakin ae ti aki tataneiai iai ma ngaia—te namakin ae kona ni karaoaki ma e tuai mani karerekeaki. Ti na bae n tia n nooria ni maiuia tabeman. Ibukiia tabeman mai ibuakora, e a tia te tangira n te utu n taraa ni koaua riki ao ni kakawaki ngkana e a tia ni kamaenakoira te mate mairoun te ataei, te tina, te tari, te titita, ke tiibu aika tangiraki.
Ti a tia ni kabane n namakina te kantaninga are n te bong teuana ao ti kona ni manga namakina riki aia tangira kaain te utu anne ae ti rangin n tangiria ao ngkai e kakai nanora ni kamoamoia riki.
Tamara are i Karawa e atai ara iango, namakin, ao kateira aika raba. Ana kantaninga bwa E na anganiira te kimwareirei (taraa 2 Nibwaai 2:25). Ao ai ngaia are E anga ana bwaintituaraoi Natina ni kona ni karekea te kimwareirei n ana kabaebae te utu ae reitinako n aki toki. Ibukina bwa te Tia Kamaiu e urua ana kabaebae te mate, ti na kona ni karekea te mangauti. Ibukina bwa E kamaiura man ara bure, ti kona, man ara onimaki ao ara rairannano, ni kona n tau n rin n abanuean te tiretio, ike a kabaeaki iai utu n te tangira ae akea tokina.
Te Tia Kamaiu e kanakoa te Burabeti Eria nakon Iotebwa Timiti bwa e na kaoki kingiin te nakoanibonga (taraa D&C 110). Man kiing akanne ao e roko te mwaaka ni kabaebae, are e anga Ana kabanea n rietaata ni bwaintituaraoi te Atua nakoia Natina—te maiu ae akea tokina inanon kabaeakia utu ni kabane n aki toki.
Bon te bwaintituaraoi are a kona natin te Atua ni kabane aika a roko nakon te aonaaba ni karekea. Katenimwakoron Natina aika tamnei aki butimwaea Ana bwaintituaraoi n te aonaaba n tamnei. Ibukin aki taun te onimaki ao e a karekea te kakaitara, a rineia bwa ana aki kona ni kinaa aron kimwareirein ana bwaintituaraoi te Tama are i Karawa n te utu are akea tokina.
Ibukiia naake a bwaati n te ukeuke ae kakawaki are e karaoaki n te aonaaba n tamnei ngaia ake a tau ni karekea te rabwata ae mamate, ti kona ni karaoa te rinerine ae tamaroa ibukin te maiu ae akea tokina. Ngkana ti kakabwaiaaki ni karekea te euangkerio ae kaokaki, ao ti kona n rineia ni karaoa te berita ae tabu ma te Atua are e kona ni kairikiira n tau ibukin te maiu are akea tokina. Ngkana ti kekeiaki ao n teimatoa n onimaki, ao te Tamnei ae Rairoi e na kamatoa ara kantaninga ao ara aki nanokokoraki are ti mena iaon te kawai nakon te maiu ae akea tokina, ni maeka ma utu aika akea tokiia n te abanuea ae te tiretio.
Tabeman aomata, ana bae n aki namakina te kantaninga ae bati ni karekean te kimwareirei ae akea tokina anne. Kaaro, ataei, mwaane, ao aine a na bae n tia ni karaoi rinerine aika ana taraa ni katukaki iai man te maiu are akea tokina. Ko na bae naba n titiraki bwa ko a tia n tau rinanon Ana mwakuri ni kamaiu Iesu Kristo ke ko tuai.
Ana burabeti te Atua e anganai n te taina te reirei are e karekea te rau inanou. I raraoma bwa aia rinerine tabeman a na kona n aki karika au utu bwa te utu ae akea tokina. E taku, “Ko raraomaeakina te kangaanga ae kairua. Ko ti maiuakina te maiu ae tau bwa ko aonga ni karekea te abanuea ae te tiretio, ao te kangaanga n te utu a na rangin n nakoraoi riki nakon ae ko kantaningaia.”
Nakoia ni kabane naake n oin aia atatai ke aia mare ao aia ataei—ke akea buuia ke aia ataei—e kamaunai aia kantaninga (ibukin te maiu ae akea tokina), I anga au kakoaua: bwa te Tama are i Karawa E kinai ao E tangiri ngkami ngkai bon Natina n tamnei ngkami. Ngkai ko maeka ma Ngaia ao Natina ae Moan te Tangiraki imwain te maiu aei, A katikua inanom te kantaninga are ko na karekea n te maiu ae akea tokina. Ma mwaakan Ana Mwakuri ni Kamaiu Iesu Kristo ni mwakuri ao ma ana kairiiri te Tamnei ae Raoiroi, ko kona n namakinna ngkai ao n namakinna n te aonaaba ae na roko ana tangira te utu ae a tangiria Tamam ao te Nati ae tangiraki bwa kam na karekea.
I kakoaua bwa ngkana kam maiuakina te maiu ae tau nakon te abanuea ae te tiretio, te berita ni burabeti are “kangaanga n te utu a na rangin n nakoraoi riki nakon ae ko kantaningaia” e na riki bwa am bwai.
© 2016 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te First Presidency Message, August 2016. Kiribati. 12868 859
Reirei man te Rongorongo aei
Iangoia ni moana am reirei n te mweenga man tuangakiia naake ko reireiniia te tai are ko kakaitau iai ibukin te kantaninga are ko na karekea te utu ae akea tokina. Kaoia bwa ana iangoa te tai are a tia iai n namakina te kakaitau ibukin te utu ae akea tokina. Titirakiniia bwa ana kaota oin aia iango (iaon te rongorongo aei). Ko kona ni kaoia bwa ana iangoi kawai ni katamaroa ao ni maiuakina riki te maiu ae na tau n te abanuea ae te tiretio bwa e aonga te taeka ni berita “kangaanga n te utu … a na rangin n nakoraoi riki nakon ae ko kantaningaia” a kona n riki bwa aia bwai.