Mesaj Premyè Prezidans lan, Out 2016
Esperans Lanmou Fanmi Etènèl
Prezidan Henry B. Eyring
Premye Konseye nan Premye Prezidans lan
Nan pami tout kado Papa eman nou ki nan Syèl la te bay pitit Li yo, pi gwo a se lavi etènèl (Gade D&A 14:7). Kado sa a se pou nou viv nan prezans Bondye Papa a ak Pitit Gason Byenneme li a pou tout tan an fanmi. Se sèlman nan wayòm ki pi wo nan wayòm Bondye yo, wayòm selès la, lyen eman lavi familyal yo ap kontinye.
Nou tout espere lajwa ki genyen nan viv nan fanmi eman. Pou kèk nan nou, se yon santiman nou poko santi—yon santiman nou konnen ki posib men ke nou poko reyalize. Nou ka wè li nan lavi lòt moun. Pou kèk nan nou, lanmou familyal parèt pi reyèl ak pi presye lè lanmò te separe nou avèk yon pitit, yon manman, yon papa, yon frè, yon sè, oubyen yon granparan byenneme.
Nou tout konn santi esperans ke yon jou nou va kapab santi afeksyon manm fanmi sa a nou te tèlman renmen an ankò, ke kounyeya nou ta byen renmen anbrase yon fwa ankò a.
Papa eman nou ki nan Syèl la konn kè nou. Objektif Li se pou Li bannou bonè (Gade 2 Nefi 2:25). Epi Li ban nou don Pitit Gason Li a pou rann lajwa lyen familyal ki dire pou tout tan yo posib. Paske Sovè a te kase chèn lanmò yo, nou ap resisite. Paske Li te ekspye peche nou yo, atravè lafwa nou ak repantans nou,nou kapab vin diy pou wayòm selès la, kote fanmi yo liye ansanm nan lanmou pou tout tan.
Sovè a te voye Pwofèt Eli vin jwenn Joseph Smith pou retabli kle prètriz yo (gade D&A 110). Avèk kle sa yo pouvwa sèlman an te vini, epi avèk sa, pi gwo kado Bondye bay pitit Li yo te vin disponib—lavi etènèl nan fanmi ki liye ansanm pou tout tan.
Se yon òf tout pitit Bonye ki vini nan mond lan ka reklame. Yon tyè nan pitit lespri Li yo te rejte òf Li a nan mond lespri a. Akòz yo te manke lafwa epi apresa yo te fè rebelyon ouvètman, yo te chwazi pou yo pa janm rive konnen lajwa ki genyen nan kado Papa nou ki nan Syèl la ban nou an, fanmi etènèl.
Pou sila nan pami nou yo ki te pase tès enpòtan sa a nan lavi premòtèl la epi ki te kalifye pou resevwa kado yon kò mòtèl la, nou toujou gen chans pou n fè gran chwa sa a ki se lavi etènèl la. Si nou gen benediksyon pou n jwenn levanjil retabli a, nou kapab chwazi pou nou fè epi kenbe alyans avèk Bondye ki kalifye nou pou lavi etènèl. Si nou pèsevere nan fidelite sa a, Sentespri a ap konfime esperans nou ak sètitid nou pou fè nou konnen nou sou chimen lavi etènèl la, pou nou viv an fanmi pou tout tan nan wayòm selès la.
Pou kèk moun, lajwa etènèl sa a kapab sanble yon fèb espwa ki menm ap bese. Paran, pitit, frè, ak sè te gen dwa fè chwa ki sanble diskalifye yo pou lavi etènèl. Ou kapab menm mande tèt ou si w kalifye deja atravè Ekspyasyon Jezikri a.
Yon pwofèt Bondye te ban m yon konsèy yon lè ki ban m lapè. Mwen te enkyè pou chwa lòt moun pa t rann li enposib pou fanmi nou rete ansanm pou tout tan. Li te di, “W ap enkyete w pou fo pwoblèm nan. Jis mennen yon vi ki merite wayòm selès la, epi aranjman familyal yo ap vin pi mèveye pase w ka imajine.”
Pou tout moun eksperyans pèsonnèl yo, oubyen maryaj yo ak pitit yo—oubyen ki pa gen ni konjwen ni pitit—fè yo gen dout olye de espwa, m ap ofri temwayaj mwen: Papa nou ki nan Syèl la konnen w epi Li renmen w antanke pitit lespri Li. Lè w te avèk Li menm ak Pitit Gason Byenneme L la anvan lavi sa a, Yo te mete esperans ou genyen pou lavi etènèl la nan kè w. Avèk pouvwa Ekspyasyon Jezikri a k ap travay epi avèk Sentespri a k ap dirije, ou ka santi lanmou familyal Papa w ak Pitit Gason Byenneme L la sitèlman vle ou jwenn nan kounyeya, epi w pral santi l nan mond k ap vini an tou.
Mwen temwanye ke si nou viv diy pou wayòm selès la, pwomès pwofetik ki di “aranjman familyal yo pral pi mèveye pase sa w ka imajine” a pral aplike pou ou.
© 2016 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/16. Apwobasyon tradiksyon: 6/16. Tradiksyon First Presidency Message, August 2016. Haitian Creole. 12868 036
Ansèyman nan mesaj sa a
Pou komanse, panse pou w rakonte moun w ap anseye yo yon moman nan lavi w kote w te rekonesan pou esperans fanmi etènèl la. Envite yo pou yo reflechi sou moman kote yo te santi gratitid pou fanmi etènèl yo. Mande yo si yo vle pataje. Apresa ou kapab envite yo pou yo panse sou kèk fason pou yo amelyore epi mennen yon vi ki pi diy de wayòm selès la pou pwomès pwofetik “aranjman familyal … pi mèveye pase sa w ka imajine” a kapab aplike pou yo.