Mensahe sang Unang Panguluhan, Agosto 2016
Ang Paglaum sa Wala’y Katapusan nga Paghigugma sa Pamilya
Ni Pangulong Henry B. Eyring
Unang Manuglaygay sa Unang Panguluhan
Sa tanan nga mga dulot nga ginhatag sang aton mapinalanggaon nga Amay nga Langitnon sa Iya mga kabataan, ang pinakadako amo ang kabuhi nga wala’y katapusan (tan-awa sa D&C 14:7). Ang ina nga dulot amo ang magpuyo sa presensya sang Dios nga Amay kag sang Iya Pinalangga nga Anak sa wala’y katapusan sa mga pamilya. Sa pinakamataas gid lamang sang mga ginharian sang Dios, ang selestiyal, nga ang mapinalanggaon nga mga kaangtanan sang pamilya magapadayon.
Tanan kita nagalaum sang kalipay sa pagkabuhi kaupod ang mapinalanggaon nga mga pamilya. Para sa iban sa aton, isa ini ka balatyagon nga wala naton naeksperiyensyahan—isa ka balatyagon nga aton nahibaloan nga posible apang wala pa maagom. Mahimo nga aton na ini nakita sa mga kabuhi sang iban. Para sa iban sa aton, ang gugma sa pamilya nangin mas matuod-tuod kag malahalon sang ang kamatayon nagseparar sa aton gikan sa isa ka anak, isa ka iloy, isa ka amay, isa ka utod, ukon sa isa ka mapinalanggaon kag pinalangga nga lolo ukon lola.
Aton tanan nabatyagan ang paglaum nga sa pila ka adlaw aton liwat mabatyagan ang mainit nga pagpalangga sinang miyembro sang pamilya nga palangga naton kaayo kag karon gusto gid naton nga mahakos sa liwat.
Ang aton Amay nga Langitnon nakahibalo sang aton mga tagipusuon. Ang iya tinutuyo amo nga hatagan kita sing kalipay (tan-awa sa 2 Nefi 2:25). Kag gani ginhatag Niya ang dulot sang Iya Anak agud nga mangin posible ang kalipayan nga dala sang mga kaangtanan sang pamilya nga nagapadayon sa wala’y katapusan. Tungod ginbugto sang Manluluwas ang mga higot sang kamatayon, mabanhaw kita. Tungod Iya ginbayaran ang aton mga sala, sarang kita, paagi sa aton pagtuo kag paghinulsol, mangin nagakabagay sa selestiyal nga kaharian, kon sa diin ang mga pamilya nahugpong sa paghigugma sa wala’y katapusan.
Ginpadala sang Manluluwas si Propetang Elias sa kay Joseph Smith agud ipanumbalik ang mga yabi sang priesthood (tan-awa sa D&C 110). Sa amo nga mga yabi nag-abot ang gahum sa paghugpong, nga nagatanyag sang pinakadako nga dulot sang Dios para sa Iya mga anak—kabuhi nga wala’y katapusan sa mga pamilya nga nahugpong sa wala’y katapusan.
Isa ini ka tanyag nga mahimo makuha sang tagsa ka anak sang Dios nga magakari sa sini nga kalibutan. Katluan sang Iya mga anak nga espiritu ang nagsikway sang Iya tanyag sa kalibutan sang mga espiritu. Bangud sa kakulang sang pagtuo kag hayag nga rebelyon, ginpili nila nga indi matilawan ang kalipay sang dulot sang Amay nga Langitnon nga wala’y katapusan nga mga pamilya.
Para sa aton nga nakapasar sa importante nga pagtilaw sa kabuhi antes sa kalibutan kag nangin angayan nga magbaton sang dulot sang mortal nga mga lawas, ang dako nga pagpili sa kabuhi nga wala’y katapusan yara sa gihapon sa aton kon aton luwag nga himuon. Kon bugayan kita nga masalapuan ang ginpanumbalik nga ebanghelyo, mahimo naton nga pilion ang paghimo kag pagtipig sang mga kasugtanan sa Dios nga magahanda sa aton para sa kabuhi nga wala’y katapusan. Sa aton pagpadayon sa sina nga katutum, ang Balaan nga Espiritu magapat-od sang aton paglaum kag pagpati nga yara kita sa dalan padulong sa kabuhi nga wala’y katapusan, sa pagkabuhi sa mga pamilya sa wala’y katapusan sa selestiyal nga ginharian.
Para sa iban, ang wala’y katapusan nga kalipay mahimo nga buron ukon bisan pa gani isa ka nagakadula nga paglaum. Ang mga ginikanan, mga kabataan, kag mga kauturan sarang nga nakahimo sang mga pagpili nga ayhan indi nagakabagay para sa kabuhi nga wala’y katapusan. Mahimo nga nagahunahuna ka man kon bala nangin nagakaangay ka na paagi sa Pagpasag-uli ni Jesucristo.
Isa sadto ka propeta sang Dios ang nagtanyag sa akon sang laygay nga nagahatag sa akon sing katawhay. Nagakabalaka ako nga ang mga pagpili sang iban sarang maghimo nga imposible para sa amon pamilya nga mangin magkaupod sa wala’y katapusan. Siling niya, “Nagapalibog ka parte sa sala nga problema. Kinahanglan mo lang nga magmangin bagay sa selestiyal nga ginharian, kag ang mga pagkahamtang sang pamilya mangin mas labing manami sangsa imo sarang mahunahuna.”
Sa tanan sadtong ang personal nga inagihan ukon pag-asawahay kag kabataan—ukon ang pagka-wala sini—nagakulap sang ila mga paglaum, ginatanyag ko ang akon pagsaksi: Ang Amay nga Langitnon nakahibalo kag nagapalangga sa inyo bilang Iya anak nga espiritu. Samtang kaupod ninyo Sia kag ang Iya Pinalangga nga Anak antes sa sining kabuhi, ginpahamtang Nila sa inyo tagipusuon ang paglaum nga yara sa inyo para sa kabuhi nga wala’y katapusan. Paagi sa paghikot sang gahum sang Pagpasag-uli ni Jesucristo kag upod ang Balaan nga Espiritu nga nagagiya, inyo na karon mabatyagan kag mabatyagan sa magaabot nga kalibutan ang paghigugma sang pamilya nga luyag gid sang Amay kag sang Iya Pinalangga nga Anak nga inyo mabaton.
Nagasaksi ako nga kon magkabuhi kamo nga nagakaangay sa selestiyal nga ginharian, ang manalagnaon nga promisa nga “ang mga pagkahamtang sang mga pamilya mangin mas labing manami sangsa imo sarang mahunahuna” mangin inyo.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, August 2016. Hiligaynon. 12868 861
Pagtudlo gikan sa Sining Mensahe
Binagbinaga ang pag-umpisa paagi sa pagsugid sa ila nga inyo ginatudloan sang tion nga nangin mapinasalamaton kamo tungod sa paglaum para wala’y katapusan nga mga pamilya. Agdaha sila sa pagbinagbinag sang mga tinion sang ila nabatyagan ang pagpasalamat para sa wala’y katapusan nga mga pamilya. Pamangkuta sila kon luyag nila magpaambit. Mahimo ninyo dayun nga agdahon sila sa pagpanumdum sang mga pamaagi sa pagpauswag kag pagkabuhi sing mas labing nagakabagay sa selestiyal nga ginharian agud ang manalagnaon nga promisa sang “mga pagkahamtang sang pamilya…mas labing manami sangsa imo sarang mahunahuna” sarang nga mangin inyo.