Mensahe sa Visiting Teaching, Agosto 2016

Magkaupod sa Pag-atipan sang mga Pamilya

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.

Pagtuo, Pamilya, Bulig

Ang “bana kag asawa may sagrado nga resposibilidad sa paghigugma kag pag-atipan sa isa kag isa kag sa ila mga kabataan.”¹ “Ang puluy-an amo ang laboratoryo sang Dios sang gugma kag pag-alagad,” siling ni Pangulong Russell M. Nelson, Pangulo sang Korum sang Napulo’g Duha ka mga Apostoles.

“Luyag sang aton Amay nga Langitnon nga ang mga bana kag mga asawa mangin tampad sa isa kag isa kag sa pagkabig kag pagtratar sa ila mga kabataan bilang isa ka palanublion sa Ginuo.”²

Sa Libro ni Mormon, si Jacob nagsiling nga ang gugma nga may yara ang mga bana para sa ila mga asawa, ang gugma nga may yara ang mga asawa para sa ila mga bana kag ang gugma nga may yara sila nga duha para sa ila mga kabataan amo ang isa sa mga rason nga ang mga Lamanhon sa isa ka punto mas labi nga nangin matarong sangsa mga Nefinhon (tan-awa sa Jacob 3:7).

Isa sa pinakamaayo nga paagi sa pag-agda sang gugma kag paghilisanto sa aton mga puluy-an amo ang paghambal sing malulo sa mga miyembro sang aton pamilya. Ang paghambal sing malulo nagadala sang Balaan nga Espiritu. Si Sister Linda K. Burton, ang kabilogan nga pangulo sang Relief Society, nagpangabay sa aton sa pagbinagbinag: “Ano kasunson kita hungod nga ‘nagahambal sing malulo nga mga pulong sa isa kag isa’?”³

Dugang nga Balaan nga mga Kasulatan

Mga Taga-Roma 12:10; Mosias 4:15; tan-awa sa Doctrine and Covenants 25:5

Istorya Gikan sa Matuod-tuod nga Kabuhi

Si Elder D. Todd Christofferson sang Korum sang Napulo’g Duha ka mga Apostoles nagpaambit sang isa ka inagihan sang bata pa sia nga nagpabatyag sa iya sang kaimportansya sang isa ka mapinalanggaon nga pamilya. Sang sia kag ang iya utod nga mga lalaki mga bata pa, ang ila iloy nag-agi sa isa ka dako nga operasyon sa kanser nga nangin masakit kaayo sa iya ang paggamit sang iya tuo nga butkon. Sa isa ka pamilya nga puro lalaki, pirme ang pagpamalantsa, apang samtang ang ila iloy nagapamalantsa, masami sia nga nagauntat kag magkadto sa kwarto kag maghibi tubtob nga magkanay-kanay ang sakit.

Sang matukiban sang amay ni Elder Christofferson ang nagakatabo, likom sia nga wala nagakaon sang panyaga sang halos isa ka tuig agud makabakal sang makina para nga ang pagpamalantsa mangin mahapos. Tungod sang iya gugma sa iya asawa, nagpakita sia sing isa ka halimbawa sang pag-atipan sa sulod sang iya pamilya para sa iya anak nga mga lalaki. Sa sining mapinalanggaon nga aksyon, si Elder Christofferson nagsiling, “Wala ako nakahibalo sang pagsakripisyo kag buhat sang gugma sang akon amay para sa akon iloy sadto nga tion, apang karon nga akon na nahibaloan, ginasiling ko sa akon kaugalingon, ’‘Amo ina ang isa ka lalaki.’”⁴

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, August 2016. Hiligaynon. 12868 861

Binagbinaga Ini

Paano bala ang pagpalangga kag pag-atipan sa isa kag isa nagaagda sang Espiritu sa aton mga puluy-an?