Mensahe ti Umuna a Panguluen, Agosto 2016
Ti Namnama ti Agnanayon nga Ayat ti Pamilia
Ni Presidente Henry B. Eyring
Umuna a Mammagbaga iti Umuna a Panguluen
Kadagiti amin a sagut ti Nailangitan nga Amatayo nga impaayna kadagiti annakna, biag nga agnanayon ti kapatgan (kitaen iti DkK 14:7). Dagiti adda iti daytoy a pagarian ket agnaeddanto iti agnanayon iti sidong ti Dios nga Ama ken ti Anakna a ni Hesucristo. Iti laeng kangangatuan kadagiti pagarian ti Dios, ti Celestial, nga agtultuloy dagiti panagiinnayat iti biag ti pamilia.
Mangnamnamatayo amin para iti rag-o iti panagbiag kadagiti agpipinnateg a pamilia. Kaadduan kadatayo, maysa daytoy a rikna a ditay pay napadasan- rikna a sumangbay ngem saan pay a dimteng. Nakitatayon daytoy kadagiti biag dagiti dadduma. Para kadagiti dadduma kadatayo, ti ayat iti pamilia ket kasla napudpudno ken napatpateg no ti patay ket isinanatayo iti maysa nga ubing, ina, ama, kabsat a lalaki, kabsat a babai wenno ay-ayaten ken dungdunguen nga apong.
Nariknatayo amin ti namnama nga addanto aldaw a mariknatayonto manen ti nabara a kinadungngo dayta a kameng ti pamilia nga inay-ayattayo unay ngem itan ket nasakit nga arakupen manen.
Ammo ti Nailangitan nga Amatayo dagiti pusotayo. Ti panggepna ket mangted kadatayo iti ragsak (kitaen ti 2 Nephi 2:25). Isu nga intedna ti sagut ti Anakna tapno mapagbalinna ti rag-o kadagiti begkes ti pamilia ket agtultuloy iti agnanayon. Gapu ta winarwar ti Mangisalakan dagiti begkes ti patay, agungartayonto. Gapu ta Sinubbotna dagiti basoltayo, kabalinantayo, babaen iti pammati ken panagbabawitayo, ti agbalin a maikari iti celestial a pagarian, a sadiay dagiti pamilia ket mabegkes a sangsangkamaysa iti ayat nga agnanayon.
Inbaon ti Mangisalakan ni Propeta Elias kenni Joseph Smith a mangisubli kadagiti tulbek ti priesthood (kitaen DkK 110). Kadagitoy a tulbek immay ti bileg ti panangbegkes, a mangidiaya iti kadadaklan a sagut ti Dios kadagiti annakna- biag nga agnanayon kadagiti pamilia a napagmaymaysa inggat-inggana.
Maysa daytoy a diaya a mabalin a sakadaen ti tunggal anak ti Dios nga umay ditoy lubong. Apagkatlo kadagiti espiritu nga Annakna ket iniddianda ti diayana idiay lubong ti espiritu. Ti kinaawan ti umdas a pammati ken nawaya a panagsupiat, pinilida ti di mangammo ti rag-o dagiti agnanayon a pamilia a sagut ti Nailangitan nga Ama.
Para kadatayo a nakapasa iti naiget a pannubok, sakbay iti mortal a biag sadiay lubong ti espiritu, tapno napatgan nga umawat iti sagut kadagiti mortal a bagi, adda pay la kadatayo ti naindaklan a mangpili iti biag nga agnanayon. No nabendisionantayo a mangbirok iti naisubli nga ebanghelio, mapilitayo nga aramiden ken tungpalen dagiti karitayo iti Dios tapno mapatgan iti biag nga agnanayon. Iti panagibturtayo iti dayta a kinamanamati, paneknekan ti Nasantoan nga Espiritu ti namnama ken talektayo nga adda iti dalan iti biag nga agnanayon, tapno agindeg nga agnanayon kadagiti pamilia iti Pagarian a Celestial.
Para iti sumagmamano, ti agnanayon a rag-o ket narigaten a magun-od wenno mapukpukawen a namnama. Adda dagiti maaramid a panagpili dagiti nagannak,annak, ken kakabsat a kasla makaigapu iti saanda a pannakaikari iti biag nga agnanayon. Agduaduakayo pay ketdi no saankayo pay a maikari babaen ti Pannubbot ni Jesucristo.
Maysa a Propeta ti Dios ti naminsan a nangidiaya kaniak ti pammagbaga a nakaited kaniak iti kappia. Naburiburanak idi a baka dagiti pili dagiti dadduma ket mamagbalin nga imposible para iti pamiliatayo nga agbalin a sangsangkamaysa iti agnanayon. Kinunana, “Maburiburankayo maipanggep iti di umiso a problema. No agbiagka laeng a maikari iti Pagarian a Celestial, dagiti pannakaurnos ti pamilia ket ad-adda a nakaskasdaaw ngem iti inka impagarup.”
Kadagiti addaan iti personal a padas wenno ti kallaysa ken annakda- wenno no awan man dagitoy- ket agduaduada kadagiti namnama, idiayak ti pammaneknekko: Ti Nailangitan nga Ama ket amammonaka ken ay-ayatennaka a kas espiritu nga Anakna. Idi addaka Kenkuana ken ti Ipatpategna nga Anak sakbay daytoy a biag, inlugarnan iti pusom ti namnama nga adda kenka ti biag nga agnanayon. Ti panagobra ti bileg ti Pannubbot ni Jesucristo ken ti pannarabay ti Nasantoan nga Espiritu, mariknam itan ken mariknamto iti lubong nga umay ti ayat iti pamilia a kalkalikaguman unay ti Amam ken ti Patpatgenna nga Anak a maawatmo.
Paneknekak a no agbiagka a maikari iti Pagarian a Celestial, ti kari ti propeta a “dagiti pannakaurnos ti pamilia ket ad-adda a nakaskasdaaw ngem iti inka impagarup” ket bagimto.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, August 2016. Ilokano. 12868 864
Panangisuro manipud iti daytoy a Mensahe
Ibilangmo iti panagirugim babaen ti inka panangibaga kadagiti isurom ti kanito a sika ket napnuan panagyaman iti namnama kadagiti agnanayon a pamilia. Awisem ida a mangutob kadagidi kanito a nariknada ti kinamanagyaman kadagiti agnanayon a pamilia. Saludsodem no kayatda nga ibinglay. Maawismo idan a mangpanunot kadagiti wagas tapno agsayaat ken agbiag a maikari iti pagarian a celestial tapno ti kari ti propeta a “dagiti pannakaurnos ti pamilia ket ad-adda a nakaskasdaaw ngem iti inka impagarup” ket bagidanto.