សារលិខិតគណៈប្រធានទីមួយ ខែ សីហា ឆ្នាំ ២០១6
សេចក្ដីសង្ឃឹមនៃសេចក្ដីស្រឡាញ់ក្នុងគ្រួសារដ៏អស់កល្បជានិច្ច
ដោយ ប្រធាន ហិនរី ប៊ី អាវរិង
ទីប្រឹក្សាទីមួយក្នុងគណៈប្រធានទីមួយ
អស់ទាំងអំណោយទានដែលព្រះវរបិតាសួគ៌ជាទីស្រឡាញ់របស់យើងបានប្រទានដល់កូនចៅរបស់ទ្រង់ នោះជីវិតដ៏អស់កល្បជានិច្ចគឺជាអំណោយដ៏អស្ចារ្យជាងគេបំផុត ( សូមមើលគ. និង ស. ១៤:៧ ) ។ អំណោយទាននោះគឺដើម្បីរស់នៅក្នុងវត្តមានរបស់ព្រះ ជាព្រះបិតា និងព្រះរាជបុត្រាសំណព្វរបស់ទ្រង់ជារៀងរហូតជាក្រុមគ្រួសារ ។ មានតែនៅក្នុងនគរសេឡេស្ទាលជានគររបស់ព្រះដ៏ខ្ពស់បំផុតប៉ុណ្ណោះ ដែលចំណងសេចក្ដីស្រឡាញ់ក្នុងជីវិតគ្រួសារបន្ដមាន ។
យើងទាំងអស់គ្នាសង្ឃឹមចង់បានអំណរនៃការរស់នៅក្នុងគ្រួសារជាទីស្រឡាញ់ ។ សម្រាប់ពួកយើងមួយចំនួន វាគឺជាអារម្មណ៍មួយ ដែលយើងពុំធ្លាប់មានបទពិសោធន៍--ជាអារម្មណ៍មួយដែលយើងដឹងថាអាចមាន ប៉ុន្តែពុំទាន់ក្លាយជាការពិតនៅឡើយ ។ យើងអាចនឹងបានឃើញវាមាននៅក្នុងជីវិតរបស់មនុស្សដទៃទៀត ។ សម្រាប់ពួកយើងមួយចំនួនទៀត សេចក្ដីស្រឡាញ់ក្នុងគ្រួសារ ហាក់ដូចជាមានពិតជាក់ស្ដែង និងមានតម្លៃ នៅពេលដែលសេចក្ដីស្លាប់បានបំបែកយើងពីកូន ពីម្ដាយ ពីឪពុក ពីបងប្អូនប្រុស ពីបងប្អូនស្រី ឬជីដូនជីតាជាទីស្រឡាញ់ និងសំណព្វរបស់យើង ។
យើងទាំងអស់គ្នាមានសេចក្ដីសង្ឃឹមថានាថ្ងៃណាមួយ យើងអាចទទួលអារម្មណ៍នៃក្ដីស្រឡាញ់យ៉ាងកក់ក្ដៅជាថ្មីម្ដងទៀតពីសមាជិកគ្រួសារដែលយើងស្រឡាញ់យ៉ាងខ្លាំង ដោយឱបក្រសោបទាំងក្តីឈឺចាប់សារជាថ្មីម្តងទៀតក្រសោ ។
ព្រះវរបិតាសួគ៌ជាទីស្រឡាញ់របស់យើងស្គាល់ពីដួងចិត្តរបស់យើង ។ ព្រះទ័យរបស់ទ្រង់គឺប្រទានសុភមង្គលដល់យើង ( សូមមើលនីហ្វៃទី ២ ២:២៥ ) ។ ហើយដូច្នោះ ទ្រង់បានប្រទានអំណោយជាព្រះរាជបុត្រារបស់ទ្រង់ដើម្បីធ្វើឲ្យកើតមានអំណរក្នុងចំណងគ្រួសារដែលបន្ដមានជារៀងរហូត ។ ដោយសារព្រះអង្គសង្គ្រោះបានផ្ដាច់ចំណងនៃសេចក្ដីស្លាប់ នោះយើងនឹងត្រូវបានរស់ឡើងវិញ ។ ដោយសារទ្រង់បានធ្វើដង្វាយធួនសម្រាប់អំពើបាបរបស់យើងនោះយើងអាចប្រែក្លាយទៅជាមានភាពសក្ដិសមចំពោះនគរសេឡេស្ទាលជាកន្លែងដែលក្រុមគ្រួសារត្រូវបានចងភ្ជាប់នឹងគ្នានៅក្នុងសេចក្ដីស្រឡាញ់ជារៀងរហូតតាមរយៈសេចក្ដីជំនឿ និងការប្រែចិត្តរបស់យើង ។
ព្រះអង្គសង្គ្រោះបានបញ្ជូនព្យាការីអេលីយ៉ាទៅជួបយ៉ូសែប ស្ម៊ីធ ឲ្យស្ដារកូនសោបព្វជិតភាពឡើងវិញ ( សូមមើលគ. និងស. ១១០ ) ។ ដោយសារតែកូនសោទាំងនោះ ទើបនាំឲ្យមាននូវអំណាចនៃការផ្សារភ្ជាប់ ដែលបានប្រទានឲ្យជាអំណោយដ៏មហិមាបំផុតរបស់ព្រះទៅដល់កូនចៅរបស់ទ្រង់–ជាជីវិតអស់កល្បជានិច្ចនៅក្នុងចំណងក្រុមគ្រួសារជារៀងរហូតតទៅ ។
វាគឺជាការប្រទានឲ្យមួយដែលកូនចៅគ្រប់រូបរបស់ព្រះដែលបានកើតមកកាន់ពិភពលោកនេះអាចទាមទារយកបាន ។ កូនចៅខាងវិញ្ញាណរបស់ទ្រង់មួយភាគបី បានបដិសេធការប្រទានឲ្យរបស់ទ្រង់កាលនៅក្នុងពិភពវិញ្ញាណ ។ ដោយសារតែការខ្វះនូវសេចក្ដីជំនឿគ្រប់គ្រាន់ បន្ទាប់មកកើតមាននូវការបះបោរ ដោយ បើកចំហ ពួកគេបានជ្រើសរើសមិនចង់ស្គាល់ពីអំណរនៃអំណោយទាននៃក្រុមគ្រួសារដ៏អស់កល្បជានិច្ចរបស់ព្រះវរបិតាសួគ៌ ។
ចំពោះពួកយើងទាំងឡាយណាដែលបានឆ្លងកាត់ការសាកល្បងដ៏សំខាន់នៅក្នុងពិភពវិញ្ញាណមុនជីវិតរមែងស្លាប់ ហើយសក្ដិសមដើម្បីទទួលអំណោយនៃរូបកាយជីវិតរមែងស្លាប់ នោះជម្រើសដ៏ល្អបំផុតនៃជីវិតអស់កល្បជានិច្ច គឺនៅតែជារបស់យើងដើម្បីជ្រើសរើស ។ ប្រសិនបើយើងត្រូវបានប្រទានពរឲ្យរកឃើញដំណឹងល្អដែលបានស្ដារឡើងវិញ នោះយើងអាចជ្រើសរើសដើម្បីធ្វើ និងរក្សាសេចក្ដីសញ្ញាជាមួយព្រះដែលនាំឲ្យយើងសក្ដិសមចំពោះជីវិតអស់កល្បជានិច្ច ។ នៅពេលយើងស៊ូទ្រាំដោយស្មោះត្រង់ នោះព្រះវិញ្ញាណបរិសុទ្ធនឹងបញ្ជាក់ពីសេចក្ដីសង្ឃឹម និងទំនុកចិត្តថាយើងស្ថិតនៅលើផ្លូវទៅកាន់ជីវិតដ៏អស់កល្បជានិច្ច ដើម្បីរស់នៅជាក្រុមគ្រួសារជារៀងរហូតនៅក្នុងនគរសេឡេស្ទាល ។
ចំពោះមនុស្សមួយចំនួន អំណរដ៏អស់កល្បជានិច្ចនោះអាចនឹងហាក់ដូចជា ជាសេចក្ដីសង្ឃឹមដែលមិនច្បាស់លាស់ ឬរលត់ទៅបន្ដិចម្ដងៗ ។ ឪពុកម្ដាយ កូនចៅ បងប្អូនប្រុស និងបងប្អូនស្រី អាចនឹងធ្វើការជ្រើសរើសជាច្រើនដែលហាក់ដូចជាពុំឲ្យពួកគេសក្ដិសមនឹងជីវិតអស់កល្បជានិច្ច ។ អ្នកអាចនឹងងឿងឆ្ងល់ផងដែរថាតើអ្នកបានសក្ដិសមតាមរយៈដង្វាយធួននៃព្រះយេស៊ូវគ្រីស្ទហើយឬនៅ ។
ព្យាការីរបស់ព្រះម្នាក់បានផ្ដល់ការប្រឹក្សាដល់ខ្ញុំ ដែលផ្ដល់ជាភាពសុខសាន្ដដល់ខ្ញុំ ។ ខ្ញុំបានបារម្ភថា ការជ្រើសរើសរបស់អ្នកដទៃទៀតអាចនឹងធ្វើឲ្យគ្រួសាររបស់យើងមិនអាចនៅជាមួយគ្នាជារៀងរហូតបាន ។ លោកបានមានប្រសាសន៍ថា « អ្នកកំពុងបារម្ភអំពីបញ្ហាខុសឆ្គង ។ អ្នកគ្រាន់តែរស់នៅសក្ដិសមនឹងនគរសេឡេស្ទាលទៅបានហើយ នោះការរៀបចំគ្រួសាររបស់អ្នកនឹងកាន់តែអស្ចារ្យជាងដែលអ្នកអាចនឹកគិតដល់ទៅទៀត » ។
ចំពោះអស់អ្នកដែលជួបនឹងបញ្ហាផ្ទាល់ខ្លួន ឬអវត្តមានដៃគូ និងកូនចៅ–ឬ–បាត់បង់ក្ដីសង្ឃឹមរបស់ពួកគេ ខ្ញុំសូមធ្វើជាសាក្សីថា ៖ ព្រះវរបិតាសួគ៌ស្គាល់ ហើយស្រឡាញ់អ្នកជាកូនវិញ្ញាណរបស់ទ្រង់ ។ ខណៈដែលអ្នកនៅជាមួយទ្រង់ និងព្រះរាជបុត្រាសំណព្វរបស់ទ្រង់ ពីមុនជីវិតនេះ ពួកទ្រង់បានដាក់ក្តីសង្ឃឹមនៅក្នុងចិត្តរបស់អ្នកថាអ្នកមានជីវិតអស់កល្បជានិច្ច ។ ដោយព្រះចេស្តានៃដង្វាយធួនរបស់ព្រះយេស៊ូវគ្រីស្ទ ធ្វើការ ហើយដោយព្រះវិញ្ញាណបរិសុទ្ធដឹកនាំ នោះអ្នកអាចទទួលអារម្មណ៍ដឹកនាំពេលនេះ ហើយនឹងទទួលអារម្មណ៍ដឹងនៅក្នុងបរលោកនាយថាសេចក្ដីស្រឡាញ់ក្នុងគ្រួសារគឺជាអ្វីដែលព្រះវរបិតាសួគ៌ និងព្រះរាជបុត្រាសំណព្វរបស់ទ្រង់ សព្វព្រះទ័យចង់ឲ្យអ្នកទទួលយ៉ាងខ្លាំង ។
ខ្ញុំសូមថ្លែងទីបន្ទាល់ថានៅពេលអ្នករស់នៅដោយសក្ដិសមនឹងនគរសេឡេស្ទាល នោះការសន្យារបស់ព្យាការីថា « នោះការរៀបចំគ្រួសាររបស់អ្នកនឹងកាន់តែអស្ចារ្យជាងដែលអ្នកអាចនឹកគិតដល់ទៅទៀត » នឹងជារបស់អ្នក ។
© 2016 by Intellectual Reserve, Inc. All rights reserved. ។ បោះពុម្ពនៅ ស.រ.អា. ។ អនុមតិជាភាសាអង់គ្លេស៖៦/១6 ។ អនុមតិការបកប្រែ៖៦/១6 ។ ការបកប្រែនៃ First Presidency Message, August 2016 ។ Cambodian ។ 12868 258
ការបង្រៀនចេញពីសារលិខិតនេះ
ចូរពិចារណាចាប់ផ្ដើមដោយការប្រាប់ដល់អ្នកទាំងឡាយដែលអ្នកបង្រៀនអំពីគ្រាមួយ ដែលអ្នកមានអំណរគុណចំពោះសេចក្ដីសង្ឃឹមអំពីក្រុមគ្រួសារដ៏អស់កល្បជានិច្ច ។ សូមអញ្ជើញពួកគេឲ្យពិចារណាអំពីគ្រាទាំងឡាយដែលពួកគេមានអារម្មណ៍ដឹងគុណចំពោះក្រុមគ្រួសារដ៏អស់កល្បជានិច្ច ។ ចូរសួរដល់ពួកគេ ប្រសិនបើពួកគេចង់ចែកចាយ ។ បន្ទាប់មកអ្នកអាចអញ្ជើញពួកគេឲ្យគិតអំពីរបៀបដើម្បីកែលម្អ ហើយរស់នៅកាន់តែមានភាពសក្ដិសមនឹងនគរសេឡេស្ទាល ដើម្បីឲ្យការសន្យារបស់ព្យាការីអំពី « ការរៀបចំក្រុមគ្រួសារនឹងកាន់តែអស្ចារ្យជាងដែលអ្នកអាចនឹកគិតដល់ទៅទៀត … » អាចជារបស់ពួកគេ ។