Poraus seni ewe Aewin Presetensi, September 2016
Mwirin Tong, Iwe Met?
Seni Preseten Dieter F. Uchtdorf
Aruemonun Chon Aninnis non ewe Aewin Presetensi
Nouch Achengicheng soufos, Preseten Thomas S. Monson, a aitikch pwe “tong ina ewe wesewesen auchean mettoch ren ewe kapas allim.”1
Tong a fokkun namot ina pwata Jises a eita ngeni “ewe annuk a fakkun napanap o auchea” me a apasa pwe pwan iteitan kinikinin ewe annuk me kapasen ekkewe soufos a anongonong won.2
Tong ina ewe auchean amwasangen mettoch meinisin sia fori non ewe Mwichefen. Meinisin kokkot, meinisin mwich, meinisin mokutukut kich sia winiti chon tapweno mwirin Jises Kraist sipwe mokutuno won ei napanap—pun ika ese wor tong ennet, “ewe tong an Kraist mi unusoch,” ese wor namotach.3
Nupwen sia weweiti ei fiti ekiekich me netipach, nupwen sia affata ach tong fan iten Kot me fan iten chiechiach aramas—met mwirin?
Ach mefi umoumoch me tong fan iten ekkoch mi naf? Ach affata ach tong fan iten Kot me chon oruch mi emenemenochu wisach ngeni Kot?
Ewe Kapas Monomon ussun ekkewe Ruemon Nau At
Ren ewe tempel non Jerusalem, ekkewe meinapen pris me elter ren ekkewe chon Jew ra fein ngeni Jises ar repwe sara I non An kewe kapas. Ewe Chon Amanau, a nupeni ekkewe chepen ngenir ren an a aporousa ew porous.
“Emon mwan pwan ruemon noun at,” I a poputa. Ewe sam a feinno ngeni ewe aemonun me a ureni pwe epwe no angang non ewe atake. Nge ewe nau ese mochen. Mwirin ewe nau “a aier, me a feino.”
Mwirin ewe sam a feino ren noun ewe aruomonun at me a ureni pwe epwe no angang non ewe atake. Noun ewe aruomonun at a affata ngeni pwe epwe feinno, nge ese feinno.
Mwirin ewe Chon Amanau a kunu ngeni ekkewe pris me elter o a eis, “Menni nein ekkewe ruemon nau at a fori mochenin semer ewe?”
Ra tipeew ngeni pwe ewe aemonun nau—ewe emon a apasa pwe esap feinno nge mwirin a aier o a feinno angang non ewe atake.4
Ewe Chon Amanau a aea ei porous an epwe pwarano ew auchean nongonong—pwe ion ekkewe ra anneasochis ekkewe annuk ikana ir ra ennetin tongei Kot.
Meni iei popun Jises a ureni ekkewe aramas ar repwe rongorong ngeni me aponueta ekkewe kapasen ekkewe Pharisee me nikopuru nge resap apiru ar pisekin apiru.5 Ekkei sensen namanam rese affatana ewe kapas. Ra sani ar repwe porous ussun namanam, nge atongan pwe rese sinei auchean.
Mokutun me Manau Esemuch
Non ew me nein an ewe Chon Amanau amuchunon nesen ngeni Noun kewe chon kuno, I a urenir ussun ewe amuchunon kapung. Ekkewe mi tipis me ekkewe mi tupwon repwe kaimu fesen. Ekkewe mi murinno repwene ani manau ese much; ekkewe mi ngaw repwene feino ngeni niwinin ar tipis feinfeino.
Met sokofesenin nefinen ekkewe ruu mwich?
Ekkewe ra pwarano ar tong non foffor ra manau. Ekkewe rese pwarano ra feiengaw.6 Ennetin ekkesiwin ngeni ewe kapas allimen Jises Kraist me auchean me nongonongun epwe pwano ren ach foffor non manawach.
Non ewe soponon, pwarano tong fan iten Kot me chiechiach aramas esap otufichikich ngeni manau ese much. Pun, ussun Jises a aitikich, “esap aramas meinisin mi kan kori ngeni ei, Samon, Samon, repwe tonong non ewe muun nang; nge ir ekkewe chok mi fori netipen Semei we non nang.”7
Met A Feito mwirin Tong?
Pwonuen ewe kapas eis “Mwirin tong, iwe met? a tongeni mecheres me wenecharano. Ika sia ennetin tongei ewe Samon, sipwe awena netipach ngeni I iwe mwirin sia fetan non ewe anen chon tapweno mwirin. Nupwen sia tongei Kot, sipwe achocho ne apwonueta An kewe annuk.8
Ika sia ennetin tongei chiechiach aramas, sia fangeno inisich ne anisi “ekkewe mi osupwang me ekkewe mi mochen ach aninis, ekkewe mi samaw me osukosuk.”9 Pun ir kewe ra fori ekkei fofforun umoumoch me aninis,10 ussun chok ir chon tapweno mwirin Jises Kraist.
Iei met a feito mwirin tong.
Iei ewe aucheanapen ewe kapas allimen Jises Kraist.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/16. Kapungunon awewen: 6/16. Awewen First Presidency Message, September 2016. Chuukese. 12869 901
Afanafan seni Ei Poraus
Preseten Uchtdorf a awewei ennetin chon tapweno mwirin Jises Kraist pwe ir ekkewe ra pwarano ar tong fan Itan me fan iten ekkoch non ar foffor. A aitikich pwe “ika sia ennetin tongei ewe Chon Amanau, sipwe awena netipach ngeni I iwe mwirin sia fetan non ewe anen chon tapweno mwirin.” Ekieki om kopwe ureni ekkewe ka aitir non met anen an tong a amwasanger ar repwe fetan non ewe anen chon tapweno mwirin Jises. Ka tongeni pwan aporousa ngenir ussun met om sinei. Ka tongeni ekieki om kopwe urenir repwe iotek ren ennetin tong me pochokun ar repwe pwarano ussun tong.