Mesaj Premye Prezidans lan, Septanm 2016
Kisa ki vini apre lanmou?
Prezidan Dieter F. Uchtdorf
Dezyèm Konseye nan Premye Prezidans lan
Pwofèt Byeneme nou an, Prezidan Thomas S. Monson, te anseye “lanmou se vrè esans levanjil la.”1
Lanmou sitèlman enpòtan ke Jezi rele l “kòmandman ki pi gwo ak pi konsekan” an epi li di tout lòt eleman lalwa a ak tout pawòl pwofèt yo depann de li.2
Lanmou se motivasyon santral pou tout sa n ap fè nan Legliz la. Chak pwogram, chak reyinyon, chak aksyon nou fè antanke disip Jezikri dwe sòti nan karakteristik sa a—paske san charite, “ki se amou pi Kris la,” nou pa anyen.3
Lè nou fin konprann sa nan lespri nou ak nan kè nou, lè nou fin deklare lanmou nou pou Bondye ak pou pwochen nou—kisa k vin apre?
Èske santi konpasyon ak lanmou pou lòt moun sifizan? Èske deklare lanmou nou pou Bondye ak pou pwochen nou satisfè obligasyon nou anvè Bondye?
Parabòl De Pitit Gason yo
Nan tanp lan nan Jerizalèm, chèf prèt yo ak ansyen Jwif yo te vin kote Jezi pou yo te pran l nan pyèj nan pawòl Li t ap di yo. Men, Sovè a te vire sitiyasyon an kote l te rakonte yo yon istwa.
Li te kòmanse “Vwala sete yon nonm ki te gen de pitit gason.” Li te pale avèk pi gran an epi l te mande l pou l t al travay nan jaden rezen an. Men pitit gason an te refize. Nan apre li te “repanti, li te ale.”
Apre sa papa a t al pale avèk lòt pitit gason an epi l te mande l pou l t al travay nan jaden rezen an. Dezyèm pitit gason an te ba l asirans li ta prale, men li pa t janm ale.
Epi, Sovè a te vire gade prèt yo ak ansyen yo epi l te mande yo, “Kiyès nan de pitit gason sa yo ki fè volonte papa l?”
Yo te oblije admèt se te premye pitit gason an—sa ki te di li pa ta prale a men ki te vin repanti nan apre epi l t al travay nan jaden rezen an.4
Sovè a te itilize istwa sa a pou atire atansyon sou yon prensip enpòtan—se moun ki obeyi kòmandman yo ki vrèman renmen Bondye.
Petèt se poutèt sa Jezi te mande moun yo pou yo koute epi swiv pawòl Farizyen yo ak direktè lalwa yo men pa swiv egzanp yo.5 Pwofesè relijyon sa yo pa t ap fè sa yo te dwe fè yo. Yo te renmen pale sou relijyon, men tristeman yo pa t kapte fon li.
Aksyon yo ak Sali Nou
Nan youn nan dènye leson Sovè a te bay disip Li yo, Li te pale yo sou Jijman final la. Yo ta pral separe moun ki mechan yo ak moun ki jis yo. Bon moun yo ta eritye lavi etènèl; mechan yo ta livre nan pinisyon etènèl.
Ki diferans ki te genyen ant de gwoup sa yo?
Moun ki te demontre lanmou yo atravè aksyon yo te sove. Moun ki pa t fè sa yo te kondane.6 Vrè konvèsyon nan levanjil Jezikri a ak nan valè l yo ak prensip li yo ap demontre nan aksyon chaj jou nou yo.
Alafen, tou senpleman deklare nou renmen Bondye ak pwochen nou p ap kalifye nou pou egzaltasyon. Paske, jan Jezi te anseye a, “Se pa tout moun ki di m, Senyè, Senyè, k ap antre nan wayòm syèl la; men, se moun ki fè volonte Papa m ki nan syèl la.”7
Kisa ki vini apre lanmou?
Repons pou kesyon, “Apre lanmou, kisa k vini an?” ka senp epi dirèk. Si nou vrèman renmen Sovè a, n ap gen tandans pou n remèt kè nou ba Li epi mache nan chemen disip la. Lè nou renmen Bondye, n ap fè efò pou nou obeyi kòmandman L yo.8
Si nou vrèman renmen pwochen nou, n ap fè tout sa nou kapab pou ede “pòv yo ak moun ki nan nesesite yo, malad yo ak moun ki aflije yo.”9 Paske moun ki fè zak dezenterese sa yo ki plen konpasyon ak sèvis,10 se yo menm menm ki disip Jezikri.
Se sa ki vini apre lanmou.
Se sa ki esans levanjil Jezikri a.
© 2016 Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/16. Apwobasyon tradiksyon: 6/16. Tradiksyon First Presidency Message, September 2016. Haitian Creole 12869 036
Ansèyman nan Mesaj Sa a
Prezidan Uchtdorf defini vrè disip Jezikri yo kòm moun ki montre lanmou yo pou li ak pou lòt moun atravè aksyon yo. Li anseye nou “si nou vrèman renmen Sovè a, n ap gen tandans ba l kè nou epi apre sa mache sou chemen disip la.” Panse pou w mande moun w ap anseye yo nan ki fason lanmou te ba yo motivasyon pou yo mache sou chemen disip la. Ou gen dwa pataje eksperyans ou avèk yo tou. Ou gen dwa envite yo pou yo priye pou yo ka gen plis charite ak fòs pou yo aji avèk lanmou.