Serafo

Mettoch mi Pusin fis me Nesenin Anneasosich

Preseten Thomas S. Monson a fen apasa ussun ew fansoun nupwen a kaeo ussun auchean anneasosich. Nupwen a wanu ierin, an ewe famini ra feinno ren imwer ewe a for seni ira won ewe chuuk. I me chienan ewe ra mochen repwe nimeti ewe neni mi fetin ie pwe repwe akueta ar akkei ie. Ra sotuni ne nimeti ewe fetin ren pour, ra wieta me weitata ren ukukun ar tongeni, nge met ewe a ourono non pour kewe fetin. Preseten Monson a awewei, “Iwe mwirin met uwa ani ekiek pwe a ew ekiek mi murinno a tonong non ekieki non ai chok wanu ier. Ua ereni Danny, ‘Sipwe chok keni ekkei fetin. Sipwe keni ekkei fetin pwe epwe pwenni ei neni!”

Ina mwo ika a sinei pwe ese mumuta an epwe aea masis, a sasefan ngeni ewe imw an epwe angei ekoch, iwe ir me Danny ra forata ewe kukkun akkei non ena neni mi fetin. Ra ekieki pwe epwe pusin kununo, nge ese fen kununo pwe a napeno winiti ew watten me efeiengawen akkei. I me Danny ra sa ar repwe tingor aninis, mwitir chok ekkewe mi mukono ra sato ar repwe kunuono ewe akkei me mwen epwe tori ekkewe ira.

Preseten Monson a sopweno, “Am me Danny aua kaeo chommong nessen mi weires me namot non ena ran—eu mi wesen auchea ussun anneasosich.” (Nengeni “Anneasochis a Wato Feioch,” Liahona, May 2013, 89–90.)

Ussun Preseten Monson, ka fen mwo pin kaeo ew nesen ren anneasosich non aneweiresin? Met ew mettoch kopwe tongeni fori an epwe tumunu inisum an esap feiengaw ren anneasosich non ekkan fansoun mwach?