Poraus seni ewe Aewin Presetensi, October 2016
Ekkewe Feiochun Anneasosich
Seni Preseten Thomas S. Monson
“Ewe wachimuken nesen sia tongeni kaeo non manawach,” Preseten Thomas S. Monson a fen aitikich, “pwe nupwen Kot a kapas iwe sipwe anneasosichi, sipwe pung fansoun meinisin.”1
Sipwe pwan feioch. Ussun Preseten Monson a fen apasa non fansoun ew mwichenapen mwichefen e karan chok wesino: “Nupwen sia aponueta ekkewe annuk, manawach repwe pwapwa, fetanoch, me kukkun ach osukosuk. Ach nipwakingaw me osukosuk repwe mecheres ach sipwe atawei, me sipwe angei [an Kot] kewe feioch a pwonei.”2
Non ekkewe kapasen an Preseten Monson kewe afanafan non wisan Presetenin ewe Mwichefen, a achema ngenikich pwe ekkewe annuk ina ekkewe ennetin emwen ngeni pwapwa me kinamwe.
Kokkotun Emwenin ewe Sai
“An Kot kewe annuk rese kawor ar repwe awosukosuka kich ika winiti minen eppet ngeni ach pwapwa. Ewe chok asokurun mi pung. I ewe a forikich me ewe a tongekich a sineochu ifa ussun ach sipwe nonnom non manawach ach sipwe tongeni angei ewe wachimuken pwapwa. I ewe a awora ngenikich kokkotun emwen minne, ika sia appirur, repwe ekuna ngenikich ngaseno non ei efeiengawen sai non manawach. Sia chemeni ekkewe kapasen ewe kon: ‘Anneasosichi ekkewe annuk! Non ei mi wor ngaseno; non ei mei wor kinamwe’ [nengeni “Keep the Commandments,”Kon mi fel, nampa. 303].”3
Pochokun me Mirit
“Meinisin ekkewe soufos ra aneasochis; a ngenir pochokun me mirit seni chok fansoun nom. A kan namwot ach sipwe weweiti pwe sia pwan tufich ne angei ei pochokun me mirit. A tawe ngeni emon me emon kich ren ach aneasosichi ekkewe annukun Kot. …
“Ei mirit sia achocho ngeni, ponuan ach kapas eis sia kutta, me ewe pochokun sia mochen ikenai pwe sipwe churi weiresin ach fonufan epwe feito rech ika sipwe anneasochisi ekkewe annuken ewe Samon.”4
Finata ne Anneasosichi
“Fetanin ach fansoun mi mumuta. Puken katon me anneani porous me minen katon won tv ra pwarano ussun napanapen ekkewe chon fori ekkewe kachito, ekkewe mi itefouno ren ewe nenien urumot—ekkewe minne chommong serafo ra mochen repwe ussun chok napanaper—ussun nge rese chiwen eteneki ekkewe annukun Kot me amonungaweno ne fori ekkewe mokutukut mi tipis, ussun nge ese pwan wor osukosukan. Kose chok nuku! Mei wor fansoun atawei—pwan mwo anonnopokun ewe puk. Meinisin Cinderella a wor an atun niwino—ika esap non ei manaw, iwe non en mwirin. Ranin Kapung epwe feitto fan iten meinisin. … Uwa tingor reom kopwe fini om kopwe anneasosich.”5
Pwapwa me Kinamwe
“Fan ekkoch epwe usun ekkewe chon fonufan mi ennetin pwapwa nap senuk. Ekkoch mei neimi oupwe mefi pwe ouse ngaseno ne fori met oua mochen ren ekkewe annuken aramas sia apwonueta non ewe Mwichefen. Pwi me fefinei, ua ereni kemi, ese pwan wor ew mettoh mi tongeni napano ach pwapwa non manauach ika watteno kinamwe ngeni ngunuch nap seni ewe Ngun mi Fel mi feito ngenikich nupwen sia tapweno mwirin ewe Chon Amanau me apwonueta ekkewe annuk.”6
Fetan Wenechar
“Ua pwarata ngenikemi pwe ach kewe feioch mi pwon ese wor ne kaukun. Ina mo ika ewe kuchun asapwan repwe ioi fengen, ina mo ika ewe ran epwe pungutiw woch, ach mirititi ewe kapas allim me ach tongei Samach won Nang me ach ewe Chon Amanau epwe ekinamwei me amochukich me wato pwapwa ngeni netipach nupwe sipwe fetan wenechar me apwonueta ekkewe annuk. Ese wor och mettoch won ei fonufan epwe tongeni akuffu kich.”7
Tapweno mwirin ewe Chon Amanau
“Ion ewe Mwan chon netipengau, a mefi riaffou? Ion ewe Kingen ning, ewe Samonun meinisin? I nouch Masta. I ach Chon Amanau. I ewe Noun Kot. I ewe chon fori ach Manau ese Much. A korikich, ‘Tapweto mwiri.’ I a aitikich, ‘Feinno, me fori ussun met uwa fori.’ I a tingor, ‘Anneasochisi ai kewe annuk.’
“Sipwe appiru I. Sipwe appiru An minen appiru. Sipwe anneasosichi An kapas. Ren ach fori ei, sia ngeni I ewe niffangen kinisou.”8
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/16. Kapungunon chiakun: 6/16. Chiakun First Presidency Message, October 2016. Chuukese. 12870 901
Afanafan seni Ei Poraus
Preseten Monson a aiti kich ussun ekkewe chommong feioch sia tongeni angei seni ach anneasosich, pachenong pochokun, mirit, pwapwa, me kinamwe. Ekieki om kopwe eisini ekkewe ka osukuna ifa ussun ar ra feioch ren ar anneasosichi ekkewe annuk. Ka tongeni pesei ngenir ar repwe sopweno ne ekieki ussun ar kewe feioch me makketiw ar ekiek me met ra sinei non echo puken achechem. Ka pwan tongeni pesei ngenir ar repwe pwarano ar kinisou ngeni Kot ren ar kewe feioch ren ar repwe sopweno ne anneasosich.