Iwaad

Mme Ikang ye Ukpebnkpo eke Nkop-item

Inikiet President Thomas S. Monson ama eting abanga ini emi enye ekekpebde abanga ufon ke ndikop item. Ini emi enye ekedide isua itiaita, ufokemana esie ema eka ekpri-ufok mmo emi okodude ke akamba nkong-nkong obot. Enye ye ufan esie ekeyom ndinam ebiet emi mbiet okodude anwanga man enam itie eboho-ikang. Mmo ema edomo ndiwup mbiet oro ke ubok, ke-eyiri enyung eduri ke odudu ke nte mmo ekekemede, edi ofuri se mmo ekewupde ekedi esesit ibat mbiet. President Monson anam anwanga ete, “Ndien se ami nkekerede nte edi ata eti usung ediduk ekpri ekikere mi nte eyen isua itiaita. Ami mma ndoho Danny nte, ‘Kpukpru se nnyin idinamde edi ndisin ikang ke ofuri mbiet emi. Nnyin iyenam ikang ata mbiet emi ekara-ekara!’”

Okposuk edi nte enye ama okofiok ete ke owo idinyimeke ino enye ete akama ukwat-ikang, enye ama afiak efehe aka ekpri-ufok oro man akada esesit ukwat-ikang ifang, ndien enye ye Danny ema esin ikang ke itie mbiet oro. Mmo ekekere ete ke ikang oro eyenime ke idemesie, edi ikang oro ama okpon akabare ekesim akamba ye enyene-ndik ikang. Enye ye Danny ema efehe eyom unwam, ndien ikebighike mme akwa-owo ke emana ema efehe edisim man edinime ikang oro mbemiso ikang oro asak ekesim mme eto.

President Monson aka-iso eting ete, “Ami ye Danny ima ikpeb ediwak mkposong ye eti ukpeb ke usen oro—nte ekpekpride nte ededi kabanga ufon ndikop item. (Ke se “Nkop-item ada Edidiong edi,”) Liahona, May 2013, 89–90.)

Ukem nte President Monson, akananam nte mbufo emebo ukpebnkpo eke nkop-item eto ke okposong usung? Nso uduak ke mbufo ekeme ndinam man ekut uboho ke ini iso oto ke ndikop item?