Etop eke First Presidency, Ofiong Duop ke isua 2016
Mme Edidiong eke Nkop-item
Emi otode President Thomas S. Monson
President Thomas S. Monson ekekpeb ete ke, “Mkpon-nkan ukpeb emi nnyin ikemede ndibo ke uwem-isong emi edi kini Abasi onode item ndien nnyin inam item oro, ke kpukpru ini nnyin iyenen.”1
Nnyin iyebo edidiong nko. Nte President Monson eketingde ke akwa mbono eke mmi-mmi emi ete ke: “Ini eke nnyin inimde mme mbet, nnyin iyekop inemesit, akamba ediyuho, ye unana afanikong ke uwem. Eyemem ono nnyin ndiyo mme afanikong ye mfina nnyin, ndien nnyin iyebo mme edidiong emi [Abasi] okonwongode.”2
Ke mme mbio-mbio iko emi okotode mme ukpebnkpo eke President Monson nte Adaibuot eke Ufok Abasi, enye eti nnyin ete ke mme mbet edi nkokure usung emi adade aka ekesim inemesit ye emem.
Mme Ndausung emi Usung-isang oro oyomde
“Mbet Abasi idige man edikpu nnyin mme ndikabare ndi mme ubiongo nno inemesit nnyin. Edi asak-iso emi edi akpaniko. Enye emi okobotde nnyin onyung etetim ama nnyin ofon odiongo ata usung nte nnyin inyenede ndidu uwem nnyin man otodo ikeme ndibo mkpon-nkan inemesit eke odude. Enye ama ono nnyin ndausung emi edide, edieke nnyin itienede mme ndausung oro, eyeda nnyin ke emem osio ke ediwak abianga-abianga usung-isang uwem isong emi. Nnyin imeti mme iko ikwo emi itimde idiongo ete: “Nim mme mbet! Ke emi uboho odu, ke emi emem odu’ [Ke se “Nim mme Mbet,” Ikwo no. 303].”3
Odudu ye Ifiok
Nkopitem edi okpoiko ono mme prophet; oro ono mmo nsongonda ye ifiok totongo ke eset. Edi akpan-nkpo nnyin ndifiok ete ke nnyin, nko, imenyene unen ndibo oruk nsongonda ye ifiok emi. Emi odu ono kpukpru nnyin mfin emi nte nnyin inamde mme item Abasi. …
“Ifiok eke nnyin iyomde, iboro eke nnyin iyomde, ye osongo eke nnyin iyomde mfin emi ndinwana ye idiok ererimbot emi ekeme ndidi eke nnyin kini nnyin ibengeke idem inam mme item Abasi.”4
Mek Ndinim ke Akpaniko
“Ini uwem nnyin edi ndaha-ini ono nnyin ndinyime. Mme ewewet-nwed ye ekebe ndise emi esiode owut mme akpan-owo ke nkpo ndise oro, mme andikan ke anwa mbuba-itok—mme owo eke ediwak mme iwaad eyomde ke anyan-ini nditiene—nte esinde mme ewuho Abasi enyung enam mme idIok ido, ibatke-bat mme ufen eyedi. Nte mbufo inimke oro ke akpaniko! Ini edinam-ibat odu—kpa ini nditum nwed-ibat nnim. Kpukpru Cinderella enyene ini uboho esie—edieke midige ke uwem emi, eyedi ke uwem efen. Usen Ubiere-ikpe eyedi ono ofuri owo. … Ami mmebenge ye mbufo nte yak emek ndikop item.”5
Idara ye Emem
“Ekeme ndibiet ke ubak ini nno mbufo nte ke mbon owo emi edude ke anwa esien ekop inem nkpo ererimbot ekan mbufo. Ubak mbufo emekeme ndikop ubiongo oto ke ndaha usung item emi nnyin inamde ke Ufok Abasi. Ndito eka mi irenowo ye iban, ami mfiori nno mbufo nte, nte ededi, nte ke iduhe nkpo ndomokiet emi ekpekemede ndida akwa idara nsin ke uwem nnyin mme uyoho emem nno ukpong nnyin akan Spirit oro ekemede ndidu nnyin ke nte nnyin itienede Andinyanga inyung inimde mme mbet.”6
Sanga ke Nnen-nnen usung
“Ami nting iko ntiense nno mbufo nte ke mme edidiong oro ekenwongode eno nnyin okpon akan se nnyin ikpekerede. Ekpedi nte idiok obubit-enyong obohode, ekpedi nte edim edepde oduoho nnyin, ifiok iko Abasi ye ima emi nnyin inyenede ino Ete nnyin ke Enyong ye Andifak nnyin eyedong nnyin esit onyung ada inemesit esin ke esit nnyin nte nnyin isangade ke nnen-nnen usung inyung inimde mme mbet Abasi. Idi iduhe baba mkpo kiet ke ederimbot emi emi edikande nnyin”.7
Tiene mme Prophet
“Anie edi Owo ukut emi, eke oyohode ye mfuho? Anie edi Edidem ubong, Jehovah mme udim emi? Enye edi Andikpeb nnyin. Enye edi Andinyanga nnyin. Enye edi Eyen Abasi. Enye edi Ntongo Erinyanga-ukpong nnyin. Enye ke-okot ete. ‘Tiene mi.’ Enye ke-eteme ete, ‘Ka, yung ka-nam ntre.’ Enye ke-ekpe ubok ete, ‘Nim mme mbet mi.’
“Yak nnyin itiene Enye. Yak nnyin itiene uwutnkpo Esie. Yak nnyin inam iko Esie. Ke ndinam ntre, nnyin imeno Enye edisana eno eke ekom.”8
© 2016 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyime edikabarel: 6/16. Edikabare Etop eke First Presidency Message, October 2016. Efik. 12870 553
Ukpebnkpo eketode Etop Emi.
President Monson ekekpeb nnyin abanga ediwak edidiong emi nnyin ikemede ndibo oto ke ndikop item, ke esit edide odudu, ifiok, idara ye emem. Kere-banga ndibup mbon owo emi mbufo ekpebde nkpo danga nte mmo ekebo edidiong oto ke ndinim mme mbet. Mbufo nko emekeme ndisongo mmo idem ete eka-iso ekere ebanga mme edidiong mmo enyung ewet mme ekikere ye ifiok-ukpeb mmo esin ke journal. Mbufo emekeme ndisongo mmo idem ete ewut ekom eno Abasi ke mme edidiong mmo ke ndika-iso nkop item.