Lamharon

Mga Kalayo kag mga Leksyon sa Pagkamatinumanon

Si Pangulong Thomas S. Monson kis-a nagsugid parte sa isa ka tion sang iya natun-an ang kaimportante sang pagkamatinumanon. Sang nagaidad sia walo ka tuig, ang iya pamilya nagbisita sa ila gamay nga balay sa mga kabukiran. Gusto niya kag sang iya abyan nga hawanan ang isa ka hilamonon nga lugar para sa isa ka dabok ukon campfire. Gintilawan nila nga hawanan ang hilamon nga gamit ang ila kamot, nga ginabutong kag ginagabot ini sing todo pero ang ila lang nakuha diutay lang nga hilamon. Si Pangulong Monson nagpaathag, “Kag dayon ang akon nahunahuna nga pinakamaayo nga solusyon gulpi lang nagsulod sa akon walo-ka-tuig nga pamensaron. Siling ko kay Danny, ‘Kinahanglan lang naton tutdan ining mga hilamon. Sunugan lang naton sing isa ka tipulon sa mga hilamon!’”

Bisan pa nga nakahibalo sia nga wala sia ginapasugtan nga maggamit sang mga posporo, nagdalagan sia sa ila balay para magkuha sini, kag gintutdan nila ni Danny ang inang hilamonon nga lugar. Ginhulat nila ini nga mapatay lang pero imbes nga mapatay ang kalayo nagdako ini kag nangin delikado. Nagdalagan sila ni Danny para mangayo sang bulig, kag pagkadugay-dugay may mga tawo nga nagadinalagan para patyon ang kalayo antes ini maglab-ot sa mga kahoy.

Si Pangulong Monson nagpadayon, “Natun-an namon ni Danny ang pila ka mabudlay pero importante nga mga leksyon sadto nga adlaw—ilabi na gid ang kaimportante sang pagkamatinumanon.” (Tan-awa sa “Obedience Brings Blessings,” Liahona, Mayo 2013, 89–90.)

Pareho kay Pangulong Monson, ginkinahanglan ninyo bala nga tun-an ang isa ka leksyon sa pagkamatinumanon sa mabudlay nga paagi? Ano nga mga lalab-uton ukon goals ang sarang ninyo himuon agud padayon kamo nga luwas paagi sa pagkamatinumanon sa palaabuton?