Mensahe sang Unang Panguluhan, Oktubre 2016

Mga Bugay sang Pagtuo

Ni Pangulong Thomas S. Monson

“Ang pinakadako nga leksyon nga aton matun-an sa dutan-on nga kabuhi,” tudlo ni Pangulong Thomas S. Monson, “amo nga kon ang Dios maghambal kag kita magtuman, pirme kita mangin insakto.”¹

Mabugayan man kita. Subong nga ginsiling ni Pangulong Monson sa pinakaulihi nga pangkabilugan nga komperensya: “Kon kita magtuman sang mga kasugoan, ang aton mga kabuhi mangin mas malipayon, mas manami, kag mas simple. Ang aton mga hangkat kag mga problema mangin mas mahapos dalhon, kag mabaton naton ang ginpromisa nga mga bugay [sang Dios].”²

Sa masunod nga mga dinalan halin sa mga pinanudlo ni Pangulong Monson bilang Pangulo sang Simbahan, ginapahanumduman niya kita nga ang mga kasugoan ang pinakasigurado nga giya padulong sa kalipayan kag paghidaet.

Mga Giya para sa Pagpanglakaton

“Ang mga sugo sang Dios wala ginhatag agud mapaslawan kita ukon mangin mga kasablagan sa aton kalipayan. Ang kabaliskaran amo ang matuod. Sia nga nagtuga sa aton kag nagapalangga sa aton sing himpit nakahibalo gid kon paano kita dapat mangabuhi agud maangkon naton ang pinakadako nga kalipay nga sarang naton maangkon. Sia naghatag sa aton sang mga sulundan nga, kon aton sundon, magaluwas sa aton sa sining masami matiplangon nga pagpanglakaton sa sining kabuhi. Madumduman naton ang mga pulong sang pamilyar nga himno: ‘Magtuman sang mga kasugoan! Sa sini may yara sang kaluwasan; sa sini may yara sang paghidaet’ [tan-awa sa “Keep the Commandments,” Hymns no. 303.”³

Kusog kag Ihibalo

“Ang pagtuman isa ka kinaiya sang mga propeta; nagahatag ini sang kusog kag ihibalo sa ila sa tanan nga panahon. Importante nga aton mahibal-an nga kita man nagakaangay sa sining ginhalinan sang kusog kag ihibalo. Yara lang ini para sa tagsa sa aton sa karon samtang nagatuman kita sang mga kasugoan sang Dios. …

“Ang ihibalo nga aton ginapangita, ang mga sabat nga aton gid gusto, kag ang kusog nga aton ginahandum sa karon nga panahon agud maatubang ang mga hangkat sang komplikado kag nagaliwat nga kalibutan sarang mangin aton kon handa kita nga magtuman sang mga kasugoan sang Ginuo.”⁴

Pilion nga Magtuman

“Ang pamatasan sang aton panahon amo ang pagkatolerar. Ang mga magasin kag mga palaguwaon sa telebisyon nagapakita sang mga artista sang pelikula, mga bayani nga atleta—sila nga madamo sa mga lamharon nga luyag sundon—nga nagapanginwala sang mga laye sang Dios kag nagapasundayag sang makasasala nga mga pagginawi nga daw wala sing malain nga epekto. Indi kamo magpati sini! Maabot ang panahon nga pagasabton ninyo ini—bisan ang pagbalanse sang ledger. Ang tagsa ka Cinderella may yara sang iya tungang gab-i—kon indi sa sining kabuhi, nian sa madason. Ang Adlaw sang Paghukom magaabot para sa tanan. … Nagapangabay ako sa inyo nga pilion nga magtuman.”⁵

Kalipay kag Paghidaet

“May mga tinion nga abi ninyo inang ara sa gwa mas nasadyahan sangsa inyo. Ang pila sa inyo ayhan nagabatyag nga nalimitahan sang layi sa pagbinatasan nga aton ginasunod sa Simbahan. Apang mga kauturan ko, ginapahayag ko sa inyo nga wala sang iban pa nga makadala sing mas dako nga kalipay sa aton kabuhi ukon mas dako nga paghidaet sa aton mga kalag sangsa ang Espiritu nga sarang magtambong sa aton sa pagsunod naton sa Manluluwas kag pagtuman sang mga kasugoan.”⁶

Maglakat sing Matarong

“Nagasaksi ako sa inyo nga ang aton ginpromisa nga mga bugay indi maisip. Bisan pa ang mga panganod sang unos magtipon, bisan pa ang mga ulan magbubo sa aton, ang aton ihibalo sang ebanghelyo kag ang aton gugma sa aton Amay nga Langitnon kag sa aton Manluluwas magapasulhay kag magasustenir sa aton kag magadala sing kalipay sa aton mga tagipusuon sa aton paglakat sing matarong kag pagtuman sang mga kasugoan. Wala sing bisan ano sa sining kalibutan nga makapierde sa aton.”⁷

Sundon ang Manluluwas

“Sin-o bala ining Lalaki sang mga kasulub-on, nakakilala sang kalisod? Sin-o ang Hari sang kahimayaan, ining Ginuo sang mga kasoldadohan? Sia ang aton Agalon. Sia ang aton Manluluwas. Sia ang Anak sang Dios. Sia ang Ginhalinan sang aton Kaluwasan. Sia nagaagda, ‘Magsunod kamo sa akon.’ Sia nagatudlo, ‘Maglakat kamo, kag himoa ninyo ang ginahimo ko.’ Sia nagapangabay, ‘Sundon ninyo ang akon mga kasugoan.’

“Sundon naton Sia. Sundon naton ang Iya ehemplo. Tumanon naton ang Iya mga pulong. Sa paghimo sini, ginahatag naton sa Iya ang diosnon nga dulot sang kapasalamatan.”⁸

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, October 2016. Hiligaynon. 12870 861

Pagtudlo gikan sa Sining Mensahe

Si Pangulong Monson nagatudlo sa aton parte sa madamo nga mga bugay nga sarang naton mabaton paagi sa pagtuman, lakip ang kusog, ihibalo, kalipay, kag paghidaet. Binagbinaga ang pagpamangkot sa sinang inyo ginatudloan kon paano sila ginbugayan sa pagtuman sang mga kasugoan. Puwede mo sila paisogon nga padayunon ang paghunahuna sa ila mga bugay kag pagsulat sang ila mga hunahuna kag mga eksperiyensia sa isa ka journal. Puwede mo man sila paisogon nga magpakita sang kapasalamatan sa Dios para sa ila mga bugay paagi sa dalayon nga pagtuman.