Mensahe sa Visiting Teaching, Oktubre 2016
Ang Pamilya Gintangdo sang Dios
Tun-i sing mainampuon ining materyal kag magpangayo sang inspirasyon agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag makabugay sinang inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
“Sa pulong sang [ambahanon sang Primary], ‘Ang Pamilya Iya sang Dios,’ … ginapahanumduman kita sang perpekto nga doktrina,” siling ni Carole M. Stephens, Unang Manuglaygay sa Pangkabilugan nga Panguluhan sang Relief Society. “Natun-an naton indi lamang nga ang pamilya iya sang Dios kundi nga tagsa man sa aton kabahin sang pamilya sang Dios. …
“… Ang plano sang Amay para sa Iya mga anak isa ka plano sang gugma. Isa ini ka plano sa pagtingob sang Iya mga anak—Iya pamilya—sa Iya.”1
Si Elder L. Tom Perry (1922–2015) sang Korum sang Napulo’g Duha ka mga Apostoles nagsiling: “Nagapati man kita nga ang mabakod nga tradisyonal nga mga pamilya indi lamang nauna nga mga yunit sang isa ka malig-on nga sosyedad, isa ka malig-on nga ekonomiya, kag isa ka malig-on nga kultura sang mga prinsipyo—kundi sila nauna man nga mga yunit sang wala’y katapusan nga kabuhi kag sang ginharian kag pagdumalahan sang Dios.
“Kita nagapati nga ang organisasyon kag pagginahum sang langit igapasad sa mga pamilya kag mga himata.”2
“Ang tanan, wala’y sapayan kon ano man ang ila sirkumstansya sa kasal ukon kadamuon sang kabataan, sarang mangin mga tagapangapin sang plano sang Ginuo nga ginlaragway sa proklamasyon sang panimalay,” siling ni Bonnie L. Oscarson, Pangkabilugan nga Pangulo sang Young Women. “Kon plano ina sang Ginuo, dapat amo man ina aton plano!”3
Dugang nga Balaan nga mga Kasulatan
Doktrina sang Pamilya
Si Sister Julie B. Beck, anay Pangkabilugan nga Pangulo sang Relief Society, nagtudlo nga ang teolohiya sang pamilya nabase sa Pagtuga, sa Pagkapukan ukon Fall, kag sa Pagpasag-uli ukon Atonement ni Jesucristo.
“Ang Pagtuga sang kalibutan naghanda sang isa ka lugar sa diin ang mga pamilya makapuyo. Ang Dios nagtuga sang isa ka lalaki kag isa ka babayi nga nangin duha ka importante nga mga katunga sang isa ka pamilya. Nangin bahin sang plano sang Amay nga Langitnon nga si Adan kag Eva mahugpong kag magsugod sang isa ka wala’y katapusan nga pamilya.
“… Ang Pagkapukan naghimo posible para sa ila nga makaangkon sang mga anak nga lalaki kag mga anak nga babayi.
“Ang Pagpasag-uli [ni Cristo] nagatugot sa mga pamilya nga mahugpong sa wala’y katapusan. Nagatugot ini sa mga pamilya nga makaangkon sang wala’y katapusan nga pagsanyog kag pagkaperpekto. Ang plano sang kalipayan nga ginatawag man nga plano sang kaluwasan isa ka plano nga gintuga para sa mga pamilya. …
“… Ini ang doktrina ni Cristo. … Kon wala sang pamilya, wala sang plano; wala sang rason para sa mortal nga kabuhi.”4
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, October 2016. Hiligaynon. 12870 861
Binagbinaga Ini
Ngaa ang pamilya ang labing importante nga yunit sa sini nga kabuhi kag sa wala’y katapusan?