Mensahe ti Umuna a Panguluen, Oktubre 2016
Dagiti Bendision ti Panagtungpal
Ni Presidente Thomas S. Monson
“Ti kadadaklan a leksion nga maadaltayo iti mortalidad,” nga insuro ni Presidente Thomas S. Monson, “ket no agsao ti Dios ken tungpalentayo, kanayon nga umisotayo.”1
Ken mabendisionantayo pay. Kas naibaga ni Presidente Monson itay napalabas a sapasap a komperensia: “No kupikopantayo dagiti bilin, naragragsak dagiti biagtayo, ad-adda a makapnek, ken saan a narikut. Dagiti pannubok ken parikuttayo ket nalaklaka nga ibturan, ken maawattayo dagiti inkari ti [Dios] a bendision.”2
Iti sumaganad nga naadaw manipud kadagiti pannursuro ni Presidente Monson a kas Presidente ti simbaan,ipalagipna kadatayo a ti panagtungpal kadagiti bilin ket isuda ti kasisiguraduan a mangidalan iti kinaragsak ken kappia.
Dagiti pangidalan iti Panagdaliasat
Dagiti bilin ti Dios ket saan nga naited tapno mangupay kadatayo wenno agbalin a lapped iti ragsaktayo. Idinto a ti kasunganina ket pudno. Isuna a nangparsua kadatayo ken mangay-ayat unay kadatayo ket ammona no kasano a kasapulan nga ibiagtayo a naurnos dagiti biagtayo tapno posible a magun-od ti naindaklan a kinaragsak. Inyaramidannatayo kadagiti annuroten tapno, no surotentayo ida, makitanatayo a sitatalged a makaungpot iti dayta masansan a manangliliput a panagdaliasat. Malagiptayo dagiti balikas ti nalatak a himno: ‘Tungpalen dagiti bilin! Ditoy adda kinatalged; ditoy adda kappia’ [kitaen iti “Keep the Commandments,” Hymns, no. 303].”3
Kinapigsa ken Pannakaammo
Ti panagtungpal ket maysa a gagangay a kababalin dagiti propeta; daytoy ti nangted kadakuada iti pigsa ken pannakaammo iti amin a panawen. Napateg unay daytoy tapno maamiristayo a maikaritayo met iti daytoy a pagtaudan ti pigsa ken pannakaammo. Sidadaan a magun-od daytoy ti tunggal maysa kadatayo ita no agtungpaltayo kadagiti bilin ti Dios. …
Ti pannakaammo a sapsapulentayo, dagiti sungbat a paggagarantayo, ken ti pigsa a tartarigagayantayo ita a sumango kadagiti karit ti nariribuk ken agbaliwbaliw a lubong ket matagikuatayo no sitatallugodtayo nga agtungpal kadagiti bilin ti Apo.”4
Pilien ti Agtulnog
“Ti kadawyanen kadagiti panawentayo ket ti iyaanamong. Dagiti pabuya kadagiti magasin ken telebision ket iladawanda dagiti bituen iti pelikula, dagiti bannuar iti tay-ak ti atlethics- dagitoy nabayagen a pagraraeman dagiti agtutubo- a di mangikankano kadagiti paglintegan ti Dios ken dagiti mangsupring ken napnuan basol nga aramid, kasla awanandan iti dakes nga epekto. Patienyo kadi? Adda tiempo ti panagkuenta- ken panangbalanse iti libro. Tunggal Cinderella ket addaan iti tenggat-rabii, no saan nga ita a biag, iti sumaruno. Sumangbay iti amin ti Aldaw ti Panagukom. … Ipakaasik kadakayo ti panangpiliyo ti agtulnog.”5
Rag-o ken Kappia
Mabalin a no dadduma iti panagkitayo a naragragsak nga amang ngem dakayo dagiti adda iti lubong. Mabalin a marikna ti sumagmamano kadakayo a maig-igetankayo maipapan iti pagrukodan ti ugali a sursurotentayo iti Simbaan. Nupay kasta, kakabsatko, ibagak kadakayo, nga awanen ti sabali pay a makaisangbay iti ad-adu pay a rag-o kadagiti biagtayo wenno ad-adu pay a kappia kadagiti kararuatayo ngem ti Espiritu a makaumay kadatayo bayat iti panangsurottayo iti Mangisalakan ken mangkupikop kadagiti bilin.”6
Magna a Nalinteg
“Paneknekak kadakayo a dagiti naikari a bendision ket aglaplapunosan. Uray agummong dagiti ulep ti bagyo, uray maibuyat dagiti tudo kadatayo, ti pannakaamotayo iti ebanghelio ken ti ayattayo iti Nailangitan nga Ama ken ti Mannubbottayo ti mangliwliwa ken mangsustener kadatayo ken mangidanun iti rag-o kadagiti pusotayo iti pannagnatayo a sililinteg ken agtungpal kadagiti bilin. Awan ti aniaman ditoy lubong ti mangparmek kadatayo.”7
Surotenyo ti Mangisalakan
“Asino daytoy maysa a Tao ti ladladingit, ken napagsagaba”? “Siasino ti Ari ti gloria,daytoy nga Apo dagiti apo? Isu ti Maestrotayo. Isu ti Mangisalakantayo. Isu ti Anak ti Dios. Isu ti Akin-aramid iti Pannakaisalakantayo. Agay-ayab, ‘Umaykay sumurot kaniak.’ Imbilinna, ‘Inkan, ket aramidem met ti kasta.’ Impakaasina, ‘Tungpalenyo dagiti bilbilinko.’
“Surotentayo koma Isuna. Tuladentayo koma ti pagwadanna. Tungpalentayo koma dagiti balikasna. Babaen ti panangaramid iti kastoy, maitedtayo Kenkuana ti nadiosan a sagut ti panagyaman.”8
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, October 2016. Ilokano. 12870 864
Panangisuro manipud iti Daytoy a Mensahe
Isuro ni Presidente Monson kadatayo maipanggep kadagiti adu a bendision a maawattayo iti panagtulnog, pakairamanan ti kired, pannakaammo, rag-o ken kappia. Iramanyo a saludsuden dagiti sursuruanyo no kasano a nabendisionanda bayat iti panagtulnogda kadagiti bilin. Mapaturedyo ida nga agtultuloy a mangutob kadagiti bendisionda ket isuratda iti journal dagiti kapanunotan ken kapadasanda. Mapaturedyo pay ida a mangipakita iti panagyaman iti Dios kadagiti bendision babaen iti panagtultuloy a managtungpal.