Mensahe iti Visiting Teaching, Oktubre 2016
Inordenan ti Dios ti Kaamaan
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti “Ti Pamilia: Maysa a Waragawag iti Lubong” papigsaenna ti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
“Kadagiti balikas [iti Primary Song], ‘The Family is of God,’ … maipalagip kadatayo ti natarnaw a doktrina,” kinuna ni Carole M. Stephens, umuna a mammagbaga iti Relief Society General Presidency. “Saan laeng a maadaltayo a ti pamilia ket ikut ti Dios ngem ketdi maadaltayo pay a tunggal maysa kadatayo ket paset ti pamilia ti Dios. …
“… Ti plano ti Ama para kadagiti annakna ket plano ti ayat. Daytoy ket plano a mamagtitipon kadagiti Annakna—Ti Pamiliana—Kenkuana.”1
Ni Elder L. Tom Perry (1922-2015) iti Korum dagiti Sangapulo-ket-dua nga Apostol kinunana: “Mamatitayo pay a dagiti nakikired a tradisional a pamilia ket saanda laeng a dagiti umuna a paset ti natalged a sosiedad, natalged nga ekonomia, ken natalged a kultura dagiti values- ngem ketdi isuda pay dagiti umuna paset iti awan patinggana ken iti pagarian ken gobierno ti Dios.
“Mamatitayo a ti gunglo ken gobierno ti langit ket maipasdekto iti ikub dagiti pamilia ken dagiti extended a pamilia.”2
“Tunggal maysa, ania man ti kasasaadda iti panagasawa wenno bilang dagiti annak, ket makapagbalin a salaknib iti plano ti Apo a nailadawan iti waragawag ti kaamaan.” kinuna ni Bonnie L. Oscarson, Young Women General President, “No plano ti Apo daytoy, nasken a daytoy met ti agbalin a planotayo”3
Dagiti Mainayon a Nasantuan a Kasuratan
Ti Doktrina ti Pamilia
Ni Sister Julie B. Beck, dati a Relief Society General President, insurona a ti theology ti pamilia ket naibasar iti Pannakaparsua, ti Pannakatnag, ken ti Pannubbot ni Jesucristo:
“Ti Pannakaparsua ti lubong ket nangted iti lugar a sadiay ket makapagbiag dagiti pamilia. Pinarsua ti Dios ti lalaki ken babai nga isuda dagiti dua a napapateg a mangbukel iti pamilia. Paset daytoy ti plano ti Nailangitan nga Ama a da Adan ken Eba ket aglantip ken mangbuangay iti agnanayon a pamilia.
“… Ti Pannakatnag ti namagbalin kadakuada a maaddaan iti annak a babbai ken lallaki.
“Ti Pannubbot [ni Cristo] ket ipalubosna a mailantip ti pamilia iti agnanayon. Ipalubosna dagiti pamilia a maaddaan iti agnanayon a panagdur-as ken kinaan-anay. Ti plano ti kinaragsak, a naawagan pay iti plano ti pannakaisalakan, ket plano a nabuangay para kadagiti pamilia. …
“… Daytoy daydi doktrina ni Cristo. … No awan ti pamilia, awan met ti plano; awan iti rason para iti mortal a biag.”4
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, October 2016. Ilokano. 12870 864
Ibilang Daytoy
Apay a ti pamilia, ket isut kapatgan a yunit ita a panawen ken iti kinaagnanayon?