Messaġġ tal-Ewwel Presidenza, Ottubru 2016
Il-Barkiet tal-Ubbidjenza
Mill-President Thomas S. Monson
“L-akbar lezzjoni li nistgħu nitgħallmu fil-mortalità,” għallem il-President Thomas S. Monson, “hi li meta Alla jitkellem u aħna nobdu, aħna qatt ma nistgħu nkunu żbaljati.”1
Aħna nkunu wkoll imberkin. Kif qal il-President Monson waqt konferenza ġenerali riċenti: “Meta aħna nobdu l-kmandamenti, ħajjitna tkun aktar ferħana, aktar sodisfaċenti u anqas ikkumplikata. Insibuha aktar faċli niffaċċjaw l-isfidi u l-problemi li jkollna quddiemna, u aħna nirċievu l-barkiet imwiegħda ta’ Alla.”2
Fis-siltiet li ġejjin mit-tagħlim tal-President Monson bħala President tal-Knisja, huwa jfakkarna li l-kmandamenti huma l-aktar gwida ċerta għall-ferħ u l-paċi.
Linjigwida għall-Vjaġġ
“Il-kmandamenti ta’ Alla ma ġewx mogħtija lilna biex jiffrustrawna jew biex ikunu ostaklu għall-ferħ tagħna. Pjuttost il-verità hija l-oppost ta’ dan. Huwa li ħalaqna u jħobbna b’ mod perfett jaf kif aħna jeħtieġ li ngħixu ħajjitna biex inkunu nistgħu niksbu l-akbar ferħ possibli. Huwa pprovdielna ċerti linjigwida li jekk nimxu magħhom jirnexxielna ngħaddu mingħajr periklu minn dan il-vjaġġ mortali li ħafna drabi jaf ikun wieħed perikoluż. Ilkoll niftakru l-kliem ta’ wieħed mill-innijiet l-aktar familjari: ‘Obdu l-Kmandamenti! Fihom issibu s-sigurtà; fihom issibu l-paċi’ [ara “Obdi l-Kmandamenti,” Hymns, no. 303].”3
Il-Qawwa u l-Għarfien
“L-ubbidjenza hija karatteristika tal-profeti; hija tathom il-qawwa u l-għarfien tul iż-żminijiet. Huwa essenzjali għalina li nagħrfu li aħna wkoll intitolati għal dan is-sors ta’ qawwa u għarfien. Dan jista’ jkun tagħna lkoll hekk kif aħna nobdu l-kmandamenti ta’ Alla. …
“L-għarfien li aħna nfittxu, il-mistoqsijiet li rridu tweġiba għalihom u l-qawwa li nixtiequ llum sabiex nilħqu l-isfidi ta’ dinja kumplessa u dejjem tinbidel jistgħu jkunu tagħna meta aħna nkunu lesti li nobdu l-kmandamenti tal-Mulej.”4
Nagħżlu li Nemmnu
“Il-moda ta’ żmienna hija l-permessività. Ir-rivisti u l-programmi tat-televiżjoni jħobbu juru lill-artisti taċ-ċinema, lill-eroj sportivi—dawk li bosta żgħażagħ jippruvaw jimitaw—bħala nies li ma jagħtux kas tal-liġijiet ta’ Alla u jiddandnu f’ ħajja midinba, bħallikieku din ma tħalli l-ebda effett ħażin fuqhom. Temmnuhomx! Huwa żgur li se jkollhom jiffaċċjaw żmien ta’ ġudizzju—li fih iridu jpattu ta’ għemilhom. Kull Sindirella għad jaslilha l-ħin ta’ nofsilejl—jekk mhux f’ din il-ħajja, mela fil-ħajja li jmiss. Jum il-Ġudizzju se jasal għal kulħadd. … Nitlobkom bil-ħerqa biex tagħżlu li tobdu.”5
Ferħ u Paċi
“Xi kultant tista’ forsi taħseb li dawk li qed jitlajjaw fid-dinja qed igawdu aktar minnek. Xi wħud minnkom jista’ jħosskom xi ftit ristretti minħabba l-kodiċi tal-kondotta li nimxu warajha fil-Knisja. Ħuti, jiena madankollu niddikjara minn hawnhekk, li m’hawn xejn li jista’ jġibilna aktar ferħ f’ ħajjitna jew aktar paċi fir-ruħ tagħna mill-Ispirtu li jkun magħna hekk kif nimxu wara s-Salvatur u nżommu l-kmandamenti.”6
Imxu b’ Onestà
“Jiena nixhed magħkom li l-barkiet imwiegħda huma ferm aktar milli nistgħu nimmaġinaw. Għalkemm jaf jinġabar is-sħab tal-maltemp, għalkemm taf tinżel fuqna x-xita, l-għarfien tagħna tal-evanġelju u l-imħabba ta’ Missierna tas-Smewwiet u tas-Salvatur tagħna iffarrġuna u jsostnuna u jwasslulna l-ferħ f’ qalbna hekk kif aħna nimxu b’ onestà u nżommu l-kmandamenti. Ma jkun hemm xejn fid-dinja li jista’ jegħlibna.”7
Imxu Wara s-Salvatur
“Min hu dan il-Bniedem li bata u li jaf x’inhu l-mard? “Min hu s-Sultan tal-glorja, dan il-Mulej tal-Eżerċti? Huwa l-Imgħallem tagħna. Huwa s-Salvatur tagħna. Huwa Iben Alla. Huwa l-Awtur tas-Salvazzjoni tagħna. Huwa sejħilna, ‘Imxu warajja.’ Huwa għallima, ‘Morru, u agħmlu l-istess.’ Huwa talabna, ‘Żommu l-kmandament tiegħi.’
“Ejjew nimxu warajh. Ejjew insegwu l-eżempju Tiegħu. Ejjew nobdu l-kelma Tiegħu. Jekk nagħmlu dan, aħna nkunu qed nagħtuh ir-rigal divin tal-gratitudni.”8
© 2016 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/16. Approvazzjoni tat-traduzzjoni: 6/16. Traduzzjoni ta’ First Presidency Message, October 2016. Maltese. 12870 159
Tagħlim minn Dan il-Messaġġ
Il-President Monson jgħallimna dwar il-bosta barkiet li nistgħu nirċievu jekk inkunu ubbidjenti, fosthom il-barka tal-qawwa, tal-għarfien, tal-ferħ u tal-paċi. Ikkunsidraw li tistaqsu lil dawk li tgħallmu kif huma ġew imberkin minħabba li obdew il-kmandamenti. Tafu forsi tkunu tridu tħeġġuhom biex ikomplu jirriflettu dwar il-barkiet tagħhom u tniżżlu l-ħsibijiet u l-esperjenzi tagħhom ġewwa djarju. Tafu wkoll tkunu tridu tħeġġuhom biex juru l-gratitudni tagħhom lejn Alla għal barkiethom billi jibqgħu jkunu kontinwament ubbidjenti.