Te Rongorongo man te Moan Beretitentii, Ritembwa 2016
Te Rau n Te Maiu Aei
Beretitenti Henry B. Eyring
Moan Kauntira n te Moan Beretitentii
Nakoira ni kabane aika kam roko n te maiu ae mamate, e taku te Tia Kamaiu, “Ami b’ai i aon te aba te rawawata” (Ioane 16:33). E ngae n anne ao E anga ana berita ae moan te tamaroa nakoia Ana reirei n Ana tai ni mwakuri n te maiu ae mamate: “I katuka te rau i roumi, I anganingkami au rau: I aki anganingkami n ai aron te aba, ngkana e anga” (Ioane 14:27). E karau nano ataakin ae na reitinako te berita ae tabu aei e na reitinako ibukiia Ana reirei ni kabane n te bong aei.
Tabeman mai ibuakora a maeka n otabwanin aika tikiraoi man n rau, ma ti bon teimatoa naba ni karekei namakin ni kairiribai ao n ni kaangaanga. Tabeman a namakina te rau ao te aki karongoa ae kororaoi n tain te nanokawaki, kakamaaku, ao te kataaki ae teimatoa.
Ko na bae n tia n noora te kakai n rau ae kona n ataaki iaon moamoan ana reirei Iesu Kristo ke n ongo n oin ana taeka teuanne ke neienne. I a tia n noria n taai aika mwaiti. N tabetai e a tia ni mena inanon ruun te o n aoraki ike a ikotaki iai te utu ni katobibiia ana toro te Atua ae e a kaniia matena.
I uringa kawarakin te aine n te o n aoraki tabeua te bong imwain matena man te kaentia. I kairiia natiu aika a ataeinaine n raonai bukina bwa te titita ae moan te tamaroa aei e a tia n riki ngkoa bwa aia tia reirei n te Moanrinan.
A bane kaain ana utu ni katobibiia ana kainiwene, n tangiria ni kaan ma ngaia n ana kabanea n tai imwain matena. I rangin ni miimi ngke e a tekateka iaon te kainiwene. E nakoia natiu aine ao ni kabwarabwaraiia ni kauoman, temanna imwiin temanna, nakoia kaain ana utu. E taetae n ae kanga a uotaki natiu aine n rine n ana bowi te uea n aine. E atatai iaoia aomata n tatabemaniia nako inanon te ruu n riki bwa ana reirei te Tia Kamaiu. I teimatoa n uringa te korakora, te nano, ao te tangira ni bwanaana. Ao I uringnga ngarena n rangi ni kukurei e ngae ngke e ataia ae e na waekoa ni mate.
E a tia ni karekei kakabwaia ni karaunano n te nakoanibonga, ma e tibwaua ana koaua ma ngaira ni kabane n aron ae a tia ni maiuakinna ae Ana berita te Uea n rau e boni koaua: “I atongi baikai nakoi imi, ba kam na karekea te rau mai Rou. Ami b’ai i aon te aba te rawawata: ma kam na kabebetei nanomi; I a tia ni katea ana kai te aba” (Ioane 16:33).
E a tia ni kariaia Ana kakao, n arora ae ti bane ni konaa, n aki tabe ma kataakira ao ara kaangaanga:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; bwa I nimamanei ao I nanorinano: ao e na reke i roumi iai motikan rawaia tamneimi” (Mataio 11:28–29).
Ti man irakin te Tia Kamaiu ae ti kona iai ni karekea te rau ao te kabebeteaki n taian ni kataaki aika ti na bane ni kaaitarai.
Tataro n te toa a buokiira n ataia bwa ti na kanga ni karekea te rau anne inanon kaangaangan te maiu. Ngke ti taua te toa, ti kona ni kekeiaki ni kakaonimaki nakon ara berita aika tabu n Ririmwiina.
Ngaira n tatabemaniira nako ti berita bwa ti na ururinga te Tia Kamaiu. Ko kona n rineia bwa ko na Uringnga n te kawai are e na anaa nanom nako Ina. N tabetai ibukiu, bon Iangoakina ni katorobubua n te Onaroka are i Ketetemane ke n nooria ni wetea Rataro bwa e na otinako man te rua ni mate. Ngke I iangoa te bwai aei, I namakina te kaan riki nako Ina ao te kakaitau are e uota te rau nako nanou.
Ko berita naba bwa ko na kawakin Ana tua. Ko berita bwa ko na uouota Arana iaom ao n riki bwa Ana tia kakoaua. E berita bwa ngkana ko kawakin am berita ma Ngaia aika tabu, te Tamnei ae Raoiroi e na raoraoniko. (Taraa D&C 20:77, 79.)
Aio e uota te rau inanon ae tao uoua te bong. E kaitiakiira Te Tamnei ae Raoiroi man ara bure ibukin ana Mwakuri ni Kamaiu Iesu Kristo. Ao te Tamnei ae Raoiroi e kona n anganiira te rau are e roko man ana kariaia te Atua ao te kantaninga n te maiu are akea tokina.
E taetae te Abotoro Bauro iaon te kakabwaia ae kamimi aei: “Ao uaan te Tamnei te tangira, te kimwareirei, te rau, te taotaonaki n nano, te atataiaomata, te raoiroi, te kakaonimaki” (I-Karatia 5:22).
Ngkana ana taan uarongorongo karawa a tuatua bungian te Tia Kamaiu, a katanoata, “E na neboaki te Atua ike moan te rietata, ao e na raoi aonaba” (Ruka 2:14; e kairaki ma katuruturuana). I kaota au koaua ngkai ana tia kakoaua Iesu Kristo ae a kona te Tama ao Natina ae Tangiraki ni kanakoa te Tamnei ni kariaia bwa ti na karekea te rau n te maiu aei, ni kataaki ake a kona n roko iroura ao nakoia ake ti tangiriia.
2016 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te First Presidency Message, December 2016. Kiribati. 12872 859
Reirei man te Rongorongo Aei
E reireiniira Beretitenti Eyring ae e kona te tataro n toa ni buokiira n ataia bwa ti na kanga ni karekea te rau n tain kataakira. A kauringiira bwa ngkana ti kawakin ara berita aika tabu, ti na karekea ana berita te Atua ae tabu bwa e na memena te Tamnei ae Raoiroi iroura. Iangoia n titirakiniia naake ko reireiniia bwa e kanga karekean te Tamnei ae Raoiroi ni kona ni buokiira ni karekea te rau. Ko kona naba n tibwauai am iango ke te atatai bwa e na kanga te Tamnei ae Raoiroi ni buokiko n namakina te rau n te kataaki. Ko na bae ni kaungaia naake ko reireiniia bwa ana iangoa raoi te rongorongo aei n tain te toa n te wiiki aei.