Te Rongorongo ni Kakawari n Reirei, Ritembwa 2016
Kimwareirein te Utu e kuneaki n te Raoiroi
Tataromwaaka ni kamatebwaia te bwai n reirei aei ao n ukoria ibukin te kairi mai ieta bwa ko aonga n ataia bwa tera ae ko na tibwaia. E na kanga ataakin “Te Utu: Te Katanoata nakon te Aonaaba” ni karikirakea am onimaki iroun te Atua ao ni kakabwaiaiia naake ko tararuaiia rinanon te kakawari n reirei? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Te Atua “E katei utu bwa ti na karekei mai iai kukurei, bwa e na buokiira n reirei koaua aika eti n te aro n tangira, ao ni katauraoira ibukin te maiu are akea tokina.”1 Man ana “babaire ni kukurei” te Atua (Aramwa 42:8), Beretitenti M. Nelson, te Beretitenti n Aia Kooram Abotoro n te Tengaun ma Uoman, e taku: “E katanoata Ana babaire bwa a riai mwaane ao aine ‘ni karekea te kimwareirei’ [2 Nibwaai 2:25]. E na roko te kimwareirei anne ngkana ti rineia ni maiuakina ana babaire te Atua ae akea tokina ma te rau.”2
Te mweenga ae boboto iroun Kristo e karekea te tai ae moan te kakawaki ibukin te tokanikai. Unimwaane Richard G. Scott (1928–2015) man te Kooram n Abotoro n te Tengaun ma Uoman e kabwarabwara bwa te tabo are “e reiakinaki iai te euangkerio, are a kawakinaki iai berita aika tabu, ao n roko mai iai te tangira,” ike a kona iai utu ni maiuakina “te maiu ae karinerine” ao n riki bwa te utu ae matoa waakana n ana euangkerio Iesu Kristo.”3
Beretitenti Henry B. Eyring, te Moan Kauntira n te Moan Beretitentii, e taku: “Ti kona n iangoia ae ti na karaoa ae ti kona ni karaoia ni uota rikaaki mwaakan karawa nako nanon [ara] utu.” Ao ti na kona ni karikirakea te tangira, mwakuri n ibuobuoki, ongotaeka, ao te kukurei inanon mweengara mairouia “[ara ataei] n ongo ana taeka te Atua ao ni kataia n te onimaki. Ngkana a karaoia, ao e na bitaki aroia n te aro are e uota te kukurei are a ukoukoria.”4
Mweenga Aika Aanaki iroun Kristo
Iai katootongan mweenga aika aanaki iroun Kristo inanon booki aika tabu. Imwiin maten Riaai, taman Nibwaai, e uotiia ana utu ao tabeman aika a kakoauai ana taeka ni kauring ma ana kaotioti te Atua ao aika a ongeaba nakon ana taeka Nibwaai ni kitana abaia Remwanaite. N te tabo ae boou aei, ao Nibwaite a ongeaba nakon taian babaire ao taian moti, ao ana tua te Uea iaon bwaai ni kabane, ni kaineti ma ana tua Mote (taraa 2 Nibwaai 5:6–10). E ngae n anne riki ibuakoia Nibwaite, tabeman n te tai ae waekoa a moanna n aki ongotaeka.
Ao ngkai a kona kaain ara utu n tabetai ni katoka te maiu ae raoiroi n aron are a karaoia Nibwaite, e taekinna Unimwaane Scott bwa te mweenga ae e a aanaki iroun Iesu Kristo e teimatoa ni “karekea te koaua ae korakora ibukin te rau ao te katantan inanon mweengara.” E kakoaua ae “e na teimatoa mwaitin taian kakaewenako ke marakinnano, ma riki i nuukan taian kamangaongao, ti na kona n namakina te rau ma te kukurei inanora ae korakora.”5
Rakan riki Booki aika Tabu
© 2016 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te Visiting Teaching Message, December 2016. Kiribati. 12872 859
Iangoa Aio
Tera ae ti kona ni karaoia ni maiuakina ae raoiroi riki inanon ara utu?