Mensahe sang Unang Panguluhan, Disyembre 2016
Paghidaet sa Sini nga Kabuhi
Pangulong Henry B. Eyring
Unang Manuglaygay sa Unang Panguluhan
Sa tanan sa aton nga nagakabuhi sa duta, ang Manluluwas nagsiling, “Sa kalibutan may kangitngitan kamo” (Juan 16:33). Apang ginhatag Niya ining manami nga promisa sa Iya mga sumulunod sa tion sang iya dutan-on nga pag-alagad, “Ang paghidaet ginabilin ko sa inyo, ang akon paghidaet ginahatag ko sa inyo: indi subong sang paghatag sang kalibutan ang paghatag ko sa inyo.” (Juan 14:27). Makaulumpaw ang mahibaloan nga ining promisa sang personal nga paghidaet nagapadayon para sa tanan Niya nga mga sumulunod sa karon.
Ang pila sa aton nagakabuhi sa matahum kag matawhay nga kapalibutan, apang nagabatyag sang pagkatublag sa sulod. Ang iban nagabatyag sang paghidaet kag himpit nga kalinong sa tunga sang daku nga personal nga kawad-an, trahedya, kag dalayon nga mga pagtilaw.
Mahimo nga nakakita kamo sang milagro sang paghidaet sa nawong sang isa ka sumulunod ni Jesucristo ukon nakabati sini sa iya mga pulong. Nakita ko ini sing madamo nga mga tinion. Kon kis-a sa kwarto ini sang ospital sa diin nagatipon ang pamilya palibot sa isa ka alagad sang Dios nga nagahilapit sa kamatayon.
Madumduman ko ang pagbisita sa isa ka babaye sa ospital pila ka adlaw antes sia mapatay sa kanser. Gindala ko ang akon duha ka lamharon nga mga bata nga babaye sa pag-upod sa akon tungod ining manami nga sister nangin maestra nila sa Primary sang una.
Ang mga miyembro sang iya pamilya nagatipon palibot sang iya hiligdaan, nga luyag mangin yara sa iya luyo sa katapusan nga mga tinion niya sa duta. Nakibot ako sang nagpungko sia sa hiligdaan. Nagdab-ot sia sa akon mga bata nga babaye kag ginpakilala sila nga duha, sing tag-isa isa, sa tagsa ka miyembro sang iya pamilya. Naghambal sia nga daw sa harianon ang akon mga bata nga babaye nga ginapresentar sa atubang sang rayna. Natigayon niya nga maghambal sang isa ka butang parte sa kon paano ang tagsa ka tawo sa kwarto isa ka sumulunod sang Manluluwas. Madumduman ko pa sa gihapon ang kabakod, ang kalulo, kag ang pagpalangga sa iya tingog. Kag madumduman ko ang akon kakibot sa iya masinadyahon nga yuhum bisan pa nga nakahibalo sia nga ang nabilin niya nga tinion sa kabuhi malip-ot na lang.
Nakabaton sia sang pagpakamaayo sang priesthood para sa kaumpawan, pero ginhatagan niya kami tanan sang buhi nga panaksihon nga ang promisa sang Ginuo sang paghidaet matuod: “Ini napamulong ko sa inyo, agud nga kamo may paghidaet sa akon. Sa kalibutan may kangitngitan kamo makaangkon sang kalisdanan: apang magpakalig-on kamo; Nadaug ko ang kalibutan” (Juan 16:33).
Ginbaton niya ang Iya pangagda, subong nga mabaton man naton tanan, bisan ano man ang aton mga pagtilaw kag mga kalisdanan:
“Kari sa akon, tanan kamo nga ginabudlayan kag ginabug-atan, kag papahuwayon ko kamo.
“Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon: kag makakita kamo sang kapahuwayan sa inyo mga kalag.” (Mateo 11:28–29).
Paagi lang gid sa pagsunod sa Manluluwas nga ang bisan sin-o sa aton makasalapo sang katawhayan kag kalinong sa mga pagtilaw nga magaabot sa aton tanan.
Ang pangsakramento nga mga pangamuyo nagabulig sa aton nga makahibalo kon paano makasalapo sinang paghidaet sa tunga sang mga kapipit-an sang kabuhi. Sa aton pag-ambit sang sakramento, makapamat-od kita nga mangin tampad sa aton mga kasugtanan nga sundon Sia.
Ang tagsa sa aton nagasaad nga dumdumon ang Manluluwas. Makapili kamo nga dumdumon Sia sa paagi nga nagapalapit sing maayo sang inyo tagipusuon sa Iya. Para sa akon kon kis-a, ini amo ang makita Sia sa akon hunahuna nga nagaluhod sa Hardin sang Getsemane ukon ang makita Sia nga nagatawag kay Lazaro nga maggwa sa lulubngan. Sa paghimo ko sini, makabatyag ako sang kalapit sa Iya kag kapasalamatan nga nagadala sang katawhay sa akon tagipusuon.
Nagasaad man kamo nga tumanon ang Iya mga kasuguan. Nagasaad man kamo sa pagdala sang Iya ngalan kag mangin Iya saksi. Nagapromisa Sia nga sa pagtipig ninyo sang inyo mga kasugtanan sa Iya, ang Balaan nga Espiritu mangin kaupod ninyo. (Tan-awa sa D&C 20:77, 79.)
Ini nagadala sang paghidaet sa kinaubsan, duha ka paagi. Ang Balaan nga Espiritu nagatinlo sa aton gikan sa sala bangud sang Pagpasag-uli ni Jesucristo. Kag ang Balaan nga Espiritu makahatag sa aton sang paghidaet paagi sa pag-angkon sang pagpakamaayo sang Dios kag sang paglaum sang kabuhi nga wala’y katapusan.
Ang Apostoles nga si Pablo nagmitlang sining manami nga pagpakamaayo: “Apang ang bunga sang Espiritu amo ang gugma, kalipay, paghidaet, pagbatas, pagkalolo, pagkaayo, pagtutom.” (Mga Taga-Galacia 5:22).
Sang ang langitnon nga mga mensahero nagbantala sang pagkabun-ag sang Manluluwas, sila nagpahayag, “Himaya sa Dios sa kahitaasan, kag paghidaetsa duta” (Lucas 2:14; pagdagmit gindugang). Nagapamatuod ako bilang isa ka saksi ni Jesucristo nga ang Amay kag Iya Pinalangga nga Anak sarang magpadala sang Espiritu agud tugotan kita nga masalapuan ang paghidaet sa sini nga kabuhi, bisan ano man nga mga pagtilaw ang magaabot sa aton kag sa aton mga pinalangga.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, December 2016. Hiligaynon. 12872 861
Pagtudlo gikan sa Sining Mensahe
Si Pangulong Eyring nagatudlo nga ang pangsakramento nga mga pangamuyo makabulig sa aton sa paghibalo kon paano makasalapo sang paghidaet sa tion sang aton mga pagtilaw. Ginapahanumdum kita sang mga ini nga sa aton pagtipig sang aton mga kasugtanan, may ara kita sang promisa sang Dios nga ang Balaan nga Espiritu mangin kaupod naton. Huna-hunaa ang pagpamangkot sa inyo ginatudloan kon paano ang pagpakig-upod sang Balaan nga Espiritu makabulig sa aton nga makaangkon sang paghidaet. Mahimo man ninyo ipaambit ang inyo mga hunahuna ukon eksperiyensia kon paano ang Balaan nga Espiritu nagbulig sa inyo nga makabatyag sang paghidaet sa pagtilaw. Sarang man ninyo paisugon ang inyo mga ginatudloan sa pagbinagbinag sining mensahe sa tion sang sakramento sini nga semana.