Mensahe sa Visiting Teaching, Disyembre 2016

Ang Kalipay sa Pamilya Napasad sa Pagkamatarong

Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag magbugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.

Pagtuo, Pamilya, Bulig

Ang Dios “nagtukod sang mga pamilya sa pagdala sang kalipayan sa aton, sa pagbulig sa aton nga makatuon sang husto nga mga prinsipyo sa isa ka mahigugmaon nga palibot, kag maghanda sa aton sa kabuhi nga wala’y katapusan.”¹ Nahanungod sa “daku nga plano sang kalipay” sang Dios (Alma 42:8), si Pangulong Russell M. Nelson, Pangulo sang Korum sang Napulo’g Duha ka mga Apostoles, nagsiling: “Ang Iya plano nagapahayag nga ang mga lalaki kag mga babaye nagakabuhi ‘agud sila makaangkon sang kalipay’ [2 Nefi 2:25]. Ina nga kalipay nagaabot kon ginapili naton nga magpangabuhi suno sa wala’y katapusan nga plano sang Dios.”²

Ang puluy-an nga nakasentro-kay-Cristo nagahatag sang pinakadaku nga mga oportunidad para sa kadalag-an. Si Elder Richard G. Scott (1928–2015) sang Korum sang Napulo’g Duha ka mga Apostoles naglaragway sini bilang isa ka lugar “kon diin ang ebanghelyo ginatudlo, mga kasugtanan ginatuman, kag ang gugma bugana,” sa diin ang mga pamilya “makagawi sing matinumanon nga kabuhi” kag mangin “malig-on nga napasad sa ebanghelyo ni Jesucristo.”³

Si Pangulong Henry B. Eyring, Unang Manuglaygay sa Unang Panguluhan, nagsiling: “Mahimo kita magdesisyon nga himuon ang tanan naton nga masarangan agud mapapanaog naton ang gahum sang langit sa [aton] mga pamilya.” Kag daku ang posibilidad nga mapasulong naton ang pagpalangga, pag-alagad, pagkamatinumanon, kag kalipay sa aton mga puluy-an paagi sa “[pagpamati sang aton kabataan] sa pulong sang Dios kag dayon pagtinguha nga tumanon ini nga may pagtuo. Kon himuon nila ini, ang ila mga kinaiya magabag-o sa paagi nga magahatag sang kalipay nga ila ginapangita.”⁴

Mga Puluy-an nga Nasentro-kay-Cristo

May mga ehemplo kita sang mga puluy-an nga nasentro-kay-Cristo sa balaan nga mga kasulatan. Pagkatapos nga napatay ang iya amay nga si Lehi, gindala ni Nefi ang iya pamilya kag iban pa nga nagapati sa mga paandam kag mga bugna sang Dios kag nagpamati sa mga pulong ni Nefi palayo sa duta sang mga Lamanhon. Sa sining bag-o nga lugar, ang mga Nefinhon makatuman sang mga pagsulundan, kag sang mga palatukuran, kag sang mga kasuguan sang Ginuo sa tanan nga mga butang, suno sa layi ni Moises (tan-awa sa 2 Nefi 5:6–10). Wala sapayan sini bisan sa tunga sang mga Nefinhon, ang iban sang ulihi nangin di-matinumanon.

Kag bisan nga ang mga miyembro sang aton pamilya kon kis-a magtalang palayo sa pagkamatarong pareho sang mga Nefinhon, si Elder Scott nagsiling nga ang puluy-an nga nasentro-kay-Cristo sa gihapon “nagahatag sang pinakadaku nga kasegurohan para sa paghidaet kag palasilungan sa aton mga puluy-an.” Gin-ako niya nga “mangin madamo sa gihapon ang mga hangkat ukon mga sakit sa buot, pero bisan sa tunga sang katublagan, sarang kita makaangkon sang katawhay sa kaugalingon kag matuod-tuod nga kalipay.”⁵

Dugang nga Balaan nga mga Kasulatan

3 Juan 1:4; 1 Nefi 8:12; 2 Nefi 5:27

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, December 2016. Hiligaynon. 12872 861

Binagbinaga Ini

Ano ang mahimo naton buhaton agud magpangabuhi sing mas matarong sa sulod sang aton mga pamilya?