Fas Presidensi Mesej, Jenuware 2017
Makemstret long Medel
I Kam long Presiden Dieter F. Uchtdorf
Seken Kaonsela long Fas Presidensi
I no longtaem i pas, mi bin lukluk wan grup blong ol man oli stap lanem fasin ia blong sut long bonara. Taem mi stap lukluk i go, hem i kam klia long mi se sapos yu rili wantem kam gud long yusum bonara, hem i nidim plante taem mo praktis.
Mi no ting se bae yu save kam wan gudfala man blong sut long bonara sapos yu stap sut long wan emti wol mo afta droem ol taget raon long ol spia we yu bin sutum. Yu mas lanem fasin blong faenem mak fastem mo sutum stret long ae blong mak ia.
Pentem Ol Taget
Blong sut fastaem mo droem taget afta hem i no luk gud tumas, be samtaem yumi wanwan i luk yumiwan long semfala fasin ia long ol situesen blong laef.
Olsem ol memba blong Jos, yumi gat tingting ia blong tekpat long ol gospel program, ol samting we i stap hapen, mo iven ol doktrin we yumi gat intres long hem, i impoten, o yumi laekem. Yumi stap switim yumiwan blong droem taget raon long ol samting ia, blong mekem yumi biliv se yumi stap makem stret long stamba blong gospel.
Hemia i isi nomo blong mekem.
Long ol yia i pas kasem tedei, yumi kasem ol gudgudfala kaonsel mo insperesen we i kam long ol profet blong God. Yumi kasem daereksen mo kila lukluk long ol buk we oli kamaot, ol hanbuk, mo ol manuel blong Jos. Hem i isi nomo blong yumi jusum ol topikwe yumi laekem tumas insaed long gospel, dro wan mak raon long hem, mo mekem wan wei blong soem se yumi bin faenem stamba blong gospel.
Sevya I Mekem Samting I Klia
Hemia i no wan problem blong taem blong yumi tedei nomo. Long taem bifo, ol lida blong relijen oli spendem plante taem blong makem, putum long oda, mo toktok raon se wij wan long ol handred komanmen ia nao i moa impoten.
Wan dei wan grup blong ol man we oli stap stadi long relijen ol traem blong pulum Sevya i go insaed long ol raorao blong olgeta. Oli askem tingting blong Hem long wan topik we oli save se bae smol namba nomo bae oli save.
“Masta,” olgeta i askem Hem, “?Wanem loa blong God nao i hae moa long ol narafala loa, i winim olgeta evriwan?”
Yumi evriwan save olsem wanem nao Jisas i ansa long olgeta: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa,
“Mo narawan we i kolosap i sem mak long hem, i talem se, Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”
“Tufala loa ia i stamba blong Loa we God i givim long Moses, wetem ol tok blong ol profet tu.”1
Plis tekem not long las laen ia: “Tufala loa ia i stamba blong Loa we God i givim long Moses, wetem ol tok blong ol profet tu.”
Sevya Hem i no soem nomo taget long yumi, be Hem i soem stret long medel blong taget.
Sutum Stret Long Taget
Olsem ol memba blong Jos, yumi mekem kavenan blong tekem long yumiwan nem blong Jisas Kraes. Folem kavenan we yumi mekem, yumi andastan se bae yumi traehad blong lanem abaot God, lavem Hem, leftemap fet blong yumi long Hem, wokbaot long ol wei blong Hem, mo stanap strong olsem ol witnes blong Hem.
Moa yumi lan abaot God mo filim lav blong Hem from yumi, moa yumi luksave sakrifaes blong Jisas Kraes we i nogat en blong hem se hem i wan tabu presen blong God. Mo lav blong God i givim insperesen long yumi blong wokbaot long rod ia blong tru fasin blong sakem sin, we i lid i go long merikel blong fasin blong fogiv. Tru long wei ia hem i helpem yumi blong gat bigfala lav mo sore long olgeta we oli stap raon long yumi. Bae yumi lanem blong lukluk i go moa bitim ol mak we i stap. Bae yumi faet agensem ol temtesen blong tokbaot o jajem ol narafala man folem sin we olgeta i mekem, ol rabis fasin, ol wiknes, bilif blong olgeta, relijen, kaontri, o kala blong skin.
Bae yumi luk evriwan we yumi mitim olsem ol pikinini blong Papa long Heven—brata o sista blong yumi.
Bae yumi helpem ol narafala man wetem andastaning mo lav—iven olgeta ia we bae i no isi blong lavem olgeta. Bae yumi krae wetem olgeta we oli krae, yes, mo leftemap tingting blong olgeta we oli nidim fasin blong leftemap tingting.2
Mo bae yumi luk save se i no nid blong yumi wari abaot stret mo tru stamba blong gospel.
Tufala stamba loa ia nao i ol samting blong makem. Tufala loa ia i stamba blong Loa we God i givim long Moses, wetem ol tok blong ol profet.3 Taem yumi akseptem hemia, evri gudfala samting bae i foldaon long stret ples blong hem.
Spos lukluk blong yumi, ol tingting, mo ol wok blong yumi i blong leftemap l lav blong yumi long God we i gat olgeta Paoa mo gat sore long ol narafala man, bae yumi save se yumi faenem stret taget mo stap makem stret long medel blong taget—stap kam olsem tru disaepol blong Jisas Kraes
© 2017 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong First Presidency Message, January 2017. Bislama. 97921 852
Yusum Mesej Ia blong Tij
Bifo yu serem mesej ia, yu save sing “Our Savior’s Love” (Hymns, no. 113) Lukluk blong leftemap tingting blong olgeta we yu stap visitim blong lukluk bak long “ol taget” long laef blong olgeta wan. Yu save tokbaot ol wei blong mekemsua se tufala stamba komanmen ia—blong “lavem Hae God blong yu” mo blong “lavem ol man we i stap raonabaot long yu, mekem i gud long olgeta, olsem we yu stap mekem i gud long yu” (Luk Matiu 22:37, 39)—ol stap oltaem blong gaedem ol aksen blong olgeta. Yu save serem ol wei we yu bin putum kraes i kam long medel blong laef blong yu mo serem testemoni blong yu long olsem wanem yu bin kasem blesing folem fasin ia.