iTukutuku ni Mataveiliutaki Taumada, Janueri 2017
Me Lauta na Utona
Mai vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Wale tikoga oqo, au a sarava eso na tamata era a vakatovotovo tiko ena vana dakaititi. Mai na noqu sarava tiko, e matata sara vei au ni kevaka o via kenadau ena vana dakaititi, ena taura na gauna kei na vakatovotovo.
Au sega ni vakabauta ni ko na yaco mo dua na kenadau ena vana dakaititi ena nomu vana ga na lalaga galala ka wirinitaka wavoki na dakaititi. E gadrevi mo vulica na ivakarau cecere ni kena laurai na takete ka vana donu na utona.
Droinitaki ni Takete
Na vana e liu ka droinitaka e muri na takete ena vaka toka me ka lialia, ia eso na gauna oi keda sara ga eda tautauvata kei na itovo o ya ena veituvaki tale eso ni noda bula oqo.
Oi keda na lewe ni Lotu, sa noda ivakarau tu meda semati keda tu ki na parokaramu ni kosipeli, ituvatuva, vakakina ena ivunau e vaka toka me ka talei, bibi, se marautaki vei keda. Eda dau temaki meda droinitaka wavoki na takete, ka cakava meda vakabauta ni da sa lauta tiko na uto ni kosipeli.
Oqo e rawarawa meda cakava.
Ena veiyabaki ni bula eda sa ciqoma tiko na veivakasala totoka kei na nodra veivakauqeti na parofita ni Kalou. Eda sa ciqoma talega na veidusimaki kei na veivakadeitaki mai na veitukutuku tabaki, ivoladusidusi, kei na ivola vakarau ni Lotu. E rawarawa sara na noda digitaka na noda ulutaga ni kosipeli taleitaki, droinitaka wavoki na takete, ka vakadeitaka ni da sa vakatakilakilataka na uto ni kosipeli.
E Vakamatatataka na iVakabula
Oqo e sega ni dua na leqa me vakatabakidua ga kina siga nikua. Ena gauna makawa, era vakayagataki gauna vakalevu na iliuliu vakalotu ena kena tuvai, vakatagedegedetaki, ka veibataki o cei vei ira na drau na ivakaro e bibi duadua.
Dua na siga era a saga eso na ilawalawa vuku vakalotu me ra okati Jisu ki na veileti oqo. Era a kerea Vua me raica mada e dua na ka e lewe vica wale era na duavata kina.
“Vakavuvuli,” era a tarogi Koya, “a cava na ivakaro levu e na ivunau?”
Eda sa kila kece tu na ka a sauma o Jisu: “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.
“Ai matai ni vunau oqo ka levu.
“A sa tautauvata na kena ikarua, Mo lomana na kai nomu me vaka ko lomani iko.
“Sa vu ni vunau taucoko kei ira na parofita na vunau e rua oqo.”1
Yalovinaka me raici mada na iotioti ni yatuvosa: “Sa vu ni vunau taucoko na vunau e rua oqo.”
E sega ni vakaraitaka walega vei keda na iVakabula na takete, ia a vakatakila talega na utona.
Lauta donu na Takete
Oi keda na lewe ni Lotu, eda sa veiyalayalati kaya meda taura na yaca i Jisu Karisito. Sa matata tu ena veiyalayalati o ya ni sa kilai vakavinaka tu ni da na sasaga meda vulica na veika baleta na Kalou, vakalevutaka noda vakabauti Koya, lako ena Nona sala, ka tudei ena vakadinadinataki Koya.
Na levu ni noda vulica na veika baleta na Kalou ka vakila na Nona loloma vei keda, na levu cake ni noda kila ni solibula tawamudu i Jisu Karisito sa isolisoli vakalou ni Kalou. Ka yaco me vakauqeti keda na loloma ni Kalou meda vakayagataka na sala ni veivutuni dina, ka na veimuataki ki na mana ni veivosoti. Na ituvatuva oqo ena rawa kina meda loloma vakalevu cake ka yalololoma vei ira sa tiko voliti keda. Eda na vulica meda raibaleta na veivakacacani. Eda na vorata rawa na veitemaki ni beitaka se vakalewai ira na tamata ena nodra ivalavala ca, malumalumu, caka cala, ito vakapolitiki, vakabauta vakalotu, lewenivanua cava, se roka ni kulina.
Eda na raica na tamata yadua ni sa luvena na Tamada Vakalomalagi—ni sa tacida se ganeda.
Eda na dodoliga yani vei ira na tamata ena noda kilai ira ka lomani ira—vakakina vei ira talega e dau dredre toka meda lomani ira. Eda na tagi vata kei ira sa tagi ka vakacegui ira sa rarawa.2
Eda na qai kila kina ni sega ni gadrevi vei keda meda vakaogai keda tiko ena veika e baleta na takete ni kosipeli dodonu.
Na rua na ivunau levu duadua sai koya na takete. Sa vu ni vunau taucoko kei ira na parofita na vunau e rua oqo.3 Ni da sa ciqoma oqo, na veika vinaka taucoko sara ena tudonu.
Taumada kevaka me na usutu tiko ni noda rai, vakanananu, kei na sasaga ki na kena vakalevutaki na noda lomana na Kalou sa Cecere ka yalololoma yani vei ira na tamata, eda na kila rawa ni da sa kunea na takete dina ka da sa raicamatua yani na utona—o ya meda sa tisaipeli dina i Jisu Karisito.
© 2017 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni First Presidency Message, January 2017. Fijian. 97921 858
Veivakavulici mai na iTukutuku Oqo
Ni bera ni ko wasea na itukutuku oqo, sa rawa mo lagata “Na Loloma ni Turaga”Serenilotu, naba 62). Sa qai rawa mo vakayaloqaqataki ira ko sikova me ra raicamatua na nodra “takete”. Sa rawa mo veivosakitaka na sala eso me vakadeitaka na vunau cecere e rua oqo—o ya mo “lomani Jiova na nomu Kalou” ka “lomana na kai nomu me vaka ko lomani iko” (raica na Maciu 22:37, 39)—me sa dusimaka tikoga na nodra ivalavala. Sa rawa talega mo wasea na sala matata eso ko sa raicamatua tiko kina na nomu bula vei Karisito ka wasea na kena ivakadinadina ni ko sa vakalougatataki kina.