Mensahe ti Umuna a Panguluen, Enero 2017
Panangikarigatan a Mangsurot iti Kapatgan
Ni Presidente Dieter F. Uchtdorf
Maikadua a Mammagbaga iti Umuna a Panguluen
Itay kallabes, binuyak ti grupo dagiti tao nga agprakpraktis iti arte ti archery. Babaen ti panangbuybuya, nalawag kaniak a no talaga a kayatmo nga adalen a naimbag ti agusar iti bai ken pana, ikkam iti oras a panagpraktis.
Panagkunak saanka a maaddaan iti reputasion iti panagbalin a nalaing a pumapana babaen ti panangpuntam iti awan nagyanna a pader ket kalpasanna ipakat dagiti target kadagiti pana. Nasken a masursurom ti paglaingan iti panangsapul iti target ken panangpunta iti bull’s eye.
Dagiti Painting Target
Mabalin a kasla awan serbina ti panangpunta nga umuna ket kalpasanna ipakat dagiti target, ngem no dadduma ipakitatayo dayta mismo nga ugali iti dadduma pay a pasamak ti biag.
Kas miembro ti Simbaan, adda ayotayo a manginaig iti bagbagitayo kadagiti programa ti ebanghelio, isyu, ken uray pay dagiti doktrina a kasla makaay-ayo, napateg, wenno mangparagsak kadatayo. Masulisogtayo a mangipakat kadagiti target kadagitoy, a mangpapati kadatayo a mangikarkarigatan a mangsurot iti kapatgan a paset ti ebanghelio.
Nalaka nga aramiden daytoy.
Iti unos ti pakasaritaan ti lubong nakaawattayo iti napintas a balakad ken inspirasion manipud kadagiti propeta ti Dios. Umawattayo pay iti direksion ken pannakailawlawag manipud iti nadumaduma a publikasion, handbook, ken manual ti Simbaan. Nalaka a makapilitayo iti paggugusto a topiko iti ebanghelio, mangidrowing iti bull’s eye iti lawlawna, ken ibagatayo a nailasintayo ti kapatgan a paset ti ebanghelio.
Ilawlawag ti Mangisalakan
Saan a naidumduma daytoy a problema iti panawentayo. Idi un-unana a panawen, bubosen dagiti lider ti relihion ti adu a panawenda iti panagkatalog, panangranggo, ken pannakidebate no ania kadagiti ginasgasut a bilbilin ti kapatgan.
Maysa nga aldaw ginandat ti maysa a grupo dagiti eskolar ti relihion tapno ipasango ti Mangisalakan iti kontrobersia. Kiniddawda Kenkuana a mangutob iti isyu a mabalin a manmano ti umanamong.
“Maestro,” dinamagda Kenkuana, “ania ti dakkel a bilin iti linteg?”
Ammotayo amin no kasano a sinungbatan ni Jesus: “Ayatem ti Apo a Diosmo iti amin a pusom, ken iti amin a kararuam, ken iti amin a panunotmo.
“Daytoy ti umuna ken dakkel a bilin.
“Ket ti maikadua isu umasping kenkuana, Ayatem ti padam a tao a kas iti bagim.
“Kadagitoy dua a bilin agpannuray ti amin a linteg ken dagiti propeta.”1
Ikasoyo ti maudi a binatog: “Kadagitoy dua a bilin agpannuray ti amin a linteg ken dagiti propeta.”
Ti Mangisalakan ket saan laeng a nangipakita kadatayo iti target, ngem inlasinna pay ti yan ti bull’s-eye.
Panangpunta iti Target
Kas miembro ti Simbaan, makitulagtayo nga awaten iti bagbagitayo ti nagan ni Jesucristo. Ti naawatan a paset ti katulagan ket ti pannakaawat nga ikarigatantayto ti agsursuro maipapan ti Dios, agayat Kenkuana, papigsaen ti pammatitayo Kenkuana, agdayaw Kenkuana, magna iti dalanna, ken agtakder a sititibker kas agsaksi Kenkuana.
Ti ad-adda a pannakasursurotayo maipapan ti Dios ken pannakarikna iti ayatna kadatayo, ad-adda met a maammuantayo a ti awan patinggana a sakripisio ni Jesucristo ket nadiosan a sagut ti Dios. Ken paregtaennatayo ti ayat ti Dios tapno usarentayo ti dalan ti pudno a panagbabawi, a mangiturongto iti milagro ti pannakapakawan. Daytoy a proseso ti mangted kabaelan kadatayo tapno maaddaan iti dakdakkel nga ayat ken panangngaasi kadagiti adda iti aglawlawtayo. Masursurotayo ti kumita iti labes dagiti label. Mapagkedkedantayonto ti sulisog a mangpabasol wenno manghusga iti dadduma kadagiti basbasolda, pagkurangan, pakapilawan, kapanunotan iti politika, natibker a pammati iti relihion, nasionalismo, wenno maris ti kudil.
Ibilangtayonto ti tunggal maysa a makitatayo a kas maysa nga anak ti Nailangitan nga Amatayo—kabsattayo a lalaki wenno kabsattayo a babai.
Tulongantayonto dagiti dadduma iti pannakaawat ken ayat—uray dagitay mabalin a saan a masinunuo a nalaka nga ayaten. Makipagladingittayto kadagiti agladladingit ken liwliwaentayo dagitay agkasapulan iti pannakaliwliwa.2
Ken maamiristayto a saantayo a kasapulan ti agsagaba maipapan iti umisu a target ti ebanghelio.
Dagiti dua a dakkel a bilin ti target. “Kadagitoy dua a bilin agpannuray ti amin a linteg ken dagiti propeta.”3 No awatentayo daytoy, amin a dadduma pay a nasayaat a banag ket maawatan a mayannurot iti umisu a pategda.
No ti kangrunaan a pokustayo, panunot, ken panagkagumaantayo ket maipamaysa iti panangpatibker iti ayattayo iti Mannakabalin a Dios ken panangtulongtayo kadagiti dadduma, maammuantayo a nasarakantayo ti umno a target wenno ipangpangrunatayo ket panggepentayo a puntaan ti bull’s-eye—panagbalin a pudno a disipulo ni Jesucristo.
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, January 2017. Ilokano. 97921 864
Panangisuro manipud iti Daytoy a Mensahe
Sakbay ti panangibinglay iti daytoy a mensahe, mabalinyo a kantaen ti “Our Savior’s Love” (Hymns, no. 113). Kalpasanna ibilangmo ti panangallukoy kadagiti sarsarungkaram a panunotenda dagiti “targets” wenno ipangpangruna iti bukodda a biag. Mabalinmo nga ilawlawag dagiti wagas tapno masigurado a ti dua a dakkel a bilin—nga “ayatem ti Apo a Diosmo” ken “ayatem ti kaarrubam kas iti bagim” (kitaen iti Mateo 22:37, 39)—ket kanayon a mangtarabay kadagiti tignayda. Mabalinmo pay nga ibinglay dagiti masinunuo a wagas a nangipamaysaam ti bukodmo a biag ken ni Cristo ken ibinglaymo ti pammaneknekmo no kasano a nangparabur kenka dayta.