Mensahe iti Visiting Teaching, Enero 2017
Ti Panggep ti Relief Society
Nainkararagan nga adalenyo daytoy a material ken kalikagumanyo ti maaddaan iti inspirasion nga ammuen no ania ti ibinglayyo.
Pammati, Pamilia,Tulong
Ti panggep ti Relief Society ket “isagana dagiti babbai kadagiti bendision ti agnanayon a biag,” kuna ni Linda K. Burton, Relief Society General President.1 Iti babaen ti pammati, pamilia, ken tulong a makiramantayo iti “napateg a paset iti aramidtayo.”2
Ti Relief Society “ket temporal ken naespirituan nga aramid,” kuna ni Carole M. Stephens, Umuna a Mammagbaga iti Relief Society General Presidency. “Dayta ti inaramid dagiti babbai iti panawen ti Apo, ket dayta met ti itultuloytayo nga aramiden.”3
Kabayatan ti panangkitatayo iti babai a Samaritano iti abay ti bubon, a nangpanaw iti karambana ket nagtaray a nangibaga iti dadduma a ni Jesus ket maysa a propeta (kitaen iti Juan 4:6–42), wenno ken ni Febe, a siraragsak a nagserbi kadagiti dadduma iti unos ti biagna (kitaen iti Taga Roma 16:1–2), makitatayo ti pagwadan dagiti babbai iti panawen ti Mangisalakan nga aktibo a nakiraman iti yaasideg ken ni Cristo. Isu ti nanglukat iti dalantayo nga agturong iti agnanayon a biag (kitaen iti Juan 3:16).
No panunotentayo dagiti nagkauna a kameng a kakabsattayo a babbai iti Nauvoo, Illinois, a nagguummong iti pagtaengan ni Sarah Kimball idi 1842 tapno mangbukel iti bukodda nga organisasion, makitatayo ti plano ti Dios iti panangipasdek iti Relief Society a mangsursurot kadagiti prinsipio ti priesthood. Kalpasan nga insurat ni Eliza R. Snow ti maysa a constitusion, inamiris ni Propeta Joseph Smith. Naammuanna a saan pay unay a naan-anay a nabukel ti Simbaan agingga a di mabukel dagiti babbai. Kinunana nga inawat ti Apo ti diaya ngem adda pay maysa a banag a nasaysayaat. “Ummongekto dagiti babbai babaen ti priesthood a maibatay iti pagtuladan ti priesthood,” kinunana.4
“Ti Relief Society ket saan laeng a sabali pay a grupo dagiti babbai nga agkalkalikagum nga agaramid iti nasayaat iti lubong. Naiduma daytoy. Daytoy ti ‘maysa a banag a nasaysayaat’ gapu ta nabukel daytoy babaen ti awtoridad ti priesthood. Napateg nga addang ti pannakabukelna iti pannakaipalgak ti aramid ti Apo iti daga.”5
Dagiti Mainayon a Nasantuan a Kasuratan ken Impormasion
Doktrina ken Katulagan 25:2–3, 10; 88:73; reliefsociety.lds.org
© 2017 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, January 2017. Ilokano. 97921 864
Ibilang Daytoy
Kasano a tumultulong ti Relief Society kadagiti babbai a mangipatungpal iti nadiosan nga akem ti Nailangitan nga Ama para kadakuada ken mangiturong kadakuada iti agnanayon a biag?