Ennaan eo an Būreejtōnji eo Kein Kajuon, Jānwōde 2017
Kajejjet wōt Ioļapļap
Jān Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Raan ko ļo̧k, ikar alooje an juon kurub ej kōmelmel kōjjeroro libbōņ. Jān aō baj alooj, ekar alikkar n̄an n̄a bwe n̄e kwelukkuun kōņaan jeļā kōn libboņ, ebōk iien im iien kaminene.
Ijjab ļōmņak komaron̄ kōm̧m̧ane juon āt jān am̧ erom juon rikōjeroro eo etōprak jān am̧ libbōņe ļo̧k juon wall eo ejjeļo̧k kobban innām jin̄aik jikin ko kwaar kōjjeroroiki ipeļaakin m̧ade ko. Kwoj aikuj in ekkatak kilen am̧ pukōt e jikin eo kwoj kōjeroroiki im kajejjete ron̄ eo ioļapļap in.
Jikin ko Jej Kōjeroroiki Me Reuno
Libboņ m̧okta im kepaaktok jikin eo kwoj kōjeroroiki emaron̄ jidik juon men ebwebwe, ak jet iien kōj make jej kōmeļeļeik kain m̧wil in ilo jekjek ko jet an mour.
Āinwōt membōr ro an Kabun̄, kōj jej imminene in leļo̧k kōj make n̄an būrookraam̧ ko an gopsel, unin kōnono ko, im aaet katak ko me bōlen rekaitoktok limo, aorōk, ak kalimomo n̄an kōj. Jej jelm̧ae kapo n̄an libboņe ļo̧k ipeļaakin jikin eo kōjeroroiki, kōm̧m̧an bwe jen tōmak bwe jikin eo jej libboņe ļo̧k ej pād ilo ioļapen gospel eo.
Menin epidodo kōm̧m̧ane.
Ium̧win elōn̄ iiō ko, jekar bōk kōkpilōklōk ko rem̧m̧an im im̧we jān rikanaan ro an Anij. Jej barāinwōt bōk tōl im kam̧ool jān bok ko rellōn̄, bok in bōk meļeļe ko, im bok in katak ko an Kabun̄ in. Jemaron̄ kālet unin kōnono ko rem̧m̧an jān gospel eo, jin̄aik juon doulul ipeļaakin, im kwaļo̧k ke jekar kalikkar m̧ōttan eo eaorōktata ilo gospel eo.
Rilo̧mo̧o̧r eo ej Kameejļo̧k:
Ejjab juon jorrāān ej waļo̧k ilo raan kein ad. Etto, ritōl ro an kabun̄ rekar joļo̧k eļap iien kōlaajrak, kōjemooj, im kōbauwe kōn ewi iaan bukwi kien ko ekar lukkuun aorōktata.
Juon raan juon kurub in rimāletlet ro jān kabun̄ rekar kajjieon̄ kepaakļo̧k Rilo̧mo̧o̧r n̄an kōm̧m̧an kiojaljaļ. Rekar kajjitōk Ippān kōn An ļōmņak kōn juon unin kōnono jet wōt armej remaron̄ errā kake.
“Ri Kaki,” rekar kajjitōk Ippān, “ewi kien eo eļap ilo kien ko?”
Kōj aolep jeļā bwe Jisōs ekar uwaak, “Kwōn yokwe Irooj am̧ Anij kōn aolepān būruom̧ im kōn aolepen am̧, im kōn am̧ ļōmņak otemjej.
“En̄in kein eo eļap im m̧okta.
“Im eo kein ka ruo āinwōt in, Kwōn yokwe ri turum̧ im āinwōt kwe.
“Kien otemjej im ri kanaan rej ekkejel ilo kien kein ruo.”1
Jouj im likūt ilo noot eo am̧ jentej eo āliktata: “Juon iaan kien kein ruo ej rie aolep kakien ko im rikanaan ro.”
Rilo̧mo̧o̧r eo ekar jab wōt kwaļo̧k n̄an kōj jikin eo jej kōjeroroiki, ak Ekar barāinwōt kalikkar doulul eo.
Libboņe Ļo̧k Jikin eo Jej Kōjeroroiki
Āinwōt membōr ro an Kabun̄ in, jej bujen n̄an bōk iood make etan Jisōs Kraist. Ijo eaorōk ilo bujen in ej meļeļe bwe jenaaj kajjieon̄ ekkatak kōn Anij, iakwe E, kōļapļo̧k tōmak eo ad lo E, kautiej E, etetal ilo iaļ eo An, im jutak dim āinwōt rikam̧ool kōn E.
An ļapļo̧k ad ekkatak kōn Anij im en̄jake iakwe eo An n̄an kōj, ilo an ļapļo̧k ad kile bwe katok eo eļap an Jisōs Kraist ej juon menin letok an Anij. Im iakwe eo an Anij ej im̧we kōj bwe jen kōjerbal iaļ in n̄an m̧ool in ukweļo̧k, eo enaaj tōl ļo̧k n̄an kabwilōn̄lōn̄ jān jeorļo̧k bōd. Wāween in ej kōtlo̧k ad bōk iakwe in eļap im tūriam̧o̧ n̄an ro ipeļaakid. Jej katak n̄an kalimjōk eļapļo̧k jān ļābōļ ko. Jenaaj elļo̧k jān kapo ko bwe jen jab ņaruwōn ak ekajete ro jet jān jerawiwi ko, likjab ko, m̧ōjņo̧ ko, meļeļe ko kōn kien, tōmak ko an kabun̄, kōj armej in ia, ak kain kūl rōt.
Jenaal loe aolep ro jekar ioone āinwōt juon ajri nejin Jemedwōj Ilan̄—m̧aan ro jeid im jatid ak kōrā ro jeid im jatid.
Jenaaj pukōt ļo̧k ro jet ilo meļeļe im iakwe—aaet ro emaron̄ jab pidodo n̄an iakwe er. Jenaaj jan̄ ippān ro rej jan̄ im kaenōm̧m̧an ro jet aikuj aenōm̧m̧an.2
Im jenaaj kile bwe ejjeļo̧k unin ad lukkuun eddodo kōn jikin eo ejejjet ilo gospel in.
Kien ko ruo reļļap rej jikin ko jej kōjeroroiki. Kien otemjej im rikanaan rej ekkejel ilo kien kein ruo.3 Ilo ad bōk menin, aolep men ko jet renaaj jejjet im pād ilo jikier.
N̄e jibadbad eo ad eļap, ļōmņak ko ad, im kijejeo ko ad rej pedped wōt ilo ad kōļapļo̧k ad iakwe n̄an Anij Ekajoor Pōtata im leļo̧k būruwōd n̄an ro jet, jemaron̄ jeļā bwe jej pād ilo jikin eo ejejjet im ej kajejjetļo̧k doulul eo—erom rikaļoor ro rem̧ool an Jisōs Kraist.
© 2017 jān Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/16. Kōmālim an ukook: 6/16. Ukook eo an First Presidency Message, January 2017. Marshallese. 97921 874
Katakin jān Ennaan In
Mokta jān am̧ kwaļo̧k ennaan in, komaron̄ al “Our Savior’s Love” (Hymns, no. 113). Innām kwōn ļōmņak in rōjan̄ ro kwoj loļo̧k bwe ren kalimjek wōt “jikin ko jibadōki” ilo mour ko aer make. Komaron̄ in kōnono kōn wāween ko n̄an lale bwe kien kein ruo reļļap—n̄an “iakwe Irooj am̧ Anij” im n̄an “iakwe riturum̧ im āinwōt kwe” (lale Matu 22:37, 39)—aolep iien rej tōl m̧akūtkūt ko aer. Kwoj aikuj barāinwōt kwaļo̧k wāween ko kwaar pedped wōt ioer ilo mour eo am̧ make kōn Kraist im kwaļo̧k naan in kam̧ool eo am̧ kōn wāween an kōjeraam̧m̧an eok.