Poraus seni ewe Aewin Presetensi, January 2017
Awena ngeni Nukanapan
Seni Preseten Dieter F. Uchtdorf
Aruemonun Chon Aninis non ewe Aewin Presetensi
Iwe chok ekiseno, Ua kakaton ew mwichen aramas ra kaeo ewe angangen nikapich. Ren chok ai katon, a fatoch ngeniei pwe ika ka ennetin mochen kopwe sineochu ewe nikapich me foun nikapich, epwe tam fansoun me kaeo.
Use nuku pwe ka tongeni itefouno ren om angangoch non pekin nikapich ren om chok nikapichi ew etip mi pon iwe mwirin ka chungani ekkewe nenien áánnen ne orokopwanieno unukun ekkewe foun nikapich. Kopwe kaeo ewe angangen kutta ewe nenien áánnen me afota nukanapan we.
Chungani ekkewe Nenien Áánnen
Ach afota akkom me chungani ewe nenien áánnen mwirin epwe ekis mwan, nge fan ekkoch kich pwisin sia engunuwa ena sokkun nikinik non ekkoch pwan nonnomun manau.
Kich chon ewe Mwichefen, sia kan pwisin sani ne choni prokramin ewe kapas allim, osukosukan, pwan mwo nongonong mi ennet ir mi ekis emmeseik, auchea, ika apwapwa ngenikich. Sia kan mochen sotuni ne chungani ekkewe nenien áánnen ne apwenino unukur, a fori ach sipwe nuku pwe sia awena ngeni nukanapan ewe kapas allim.
Ei mi mecheres ach sipwe fori.
Non unusen fansoun sia fen angei aurour mi echipwer me memef seni ekkewe soufosun Kot. Sia pwan angei emmwen me fatafatochun seni ekkoch forun puk, puken emwen, me puken ewe Mwichefen. Mi mecheres sipwe tongeni finata itenapen ewe kapas allim sia kon sani, orokopwanieno ne chungani ew nukanapan nenien áánnen unukun, me affatano pwe sia esisinata nukanapan ewe kapas allim.
Ewe Chon Amanau a Affata
Ei esap ew osukosuk mi sokkono ngeni ranich ei. Me nom, sou emwenin namanam a tam ar fansoun etetteni, enenia, me anini fengen won menni nein ekkewe pukun annuk a kon auchea.
Non ew ran ew mwichen sou makken namanam ra sotuni ne apachanong ewe Chon Amanau non ewe anini fengen. Ra eisini I epwe ekiek won ewe osukosuk minne ekkoch chok ra etipew won.
“Sense,” ra eisini I, “menni nein ekkewe annuk a fakkun nap seni meinisin?”
Kich meinisin sia sinei ifa usun Jises a ponueni: “Kopwe tongei ewe Samol om God ren unusen nenukom, ren unusen ngunum o ren nunusen om ekiek.
“Iei ewe annuk a fokkun napanap o auchea.
“Ewe aruan annuk mi fakkun auchea ussun chok ewe aewin: ‘Kopwe tongei monun unukum ussun chok ka pwisin tongeok.
Won ekkei ruu annuk ra anongonong won meinisin ekkewe afanafan me ekkewe soufos.1
Oupwe attonaochu ewe amuchunon porous: “Won ekkei ru annuk ra anongonong won meinisin ekkewe afanafan me ekkewe soufos.”
Ewe Chon Amanau ese chok pwari ngenikich ewe nenien áánnen, nge I a pwan esisinata nukanapan we.
Afota ewe Nenien Áánnen
Kich chon ewe Mwichefen, sia fori pwon mi pin pwe sipwe wata woch iten Jises Kraist. Fatochun non ena pwon mi pin ina ewe weweoch pwe sipwe achocho ne kaeo usun Kot, tongei I, anapano ach nuku non I, asamonu I, fetan non An oreni, me uta wenechar ussun emon chon pwarata usun I.
Nupwen a napeno ach kaeo usun Kot me mefi An tong ngenikich, a pwan napeno ach apareni pwe ewe asor esemuch an Jises Kraist ina ew niffang seni Kot. Me an Kot tong a pesei kich ach sipwe aea ewe aanen ennetin aier, minne epwe emwenikich ngeni ewe manamanen omusomus. Ei mwokutukut a atufichi an epwe wor ach watten tong me umoumoch fan iten ekkewe mi nom unukuch. Sipwe kaeo ach sipwe kuna pekinon ekkewe etettenin aramas. Sipwe ungeni sossotun ach tipemwan ngeni ekkoch ika apungu ekkoch ren ar tipis, nipwakingaw, apwangapwang, ar kaeo usun mokutukutun non muu , nuku non namanam, ir aramasen ian, ika anuwen unucher.
Sipwe nenengeni emon me enom sia churi pwe I noun Semach won Nang—pwich me fefinach.
Sipwe angeu ngeni ekkoch non wewe me tong—pwan mwo ekkewe eni esap mecheres ach sipwe tonger. Sipwe netipeta ren ekkewe ir mi netipeta me aururu ekkewe ra mochen aurur.2
Me sipwe apareni pwe ese auchea ngenikich ach sipwe aureki usun ewe ennetin nenien áánnen an ewe kapas allim.
Ekkewe ruu annuk mi napanap ir ekkewe nenien áánnen. Won ekkei ruu annuk ra anongonong won meinisin ekkewe afanafan me ekkewe soufos.3 Nupwen sia etiwa ei, meinisin mettoch mi och repwe weweoch.
Ika ach akkaewin ekiek, me achocho repwe chok ekiekin anapano ach tong fan iten ewe Kot mi Napanap me awatteno netipach ngeni ekkoch, sia tongeni sinei pwe sia kuna ewe nenien áánnen mi pung me sia awena ngeni nukanapan we—sia winiti chon kunon Jises Kraist mi ennet.
© 2017 seni Intellectual Reserve, Inc. Meinisin pung mi kawor. A for non Amerika. Kapungunon non fosun Merika: 6/16. Kapungunon awewen: 6/16. Chiaku seni First Presidency Message, January 2017. Chuukese. 97921 901